ஹோர்முஸ் நீர்சந்தி பிரச்சனை: தற்காலிக கப்பல் வழித்தடத்தை அமைக்க ஈரான் – ஓமன் தீவிர பேச்சுவார்த்தை!

அமெரிக்காவுடனான அமைதிப் பேச்சுவார்த்தையில் முட்டுக்கட்டை நீடித்து வரும் நிலையில், சர்வதேச அளவில் மிக முக்கியமான ‘ஹோர்முஸ் நீர்சந்தி’ (Strait of Hormuz) கடல் வழித்தடத்தை சீரமைக்கவும், போக்குவரத்தைக் கட்டுப்படுத்தவும் ஓமன் நாட்டுடன் இணைந்து ஈரான் தீவிர பேச்சுவார்த்தையில் ஈடுபட்டுள்ளது.

ஹோர்முஸ் நீர்சந்தியின் தற்போதைய நிலை

உலக அளவில் உற்பத்தி செய்யப்படும் கச்சா எண்ணெய் மற்றும் திரவமாக்கப்பட்ட இயற்கை எரிவாயுவில் (LNG) ஐந்தில் ஒரு பங்கு ஹோர்முஸ் நீர்சந்தி வழியேதான் கொண்டு செல்லப்படுகிறது.

• போக்குவரத்து முடக்கம்: அமெரிக்கா – ஈரான் இடையேயான மோதல் காரணமாக, கடந்த பிப்ரவரி மாதம் முதல் இந்த கடல் வழித்தடத்தில் வர்த்தகக் கப்பல்களின் போக்குவரத்து கடுமையாகப் பாதிக்கப்பட்டுள்ளது.

• கண்ணிவெடிகள் அகற்றும் திட்டம்: ஓமனின் தலைநகா் மஸ்கட்டில் இரு நாட்டு வெளியுறவு அமைச்சர்களும் சந்தித்துப் பேசினர். அப்போது ஹோர்முஸ் நீர்சந்தியில் தற்காலிகமாக இணைந்த கடல் வழித்தடத்தை (Joint Temporary Navigational Corridor) உருவாக்குவது குறித்தும், கடலில் வைக்கப்பட்டுள்ள கண்ணிவெடிகளை அகற்றுவது குறித்தும் உடன்பாடு எட்டப்பட்டுள்ளது.

அமெரிக்காவின் பொருளாதார தடைகள் & பதற்றம்

அமெரிக்க அதிபர் டொனால்ட் டிரம்ப், ஹோர்முஸ் பகுதியில் உள்ள கண்ணிவெடிகள் அகற்றப்பட்டுவிட்டதாகக் கூறிய போதிலும், அந்தப் பகுதியில் கப்பல்கள் செல்வது இன்னமும் ஆபத்தானதாகவே உள்ளது.

• தாக்கப்பட்ட எண்ணெய் நடுக்கப்பல்: ஓமன் நாட்டின் எல்லைக்குட்பட்ட அஷ் ஷிஷா பகுதிக்கு அருகில் நேற்று சென்ற எண்ணெய் நடுக்கப்பல் (Oil Tanker) மீது அடையாளம் தெரியாத ஏவுகணைத் தாக்குதல் நடத்தப்பட்டதில் அது சேதமடைந்தது.

• அமெரிக்காவின் பொருளாதாரக் கெடுபிடி: ஈரானுடன் வர்த்தகத் தொடர்பு வைத்துக்கொள்ளும் நாடுகளுக்கு எதிராகக் கடும் பொருளாதாரத் தடைகள் விதிக்கப்படும் என அமெரிக்கா எச்சரித்துள்ளது. ஆனால், இந்த நடவடிக்கையை “சட்டவிரோதச் செயல்” என ஈரான் விமர்சித்துள்ளது.

அமெரிக்காவில் குறையும் மக்கள் ஆதரவு

மறுபுறம், ஈரானுக்கு எதிரான இந்த போருக்கு அமெரிக்க மக்களிடையே இருந்த ஆதரவு வரலாற்றைக் காட்டிலும் மிகக் குறைந்த அளவிற்குக் சரிந்துள்ளது. இதனால் அமெரிக்க தூதரக அதிகாரிகளை மீண்டும் மத்திய கிழக்கு நாடுகளுக்கு வாஷிங்டன் அனுப்பத் தொடங்கியுள்ளது.

ஆயினும், அமைதி பேச்சுவார்த்தையில் சுமுக முடிவு எட்டப்படாததால், உலக நாடுகளின் கச்சா எண்ணெய் விநியோகத்தை சீராக வைக்க ஓமன்-ஈரான் பேச்சுவார்த்தை பெரும் முக்கியத்துவம் பெற்றுள்ளது.

தெலங்கானாவில் பயங்கர சாலை விபத்து: தனியார் பேருந்து – லாரி மோதியதில் 6 பேர் பலி; 12 பேர் காயம்!