இங்கிலாந்தில் சுறா மீன்கள் நீந்திக்கொண்டிருந்த பிரம்மாண்ட தொட்டிக்குள் வைத்து காதலன் தனது காதலியிடம் திருமணத்தை முன்மொழிந்த சம்பவம் இணையத்தில் கவனம் பெற்றுள்ளது.
இங்கிலாந்தின் வென்டோவர் பகுதியைச் சேர்ந்த ஜேம்ஸ் வால்ஷ் மற்றும் பேஜ் குக் ஆகியோர் நீண்ட காலமாக காதலித்து வருகின்றனர். பேஜ் குக்கிற்கு சுறா மீன்கள் மிகவும் பிடிக்கும் என்பதை அறிந்த ஜேம்ஸ், அவரது விருப்பத்துக்கு ஏற்ற வகையில் வித்தியாசமான முறையில் திருமணத்தை முன்மொழிய திட்டமிட்டார்.
காதலிக்கு கொடுத்த வித்தியாசமான பரிசு
பேஜ் குக்கிற்கு கிறிஸ்துமஸ் பரிசாக இங்கிலாந்தின் ஸ்கெக்னஸ் அக்குவாரியத்தில் சுறா மீன்களுடன் நீந்தும் அனுபவத்திற்கான டிக்கெட்டை ஜேம்ஸ் பரிசளித்திருந்தார்.
அதே இடத்திலேயே தனது காதலியிடம் திருமணத்தை கேட்க முடிவு செய்த அவர், அக்குவாரியம் ஊழியர்களின் உதவியுடன் ரகசியமாக திட்டமிட்டார்.
சுறாக்கள் நடுவே காதல் புரபோசல்
திட்டமிட்டபடி இருவரும் டைவிங் உடைகளை அணிந்து கொண்டு சுறா மீன்கள் இருந்த பிரம்மாண்ட தொட்டிக்குள் இறங்கினர்.
அக்குவாரியம் ஊழியர்கள் இருவரையும் மற்றவர்களிடம் இருந்து சற்று தனியாக அழைத்துச் சென்றனர். பின்னர் ஜேம்ஸிடம் “என்னை திருமணம் செய்து கொள்வாயா?” என்ற வாசகம் இடம்பெற்றிருந்த பலகையை கொடுத்தனர்.
அந்த தருணத்தில் ஜேம்ஸ் தனது வெட்சூட்டுக்குள் மறைத்து வைத்திருந்த நிச்சயதார்த்த மோதிரத்தை எடுத்து பேஜ் குக்கிடம் காட்டி திருமணத்தை முன்மொழிந்தார்.
அதிர்ச்சியில் உறைந்த காதலி
தன்னைச் சுற்றிலும் சுறா மீன்கள் நீந்திக்கொண்டிருக்க, திடீரென காதலன் திருமணத்தை முன்மொழிந்ததால் பேஜ் குக் அதிர்ச்சியில் உறைந்து போனார்.
அந்த தருணத்தை நினைவுகூர்ந்த அவர், திடீர் அதிர்ச்சியால் வேகமாக மூச்சுவிடத் தொடங்கிவிடுவேனோ, அதனால் தனக்கு காற்று தீர்ந்துவிடுமோ என்று முதலில் பயந்ததாக தெரிவித்துள்ளார்.
ஆனால் அதிர்ச்சியைத் தாண்டி தனது சம்மதத்தை அவர் தெரிவித்தார். நீருக்கடியில் ஜேம்ஸ் காதலை தெரிவித்தபோது, பேஜ் குக் ‘OK’ என்ற கை சைகையை காட்டி தனது சம்மதத்தை வெளிப்படுத்தினார்.
வைரலான நீருக்கடிக் காதல் தருணம்
இந்த வித்தியாசமான திருமண முன்மொழிவு தொடர்பான வீடியோ மற்றும் புகைப்படங்கள் சமூக வலைத்தளங்களில் கவனம் பெற்றுள்ளன.
சுறா மீன்கள் சுற்றி நீந்திக்கொண்டிருக்கும் சூழலில், இருவரும் டைவிங் உடையுடன் நீருக்கடியில் திருமண நிச்சயதார்த்தம் செய்துகொண்ட காட்சிகள் பலரது கவனத்தையும் ஈர்த்துள்ளன.
ஜேம்ஸ் மோதிரத்தை தனது வெட்சூட்டுக்குள் சங்கிலியில் மறைத்து வைத்திருந்ததாகவும், அந்த மோதிரத்தை சுறா மீன் விழுங்கிவிடுமோ என்ற கவலை தனக்கு இருந்ததாகவும் அவர் நகைச்சுவையாக தெரிவித்துள்ளார்.
சாதாரணமாக நடைபெறும் திருமண முன்மொழிவுகளுக்கு மாறாக, காதலிக்கு மிகவும் பிடித்த சுறாக்கள் நடுவே இந்த புரபோசலை செய்திருப்பது இந்த சம்பவத்தை மேலும் வித்தியாசமானதாக மாற்றியுள்ளது.
மூன்று நாள் பயணமாக அமெரிக்கா வந்த சீன அதிபர்: நேரில் வரவேற்ற அதிபர் டிரம்ப்