இந்த ஆண்டு தீபாவளியை முன்னிட்டு தமிழ் திரையுலகில் பல திரைப்படங்கள் திரைக்கு வரத் தயாராகி வருகின்றன. சூர்யாவின் ‘சீன்’, நயன்தாராவின் ‘மூக்குத்தி அம்மன்-2’, விஜய் ஆண்டனியின் ‘அப்பா குட்டி’, பிரபுதேவாவின் ‘மூன் வாக்’ ஆகிய படங்கள் ரசிகர்களிடையே எதிர்பார்ப்பை ஏற்படுத்தியுள்ளன. இவற்றுடன் பிரம்மாண்டமாக உருவாகியுள்ள இந்திப் படமான ‘ராமாயணா’வும் களமிறங்குவதால், இந்த ஆண்டின் தீபாவளி திரைப்படப் போட்டி சூடுபிடித்துள்ளது.
சூர்யாவின் ‘சீன்’
இந்த ஆண்டு தீபாவளி ரேசில் முக்கியப் போட்டியாளராக சூர்யா நடித்துள்ள ‘சீன்’ திரைப்படம் களமிறங்குகிறது. மலையாளத்தில் ‘ஆவேஷம்’ படத்தின் மூலம் கவனம் ஈர்த்த இயக்குநர் ஜீத்து மாதவன் இப்படத்தை இயக்கியுள்ளார்.
‘கருப்பு’, ‘விஸ்வநாத் அண்ட் சன்ஸ்’ படங்களைத் தொடர்ந்து சூர்யா மற்றொரு வெற்றியைப் பதிவு செய்வாரா என்ற எதிர்பார்ப்பு ரசிகர்கள் மத்தியில் நிலவுகிறது.
நயன்தாராவின் ‘மூக்குத்தி அம்மன்-2’
நயன்தாரா நடிப்பில் உருவாகியுள்ள ‘மூக்குத்தி அம்மன்-2’ திரைப்படமும் தீபாவளி வெளியீட்டில் கவனம் பெற்றுள்ளது. முதல் பாகத்திற்குக் கிடைத்த வரவேற்பைத் தொடர்ந்து, இரண்டாம் பாகத்தை சுந்தர்.சி இயக்கியுள்ளார். ஹிப் ஹாப் ஆதி இசையமைத்துள்ளார்.
பிரம்மாண்டமான காட்சிகள் மற்றும் ஆன்மிக அம்சங்களுக்கு முக்கியத்துவம் அளிக்கப்பட்டுள்ள இப்படத்தின் டீசர், ‘ரைஸ் ஆப் மகாசக்தி’ என்ற பெயரில் வெளியாகி எதிர்பார்ப்பை அதிகரித்துள்ளது. தமிழ் மட்டுமின்றி மலையாளம், தெலுங்கு, கன்னடம், இந்தி ஆகிய மொழிகளிலும் இப்படம் வெளியாகவுள்ளது.
விஜய் ஆண்டனியின் ‘அப்பா குட்டி’
விஜய் ஆண்டனி நடிப்பில் உருவாகியுள்ள ‘அப்பா குட்டி’ திரைப்படம் ஆக்ஷன், உணர்ச்சி மற்றும் குடும்பப் பாசம் கலந்த கதையுடன் வெளியாகிறது. மு.மாறன் எழுதி இயக்கியுள்ள இப்படம் தந்தை – மகள் உறவை மையமாகக் கொண்டு உருவாக்கப்பட்டுள்ளது.
குடும்ப உணர்வுகளுக்கு முக்கியத்துவம் அளிக்கும் இப்படம் ரசிகர்களின் வரவேற்பைப் பெறுமா என்ற எதிர்பார்ப்பும் எழுந்துள்ளது. இப்படம் நவம்பர் 6-ஆம் தேதி திரைக்கு வரவுள்ளதாக அறிவிக்கப்பட்டுள்ளது.
பிரபுதேவாவின் ‘மூன் வாக்’
நடனம் மற்றும் இசைக்கு முக்கியத்துவம் அளிக்கும் திரைப்படமாகப் பிரபுதேவா நடித்துள்ள ‘மூன் வாக்’ உருவாகியுள்ளது. சுமார் 25 ஆண்டுகளுக்குப் பிறகு பிரபுதேவா – ஏ.ஆர்.ரஹ்மான் கூட்டணி மீண்டும் இணைந்திருப்பது இப்படத்தின் முக்கிய ஈர்ப்பாகக் கருதப்படுகிறது.
மனோஜ் நிர்மலா ஸ்ரீதரன் இயக்கியுள்ள இப்படம், இசை மற்றும் நடன ரசிகர்களிடையே கவனத்தை ஈர்க்கும் என எதிர்பார்க்கப்படுகிறது.
போட்டியில் களமிறங்கும் ‘ராமாயணா’
தமிழ்ப் படங்களுக்குப் போட்டியாக, ரன்பீர் கபூர், சாய் பல்லவி, யாஷ் உள்ளிட்டோர் நடித்துள்ள பிரம்மாண்ட இந்திப் படமான ‘ராமாயணா’வும் வெளியாகத் தயாராகி வருகிறது. நிதேஷ் திவாரி இயக்கியுள்ள இப்படம் இரண்டு பாகங்களாக உருவாக்கப்பட்டுள்ளது. முதல் பாகம் நவம்பர் 5-ஆம் தேதி திரைக்கு வரத் திட்டமிடப்பட்டுள்ளது.
வசூலில் வெல்லப்போவது யார்?
இந்த ஆண்டு ரஜினிகாந்த், கமல்ஹாசன், விஜய், அஜித் ஆகிய முன்னணி நட்சத்திரங்களின் படங்கள் தீபாவளி வெளியீட்டுப் பட்டியலில் இடம்பெறவில்லை. இருப்பினும், மாறுபட்ட கதைக்களங்களுடன் வெளியாகும் திரைப்படங்கள் ரசிகர்களுக்கு விருந்தளிக்கத் தயாராக உள்ளன.
நவம்பர் 5 மற்றும் 6 ஆகிய தேதிகளில் படங்கள் திரைக்கு வருவதால், முதல் வார இறுதி வசூல், ரசிகர்களின் வரவேற்பு மற்றும் திரையரங்குகளின் ஆதரவு ஆகியவை வெற்றியைத் தீர்மானிப்பதில் முக்கியப் பங்கு வகிக்கும். இந்தத் தீபாவளி வசூல் போட்டியில் எந்தப் படம் முதலிடம் பிடிக்கும் என்பது ரசிகர்களிடையே எதிர்பார்ப்பை ஏற்படுத்தியுள்ளது.
பஹ்ரைனில் ‘ஜெயிலர் 2’ திருவிழா! செண்டை மேளம் அதிர, கேக் வெட்டி ரஜினி ரசிகர்கள் மாஸ் கொண்டாட்டம்!