நடிகர் யோகி பாபு கதாநாயகனாக நடித்துள்ள அவரது 300-வது திரைப்படமான ‘அர்ஜுனன் பேர் பத்து’ வரும் நவம்பர் 27-ஆம் தேதி திரையரங்குகளில் வெளியாகிறது. இதற்கான அதிகாரப்பூர்வ அறிவிப்பை படக்குழு வெளியிட்டுள்ளது.
300-வது படத்தில் கதாநாயகனாக யோகி பாபு
தேவ் சினிமாஸ் நிறுவனம் தயாரிப்பில் உருவாகியுள்ள இப்படத்தை அறிமுக இயக்குநர் ஆர். ராஜ்மோகன் இயக்கியுள்ளார். இப்படத்தில் யோகி பாபுவுக்கு ஜோடியாக அனாமிகா மஹி நடித்துள்ளார். காளி வெங்கட், அருள்தாஸ், லெனின் பாரதி, அயலி மதன், மைனா நந்தினி, சௌந்தர்யா, சென்ட்ராயன், சுப்பிரமணியன் சிவா உள்ளிட்ட பலர் முக்கிய கதாபாத்திரங்களில் நடித்துள்ளனர்.
படத்திற்கு டி. இமான் இசையமைத்துள்ளார். ஒளிப்பதிவை பிரதீப் காளிராஜா மேற்கொண்டுள்ளார்.
எதைப் பற்றிய கதை?
நடுத்தர வர்க்கத்தைச் சேர்ந்த ஓர் இளைஞன் தனது வாழ்க்கையில் முன்னேற வேண்டும் என்ற நோக்கத்தில் கடினமாக உழைத்து ஒரு வாகனத்தை வாங்குகிறார். ஆனால், அந்த வாகனம் திருடுபோகிறது.
திருடுபோன வாகனத்தைத் தேடிக் கண்டுபிடிக்கும் முயற்சியில் அவர் இறங்கும்போது, பலரும் அந்த வாகனத்திற்குத் தங்களுக்கே உரிமை இருப்பதாகக் கூறுகின்றனர். இதன் பின்னணியில் செயல்படும் வாகனத் திருட்டு மற்றும் மோசடி கும்பலை மையமாகக் கொண்டு நகைச்சுவையும் உணர்ச்சிகளும் கலந்த படமாக இது உருவாகியுள்ளது.
பழைய வாகனங்களை வாங்கும்போது நடைபெறும் மோசடிகள் குறித்து மக்களுக்கு விழிப்புணர்வு ஏற்படுத்தும் வகையிலும் படம் அமைந்துள்ளதாக படக்குழு தெரிவித்துள்ளது.
நவம்பர் 27-ல் திரையரங்குகளில் வெளியீடு
இப்படம் முன்னதாக ஜூலை 17-ஆம் தேதி வெளியாகும் என அறிவிக்கப்பட்டிருந்தது. பின்னர் வெளியீடு ஒத்திவைக்கப்பட்ட நிலையில், தற்போது நவம்பர் 27-ஆம் தேதி வெளியாகும் எனப் படக்குழு உறுதி செய்துள்ளது.
யோகி பாபுவின் 300-வது படமாக உருவாகியுள்ள ‘அர்ஜுனன் பேர் பத்து’ திரைப்படம் ரசிகர்கள் மத்தியில் எதிர்பார்ப்பை ஏற்படுத்தியுள்ளது.
திருச்செந்தூர் முருகன் கோவிலில் நடிகர் சூர்யா சாமி தரிசனம்! ‘சீன்’ பட வெற்றிக்காக வழிபாடு?