சவுதி அரேபியா மீது தாக்குதலை நிறுத்த ஹவுதி கிளர்ச்சியாளர்கள் விதிக்கும் நிபந்தனைகள் – கடும் நெருக்கடியில் பட்டத்து இளவரசர்!

ஏமனில் செயல்பட்டு வரும் ஈரான் ஆதரவு ஹவுதி கிளர்ச்சியாளர்கள், சவுதி அரேபியா மீதான தாக்குதல்களை நிறுத்துவதற்குப் பல்வேறு நிபந்தனைகளை முன்வைத்துள்ளதாக தகவல்கள் வெளியாகியுள்ளன. இதனால் சவுதி அரேபியாவுக்கு அரசியல் மற்றும் ராணுவ ரீதியாக நெருக்கடி அதிகரித்துள்ளது.

சமீபகாலமாக ஹவுதி கிளர்ச்சியாளர்கள் சவுதி அரேபியாவின் விமான நிலையங்கள், துறைமுகங்கள் மற்றும் எண்ணெய் உள்கட்டமைப்புகளைக் குறிவைத்து ஏவுகணை மற்றும் ட்ரோன் தாக்குதல்களை நடத்தி வருகின்றனர். செங்கடல் பகுதியில் கப்பல் போக்குவரத்துக்கும் அச்சுறுத்தல் ஏற்பட்டுள்ளது. இதற்குப் பதிலடியாக சவுதி தலைமையிலான கூட்டுப் படைகளும் ஏமனில் ஹவுதி இலக்குகள் மீது தாக்குதல்களை நடத்தி வருகின்றன.

இந்த மோதலை முடிவுக்குக் கொண்டுவருவதற்காக சவுதி அரேபியா பேச்சுவார்த்தை முயற்சிகளை மேற்கொண்டது. ஆனால், ஹவுதிகள் முன்வைத்துள்ள நிபந்தனைகள் சவுதி அரசுக்கு பெரும் சவாலாக அமைந்துள்ளதாகக் கூறப்படுகிறது.

அதன்படி, ஏமனில் சவுதி ராணுவ நடவடிக்கைகளை நிறுத்த வேண்டும், ஏமனின் துறைமுகங்கள் மற்றும் விமான நிலையங்கள் மீதான கட்டுப்பாடுகளைத் தளர்த்த வேண்டும், ஈரானுக்கான விமானப் போக்குவரத்தை மீண்டும் அனுமதிக்க வேண்டும், அரசு ஊழியர்களுக்கு ஊதியம் வழங்க வேண்டும், போரினால் ஏற்பட்ட பாதிப்புகளுக்கு இழப்பீடு வழங்க வேண்டும், ஏமனின் அங்கீகரிக்கப்பட்ட அரசுக்கு சவுதி அளிக்கும் ஆதரவை நிறுத்த வேண்டும் என்பன உள்ளிட்ட கோரிக்கைகளை ஹவுதிகள் முன்வைத்துள்ளதாகத் தகவல்கள் தெரிவிக்கின்றன.

மேலும், கடந்த காலங்களில் சவுதி நடத்திய தாக்குதல்கள் மற்றும் முற்றுகையால் ஏற்பட்ட பாதிப்புகளுக்கான இழப்பீடாக 51 பில்லியன் டாலர் தொகையையும் ஹவுதிகள் கோரியுள்ளதாகச் செய்திகள் வெளியாகியுள்ளன. இருப்பினும், இந்தத் தொகை தொடர்பான தகவல் பேச்சுவார்த்தைகள் குறித்து அறிந்த வட்டாரங்களை மேற்கோள் காட்டியே வெளியாகியுள்ளது.

ஹவுதிகளின் கோரிக்கைகளை ஏற்றுக்கொண்டால், ஏமனில் அவர்களின் அரசியல் மற்றும் ராணுவ செல்வாக்கு மேலும் வலுப்பெறக்கூடும் என சவுதி அரேபியா கவலைப்படுவதாகக் கூறப்படுகிறது. அதே நேரத்தில், ராணுவ நடவடிக்கைகளைத் தீவிரப்படுத்தினால் மோதல் மேலும் விரிவடைந்து, சவுதியின் பொருளாதாரத் திட்டங்களும் முதலீட்டு நம்பிக்கையும் பாதிக்கப்படலாம்.

சவுதி பட்டத்து இளவரசர் முகமது பின் சல்மான் தலைமையிலான அரசு, ஹவுதிகளுக்கு எதிராகத் தரைவழிப் படைகளை அனுப்புவதிலும் தயக்கம் காட்டுவதாகத் தகவல்கள் தெரிவிக்கின்றன. ஏற்கெனவே ஏவுகணை மற்றும் ட்ரோன் தாக்குதல்களால் எண்ணெய் உள்கட்டமைப்புகள் மற்றும் பொதுமக்களின் பாதுகாப்பு அச்சுறுத்தலுக்கு உள்ளாகியுள்ளன.

இதனால், ஹவுதி கிளர்ச்சியாளர்களுடன் பேச்சுவார்த்தை நடத்துவதா அல்லது ராணுவ நடவடிக்கையைத் தீவிரப்படுத்துவதா என்ற இக்கட்டான நிலைக்கு சவுதி அரேபியா தள்ளப்பட்டுள்ளது. இந்த மோதல் நீடித்தால் மத்திய கிழக்கு பிராந்தியத்தில் பதற்றம் மேலும் அதிகரிக்கக்கூடும் என அரசியல் மற்றும் பாதுகாப்பு ஆய்வாளர்கள் எச்சரிக்கின்றனர்.

“அமெரிக்கர்கள் போருக்கு எதிராக வாக்களித்துள்ளனர்” – டிரம்புக்கு ஏற்பட்ட பின்னடைவை கொண்டாடும் ஈரான்!