கலை, பொழுதுபோக்கு, அறிவியல், விளையாட்டு, தொழில்நுட்பம், வர்த்தகம், சமூக நலன் உள்ளிட்ட பல்வேறு துறைகளில் வளர்ந்து வரும் தலைமைத்துவ ஆற்றல் கொண்டவர்களையும், இந்தியாவின் எதிர்காலத்தை வடிவமைப்பதில் முக்கியப் பங்காற்றக்கூடியவர்களையும் அடையாளம் காணும் நோக்கில் இந்தப் பட்டியல் வெளியிடப்பட்டுள்ளது.

இதில் நடிகை ஆலியா பட், உலகளாவிய அட்டைப் படங்களில் இடம்பெற்றுள்ளார். விண்வெளித் தொழில்நுட்ப நிறுவனமான ஸ்கைரூட் ஏரோஸ்பேஸின் இணை நிறுவனர் பவன் குமார் சந்தனா மற்றும் இயக்குநர்கள் ஆர்யன் கான், பயல் கபாடியா, தேஜா ரியோ ஆகியோரும் அட்டைப் படங்களில் இடம்பெற்றுள்ளனர்.
திரையுலகம், இசைத்துறைக்கு அங்கீகாரம்:
இந்தியத் திரையுலகைச் சேர்ந்த பலருக்கும் இந்தப் பட்டியலில் இடம் கிடைத்துள்ளது. நடிகைகள் சாய் பல்லவி, சமந்தா ரூத் பிரபு, ஆலியா பட், தாப்ஸி பன்னு, நயன்தாரா, நடிகர்கள் விக்கி கௌஷல், துல்கர் சல்மான், அலி ஃபசல், ஜிதேந்திர குமார், இஷான் கட்டர் உள்ளிட்டோர் அங்கீகரிக்கப்பட்டுள்ளனர்.
தமிழ்த் திரையுலகைச் சேர்ந்த நடிகை சாய் பல்லவி மற்றும் இயக்குநர் பா. ரஞ்சித் ஆகியோர் இடம்பெற்றிருப்பது குறிப்பிடத்தக்கது. இசையமைப்பாளர் அனிருத் ரவிச்சந்தர், பாடகர்கள் தில்ஜித் தோசாஞ்ச், அறிவு, ஜஸ்லீன் ராயல், பிரதீக் குஹாட் உள்ளிட்டோரும் இசைத்துறையின் சார்பில் பட்டியலில் இடம்பிடித்துள்ளனர்.
தொழில்முனைவோர், விளையாட்டு வீரர்களுக்கும் இடம்
தொழில் மற்றும் வர்த்தகத் துறையில் செரம் இன்ஸ்டிடியூட் நிறுவனத்தின் தலைமைச் செயல் அதிகாரி அதார் பூனாவாலா, ஜெரோதா நிறுவனத்தின் இணை நிறுவனர் நிகில் காமத், லென்ஸ்கார்ட் நிறுவனத்தின் பியூஷ் பன்சால் உள்ளிட்டோர் இடம்பெற்றுள்ளனர்.
விண்வெளி ஆராய்ச்சியில் இந்தியாவின் வளர்ச்சிக்கு பங்களித்து வரும் ஸ்கைரூட் ஏரோஸ்பேஸ் நிறுவனத்தின் பவன் குமார் சந்தனா, விண்வெளி வீரர் ஷுபான்ஷு சுக்லா ஆகியோருக்கும் அங்கீகாரம் கிடைத்துள்ளது.
விளையாட்டுத் துறையில் கிரிக்கெட் வீரர் வைபவ் சூர்யவன்ஷி, செஸ் உலக சாம்பியன் குகேஷ், குத்துச்சண்டை வீராங்கனை லோவ்லினா போர்கோஹைன், குத்துச்சண்டை மற்றும் தடகள வீரர்கள் உள்ளிட்ட பலரும் இடம்பெற்றுள்ளனர்.
ஐந்து பிரிவுகளில் 100 பேர்:
இந்தப் பட்டியல் ‘கலைஞர்கள்’, ‘திறமையாளர்கள்’, ‘புதுமையாளர்கள்’, ‘தலைவர்கள்’, ‘சமூக உரிமைகளுக்காகக் குரல் கொடுப்பவர்கள்’ என ஐந்து பிரிவுகளாக அமைக்கப்பட்டுள்ளது.
ஒவ்வொரு துறையிலும் புதிய சிந்தனைகள், சாதனைகள் மற்றும் சமூகத் தாக்கத்தை ஏற்படுத்தி வருபவர்களுக்கு முக்கியத்துவம் அளிக்கப்பட்டுள்ளது.
இந்தப் பட்டியல் தரவரிசைப் பட்டியல் அல்ல. பல்வேறு துறைகளில் எதிர்காலத்தை வடிவமைக்கும் ஆற்றல் கொண்டவர்களை அடையாளப்படுத்தும் தொகுப்பாகும்.
இந்தப் பட்டியலை வெளியிடுவதன் ஒரு பகுதியாக, டிசம்பர் 12-ம் தேதி மும்பையில் ‘டைம் 100 நெக்ஸ்ட் இந்தியா’ விருது விழா நடைபெற உள்ளது. இதில் பட்டியலில் இடம்பெற்றுள்ள பல்வேறு துறைகளைச் சேர்ந்த பிரபலங்கள் பங்கேற்க உள்ளனர்.
இந்தியாவின் முதல் ‘டைம் 100 நெக்ஸ்ட் இந்தியா’ பட்டியல், பொழுதுபோக்குத் துறையினர் மட்டுமின்றி தொழில்முனைவோர், விஞ்ஞானிகள், விளையாட்டு வீரர்கள், சமூகச் செயல்பாட்டாளர்கள் எனப் பல்வேறு துறைகளில் வளர்ந்து வரும் இந்தியத் திறமைகளுக்கு சர்வதேச அங்கீகாரத்தை வழங்கியுள்ளது.
ஏபெக் உச்சிமாநாட்டுப் புகைப்படச் சர்ச்சை: ராகுல் காந்திக்கு டெல்லி முதல்வர் ரேகா குப்தா பதிலடி!
==========================
