மிரட்டும் காளிதாஸ், அர்ஜூன் தாஸ்… போர் ட்ரைலர் வெளியீடு…

காளிதாஸ் ஜெயராம் மற்றும் அர்ஜூன் தாஸ் நடிப்பில் உருவாகியிருக்கும் போர் படத்தின் முன்னோட்டம் வெளியாகி இருக்கிறது.

தமிழ் சினிமாவில் வளர்ந்து வரும் இரண்டு இளம் நடிகர்கள் அர்ஜூன் தாஸ் மற்றும் காளிதாஸ் ஜெயராம். தமிழில் அர்ஜூன் தாஸின் குரலுக்கென தனி ரசிகர் கூட்டமே உள்ளது. லோகேஷ் கனகராஜ் இயக்கிய கைதி படத்தின் மூலம் தமிழ் சினிமாவிக்கு அறிமுகமானவர் அர்ஜூன் தாஸ். வில்லனாக நடித்த அவர், தொடர்ந்து மாஸ்டர், விக்ரம் ஆகிய படங்களிலும் வில்லனாக நடித்திருந்தார். இதையடுத்து, அந்தகாரம் படத்தில் நாயகனாக அறிமுகமாகி, அடுத்தடுத்து பல படங்களில் தற்போது நடித்து வருகிறார்.

அதேபோலா, மலையாளத்தில் இருந்து தமிழ் மொழிக்கு வந்து கலக்கிக் கொண்டிருக்கும் மற்றொரு நாயகன் காளிதாஸ் ஜெயராம். பாவக்கதைகள் படத்தில் திருநங்கையாக நடித்து, மக்கள் மனதில் நீங்கா இடம் பிடித்தார் காளிதாஸ். இதைத் தொடர்ந்து நட்சத்திரம் நகர்கிறது என அடுத்தடுத்து பல படங்களில் நடித்து வருகிறார். தற்போது அர்ஜூன் தாஸ் மற்றும் காளிதாஸ் ஜெயராம் இருவரும் இணைந்து நடித்துள்ள திரைப்படம் தான் போர்.

இப்படத்தை டேவிட் பட இயக்குநர் பிஜோய் நம்பியார் இயக்கி இருக்கிறார். டி சீரிஸ் நிறுவனம் படத்தை தயாரித்து உள்ளது. தமிழில் அர்ஜூன் தாஸ் மற்றும் காளிதாஸ் ஜெயராமை வைத்தும் இந்தியில் ஹர்ஸ்வர்தன் ரனே, ஈஹான் பட்டை வைத்தும் ஒரே நேரத்தில் படமாக்கப்பட்டு உள்ளது. இப்படத்திற்கு இந்தியில் டங்கே என்று பெயர் வைக்கப்பட்டுள்ளது. இந்நிலையில், இத்திரைப்படத்தின் முன்னோட்டம் வெளியாகி உள்ளது. வரும் மார்ச் 1-ம் தேதி திரைப்படம் திரையரங்குகளில் வெளியாகிறது.