7ஜி ரெயின்போ காலனி 2 படத்தின் ரிலீஸ் குறித்த அப்டேட் வெளியாகியுள்ளது.
தமிழ் சினிமாவில் முன்னணி இயக்குனர்களின் ஒருவராக வலம் வரும் செல்வராகவன் கடந்த 2004 ஆம் ஆண்டு 7ஜி ரெயின்போ காலனி எனும் திரைப்படத்தை இயக்கியிருந்தார். இந்த படத்தில் ரவி கிருஷ்ணா கதாநாயகனாக நடிக்க, சோனியா அகர்வால் கதாநாயகியாக நடித்திருந்தார். எதார்த்தமான காதல் கதைக்களத்தில் வெளியான இந்த படம் இளைஞர்களை வெகுவாக கவர்ந்து மிகப்பெரிய வெற்றி படமாக அமைந்தது. இந்த வெற்றியை தொடர்ந்து கிட்டத்தட்ட 20 வருடங்கள் கழித்து 7ஜி ரெயின்போ காலனி படத்தின் இரண்டாம் பாகத்தை இயக்கி வருகிறார் செல்வராகவன். 
அதன்படி இந்த படத்திற்கு 7ஜி ரெயின்போ காலனி 2 என்று தலைப்பு வைக்கப்பட்டுள்ளது. முதல் பாகத்தின் தொடர்ச்சியாக உருவாகும் இந்த படத்தில் ரவி கிருஷ்ணா, அனஸ்வரா ராஜன் ஆகியோர் முன்னணி கதாபாத்திரங்களில் நடிக்கின்றனர். ஸ்ரீ சூர்யா மூவிஸ் நிறுவனம் இந்த படத்தை தயாரிக்க யுவன் சங்கர் ராஜா இதற்கு இசையமைக்கிறார். ராம்ஜி இந்த படத்திற்கு ஒளிப்பதிவு செய்கிறார். மிகுந்த எதிர்பார்ப்புடன் உருவாகும் இந்த படத்தின் படப்பிடிப்பு ஏற்கனவே தொடங்கப்பட்டு விறுவிறுப்பாக நடைபெற்று வருகின்றன. அதன்படி படப்பிடிப்பு இறுதி கட்டத்தை நெருங்கி இருப்பதாக ஏற்கனவே தகவல் வெளியாகின. 
தற்போது இதன் கூடுதல் தகவல் என்னவென்றால் இந்த படத்தை 2025 தீபாவளி அல்லது கிறிஸ்துமஸ் தினத்தை முன்னிட்டு திரைக்கு கொண்டு வர படக்குழு திட்டமிட்டு வருவதாக தெரியவந்துள்ளது. இதற்கிடையில் 2025 ஜூன் மாதம் இரண்டாவது வாரத்தில் இந்த படத்தின் டீசர் வெளியாகும் என புதிய தகவல்கள் தெரிவிக்கின்றன. இனிவரும் நாட்களில் மற்ற அப்டேட்டுகள் வெளியாகும் என எதிர்பார்க்கப்படுகிறது.