கமலின் சூப்பர் ஹிட் படமான ‘வேட்டையாடு விளையாடு’ ரீரிலீஸ் செய்யப்பட இருப்பதாக அறிவிப்பு வெளியாகி உள்ளது.
கடந்த 2006 ஆம் ஆண்டில் கௌதம் வாசுதேவ் மேனன் இயக்கத்தில் உலக நாயகன் கமல் நடித்து வெளிவந்த திரைப்படம் வேட்டையாடு விளையாடு. இந்தப் படத்தில் கமலுடன் ஜோதிகா, பிரகாஷ் ராஜ், கமலானி முகர்ஜி, டேனியல் பாலாஜி உள்ளிட்ட பலர் நடித்திருந்தனர்.
வித்தியாசமான கதைக்களத்தில் க்ரைம் திரில்லராக வெளிவந்த இந்தப் படம் நல்ல வரவேற்பைப் பெற்றது. ஹாரிஸ் ஜெயராஜின் இசையில் வெளியான பாடல்களும் சூப்பர் ஹிட் ஆனது. கமல்ஹாசன் இப்படத்தில் மிடுக்கான போலீஸ் அதிகாரியாக மிரட்டி இருந்தார். போலீஸ் என்றால் எப்படி இருப்பார்கள் என்று சினிமாத்தனம் அதிகம் இல்லாமல் காண்பித்து அதே சமயம் கமல்ஹாசனின் மிடுக்கும் குறையாமல் மாஸ் காட்சிகளும் வைத்து அசத்தியிருந்தார் கௌதம் மேனன். தற்போது வரை தமிழ் சினிமாவின் கல்ட் கிளாசிக் படங்களில் வேட்டையாடு விளையாடு படத்திற்கு முக்கிய இடமுண்டு. படத்தில் கமல் பேசும் என் கண்ணு வேணுன்னு கேட்டியாமே டயலாக் தற்போது வரை ஃபேமஸ்.
தற்போது 17 ஆண்டுகளுக்குப் பிறகு மீண்டும் இப்படம் வருகின்ற ஜூன் மாதம் ரீ ரிலீஸ் செய்யப்பட இருக்கிறது. இதனை படக்குழுவினர் ‘டிசிபி ராகவன் இஸ் பேக்’ என்ற போஸ்டருடன் அறிவித்துள்ளனர். ‘வேட்டையாடு விளையாடு’ திரைப்படம் மீண்டும் வெளியாவது ரசிகர்களுக்கு மகிழ்ச்சியை ஏற்படுத்தியுள்ளது.
இதற்கிடையில் உலக நாயகன் கமலஹாசன் தற்போது ஷங்கர் இயக்கத்தில் ‘இந்தியன் 2’ படத்தில் நடித்து வருகிறார். இப்படத்தை பொங்கல் தினத்தன்று வெளியிட படக்குழுவினர் திட்டமிட்டுள்ளனர். இந்தப் படத்தை அடுத்து மணிரத்னம் இயக்கத்தில் கமல்ஹாசன் நடிக்க இருக்கிறார்.