நடிகை துஷாரா விஜயன் மலையாளத்தில் அறிமுகமாகியுள்ளார்.
தமிழ் சினிமாவில் ஆர்யா நடிப்பில் வெளியான ‘சார்பட்டா பரம்பரை’ படத்தில் நடித்ததன் மூலம் ரசிகர்களுக்கு பரீட்சையமானவர் துஷாரா விஜயன். அதை தொடர்ந்து இவர் தனுஷ், ரஜினி, விக்ரம் உள்ளிட்ட முன்னணி நடிகர்களுடன் இணைந்து பணியாற்றி பெயரையும் புகழையும் பெற்றுள்ளார். தற்போது இவர், விஷால் நடிப்பில் உருவாகி வரும் ‘மகுடம்’ திரைப்படத்தில் நடிக்கிறார். இந்நிலையில் மலையாள சினிமாவில் அறிமுகமாகியுள்ளார் துஷாரா விஜயன்.
அதாவது மலையாளத்தில் ‘மார்கோ’ படத்தை தயாரித்த ஷரீப் முகமது ‘காட்டாளன்’ எனும் திரைப்படத்தை தயாரிக்கிறார். பால் ஜார்ஜ் இயக்கும் இந்தப் படத்தில் ஆண்டனி வர்கீஸ் நடிக்கிறார். இந்த படத்தில் ரஜிஷா விஜயன், சுனில், ராஜ் திரந்தாஷு, கபீர் துஹான் சிங் ஆகியோர் நடிப்பதாக சொல்லப்படுகிறது. இந்த படத்தின் படப்பிடிப்புகள் கடந்த சில மாதங்களுக்கு முன்னர் தாய்லாந்தில் தொடங்கி விறுவிறுப்பாக நடைபெற்று வருகிறது. 
அதே சமயம் இந்த படத்தின் ஃபர்ஸ்ட் லுக் போஸ்டரும் வெளியாகி இணையத்தில் வைரலானது. இந்நிலையில் இந்த படத்தில் நடிகை துஷாரா விஜயன் இணைந்துள்ளதாக அதிகாரப்பூர்வமாக அறிவிக்கப்பட்டுள்ளது. மேலும் இந்த படமானது தமிழ், தெலுங்கு, மலையாளம், இந்தி, கன்னடம் ஆகிய மொழிகளில் வெளியாக இருக்கிறது என்பது குறிப்பிடத்தக்கது.