டிஜிட்டலில் ரீ-ரிலீஸாகும் நாயகன் திரைப்படம்

1987-ம் ஆண்டு தமிழில் மணிரத்னம் இயக்கத்தில் கமல்ஹாசன் நடிப்பில் வெளியான திரைப்படம் ‘நாயகன்’. இப்படத்திற்கு இளையராஜா இசை அமைத்திருந்தார். இப்படத்தை முகுந்தன் ஸ்ரீனிவாசன் தயாரித்திருந்தார்.
பி.சி.ஸ்ரீராம் ஒளிப்பதிவு மேற்கொண்டிருந்தார். படத்தில் சரண்யா, டெல்லி கணேஷ், ஜனகராஜ், நாசர், நிழல்கள் ரவி, கார்த்திகா, விஜயன் உள்ளிட்ட பலர் முக்கிய கதாபாத்திரங்களில் நடித்திருந்தனர்.

மும்பையை பின்னணியாக கொண்ட நாயகன் திரைப்படத்தில் வேலு நாயக்கர் என்ற கதாபாத்திரத்தில் கமல்ஹாசன் அசத்தலான நடிப்பை வெளிப்படுத்தியிருப்பார். இந்தப்படத்துக்காக கமல்ஹாசனுக்கு சிறந்த நடிகருக்கான தேசிய விருது கிடைத்தது. ஒளிப்பதிவாளர் பிசிஸ்ரீராம், கலை இயக்குநர் தோட்டா தரணிக்கும் தேசிய விருது வழங்கப்பட்டது. இந்நிலையில் கமல்ஹாசன் பிறந்த நாளை முன்னிட்டு நாயகன் திரைப்படம் வரும் நவம்பர் 3-ம் தேதி மறு வெளியீடு செய்ய உள்ளதாக அறிவிக்கப்பட்டு உள்ளது.

பிலிமில் எடுக்கப்பட்ட படத்தை டிஜிட்டல் தொழில்நுட்பத்தை பயன்படுத்தி மாற்றி, படத்தை ரீ ரிலீஸ் செய்யவுள்ளனர். தமிழ்நாட்டில் 120 திரையரங்குகளிலும், கேரளாவில் 60 திரையரங்குகளிலும் கர்நாடகாவில் 50 திரையரங்குகளிலும் படத்தை வெளியிட திட்டமிட்டுள்ளனர்.