நடிகர் ரவி மோகனின் ரசிகர் சந்திப்பில் இடம்பெற்ற அரசியல் சார்ந்த பேச்சு தற்போது சமூக வலைதளங்களில் கவனம் பெற்று வருகிறது. வரும் செப்டம்பர் 10-ம் தேதி தனது பிறந்தநாளை கொண்டாட உள்ள ரவி மோகன், அதையொட்டி ரசிகர்களை சந்தித்து வருகிறார். இந்த சந்திப்பில் ரசிகர் மன்ற நிர்வாகி ஒருவர் பேசிய வார்த்தைகள்தான் தற்போது அரசியல் வட்டாரத்திலும் விவாதத்தை ஏற்படுத்தியுள்ளது.
“கொடியை கொடுங்கள்… கோட்டையை பிடிப்போம்!”
நிகழ்ச்சியில் பேசிய ரசிகர் மன்ற நிர்வாகி, “அண்ணா குரல் கொடுங்கள்… தமிழகத்தில் இருந்து அலையாய் வருவோம். கொடியை கொடுங்கள்… உங்கள் ரசிகர்கள் கோட்டையை பிடிப்போம்” என்று உற்சாகமாக பேசியுள்ளார்.
இந்தப் பேச்சு முடிந்ததும் ரவி மோகன் உடனடியாக எழுந்து சென்று அந்த ரசிகர் மன்ற நிர்வாகியை கட்டித்தழுவியுள்ளார். இதுதொடர்பான வீடியோ தற்போது சமூக வலைதளங்களில் வைரலாகி வருகிறது.
அரசியலுக்கு வருகிறாரா ரவி மோகன்?
ரசிகர் மன்ற நிர்வாகியின் பேச்சு அரசியல் எதிர்பார்ப்பை ஏற்படுத்திய நிலையில், ரவி மோகனிடம் அவரது அரசியல் வருகை குறித்த கேள்விகளும் எழுந்துள்ளன.
இதற்கு பதிலளித்த ரவி மோகன், தற்போது தான் சினிமாவில் மட்டுமே இருப்பதாகவும், நல்லது செய்வதற்கு அரசியலுக்கு வர வேண்டும் என்ற அவசியம் இல்லை என்றும் தெரிவித்துள்ளார்.
“பதவி இருந்தால்தான் நல்லது செய்ய முடியும் என்பதும் கிடையாது. தேவைப்பட்டால் அதை எடுத்துக்கொண்டும் செய்யலாம்” என்ற கருத்தையும் அவர் தெரிவித்துள்ளார்.
அரசியல் என்ட்ரிக்கு பச்சைக்கொடியா?
ரவி மோகனின் தற்போதைய பதிலை பார்க்கும்போது, அவர் அரசியலுக்கு வருவதாக எந்தவொரு அதிகாரப்பூர்வ அறிவிப்பையும் வெளியிடவில்லை.
அதேநேரத்தில், அவர் அரசியலுக்கு வரமாட்டேன் என்றும் திட்டவட்டமாக கூறவில்லை. இதனால் அவரது ரசிகர் மன்ற செயல்பாடுகள் மற்றும் எதிர்கால அரசியல் நிலைப்பாடு மீதான எதிர்பார்ப்பு மீண்டும் அதிகரித்துள்ளது.
தமிழகத்தில் சினிமா நட்சத்திரங்கள் அரசியலுக்கு வருவது தொடர்பான விவாதம் தொடர்ந்து வரும் நிலையில், ரவி மோகனின் ரசிகர் சந்திப்பில் இடம்பெற்ற இந்தப் பேச்சு அந்த விவாதத்திற்கு மேலும் தீனி போட்டுள்ளது.
ரவி மோகனின் அரசியல் பயணம் குறித்து இதுவரை அதிகாரப்பூர்வ அறிவிப்பு எதுவும் இல்லை. ஆனால் “கொடியை கொடுங்கள்… கோட்டையை பிடிப்போம்” என்ற ரசிகர் மன்ற நிர்வாகியின் பேச்சு, அவரது அரசியல் எதிர்காலம் குறித்த விவாதத்தை மீண்டும் சூடுபிடிக்கச் செய்துள்ளது.