வா வாத்தியார் படத்தின் ரிலீஸ் குறித்த புதிய தகவல் வெளியாகியுள்ளது.
கார்த்தி நடிப்பில் கடைசியாக மெய்யழகன் எனும் திரைப்படம் வெளியானது. அதைத்தொடர்ந்து நடிகர் கார்த்தி கங்குவா திரைப்படத்தில் வில்லனாக நடித்திருந்தார். மேலும் இவர் சர்தார் 2, கைதி 2, கார்த்தி 29 ஆகிய படங்களை கைவசம் வைத்திருக்கிறார். இதற்கிடையில் இவர் தனது 26ஆவது திரைப்படமான வா வாத்தியார் எனும் திரைப்படத்தில் நடித்திருக்கிறார். இந்த படத்தை ஸ்டூடியோ கிரீன் நிறுவனம் தயாரிக்க நலன் குமாரசாமி இயக்கியுள்ளார். இந்த படத்தில் கார்த்தி உடன் இணைந்து கிரித்தி ஷெட்டி , ராஜ்கிரண், சத்யராஜ் மற்றும் பலர் நடித்திருக்கின்றனர். இந்த படத்திற்கு சந்தோஷ் நாராயணன் இசை அமைக்க ஜார்ஜ் சி வில்லியம்ஸ் ஒளிப்பதிவு பணிகளை கவனித்துள்ளார். 
இந்த படத்தின் படப்பிடிப்புகள் கடந்த சில மாதங்களாக நடைபெற்று வந்த நிலையில் ஒட்டுமொத்த படப்பிடிப்பும் நிறைவடைந்து விட்டதாக சொல்லப்படுகிறது. அதே சமயம் இந்த படத்தில் இருந்து பர்ஸ்ட் லுக் போஸ்டரும் டீசரும் வெளியாகி நல்ல வரவேற்பை பெற்றது. இந்த நிலையில் வா வாத்தியார் திரைப்படத்தை 2025 ஏப்ரல் மாதம் திரைக்கு கொண்டுவர படக்குழு திட்டமிட்டு வருவதாக தெரியவந்துள்ளது.
ஏற்கனவே அஜித்தின் குட் பேட் அக்லி திரைப்படமும் தனுஷின் இட்லி கடை திரைப்படமும் 2025 ஏப்ரல் மாதத்தில் திரைக்கு வருகிறது என்பது குறிப்பிடத்தக்கது.