மேற்கு வங்க சட்டப்பேரவைத் தேர்தலின் முதற்கட்ட வாக்குப்பதிவு இன்று (ஏப்ரல் 23, 2026) காலை 7 மணிக்குத் தொடங்கியது. சுமார் 1,478 வேட்பாளர்களின் தலைவிதியை நிர்ணயிக்க 3.60 கோடி வாக்காளர்கள் தங்கள் வாக்குகளைப் பதிவு செய்ய உள்ளனர்.
வட வங்காளத்தில் 8 மற்றும் தென் வங்காளத்தில் 8 என மொத்தம் 16 மாவட்டங்களில் பரவியுள்ள 152 சட்டப்பேரவைத் தொகுதிகளுக்கு காலை 7 மணி முதல் வாக்குப்பதிவு நடைபெற்று வருகிறது.
இந்தியத் தேர்தல் ஆணையத்தின் தரவுகளின்படி, காலை 9 மணி நிலவரப்படி மாநிலத்தில் 18.76% வாக்குகள் பதிவாகியுள்ளன. இந்த தேர்தலுக்காக, தேர்தல் ஆணையம் முன்னெப்போதும் இல்லாத வகையில் 2,450 கம்பெனி மத்திய துணை ராணுவப் படைகளை (சுமார் 2.5 லட்சம் வீரர்கள்) பாதுகாப்புப் பணியில் ஈடுபடுத்தியுள்ளது.
வாக்காளர் பட்டியல் சிறப்புத் தீவிர திருத்தப் பணிகளுக்குப் பிறகு (SIR), மாநிலத்தின் மொத்த வாக்காளர்களின் எண்ணிக்கை சுமார் 12% குறைந்துள்ளது குறிப்பிடத்தக்கது. பாஜாகவைப் பொறுத்தவரை, முதற்கட்டத் தேர்தல் என்பது வட வங்காளத்துடன் நேரடித் தொடர்புடையது. கடந்த 2021 தேர்தலில், இந்த 152 இடங்களில் பாஜக 59 இடங்களையும், திரிணாமுல் காங்கிரஸ் (TMC) 93 இடங்களையும் வென்றிருந்தன.
தொடர்ந்து நான்காவது முறையாக ஆட்சியைப் பிடிக்க முயலும் ஆளும் திரிணாமுல் காங்கிரஸிற்கு, வடக்கில் பாஜகவின் எழுச்சியைத் தடுப்பது இந்தத் தேர்தலின் போக்கை தீர்மானிப்பதில் மிக முக்கியமானது.
இரண்டாம் கட்டத் தேர்தல் ஏப்ரல் 29 அன்று நடைபெறும். அன்று கொல்கத்தா மற்றும் அதனைச் சுற்றியுள்ள 142 தொகுதிகளுக்கு வாக்குப்பதிவு நடைபெறும். வாக்குகள் அனைத்தும் மே 4 அன்று எண்ணப்படும்.
கர்நாடகா: ஓட்டு போட வந்ததால் நேர்ந்த சோகம் – பேருந்தும், காரும் நேருக்கு நேர் மோதி விபத்து