குஜராத் மாநிலம் வதோதராவில் ரூ.33 லட்சம் கடன் மற்றும் கார் கடன் தவணைகளைச் செலுத்த முடியாத நிதி நெருக்கடியில் சிக்கிய ஒரே குடும்பத்தைச் சேர்ந்த தாய், மகன், மகள் ஆகிய மூன்று பேர் உயிரிழந்த சம்பவம் பெரும் சோகத்தை ஏற்படுத்தியுள்ளது.
வதோதராவின் மண்ட்வி பகுதியில் உள்ள நரசின்ஜி போல் பகுதியில் வசித்து வந்த ஆர்த்தி சோனி (50), அவரது மகன் நில்காந்த் மற்றும் மகள் ஜென்னி ஆகிய மூவரும் வீட்டில் உயிரிழந்த நிலையில் கண்டெடுக்கப்பட்டனர்.
வீட்டில் கைப்பற்றப்பட்ட 3 கடிதங்கள்
இந்தச் சம்பவம் தொடர்பாக போலீசார் நடத்திய விசாரணையில், வீட்டில் மூன்று கடிதங்கள் கண்டெடுக்கப்பட்டுள்ளன. அவற்றில் குடும்பத்தின் நிதிப் பரிவர்த்தனைகள், கடன் சுமைகள் மற்றும் பொருளாதார நெருக்கடிகள் குறித்து குறிப்பிடப்பட்டுள்ளதாக போலீசார் தெரிவித்துள்ளனர்.
குடும்பத்திற்கு சுமார் ரூ.33 லட்சம் முதல் ரூ.35 லட்சம் வரை வங்கிக் கடன் நிலுவையில் இருந்ததாகவும், இரண்டு கார்களுக்கான தவணைகளையும் செலுத்த வேண்டியிருந்ததாகவும் முதற்கட்ட விசாரணையில் தெரியவந்துள்ளது.
கடன்களைத் திருப்பிச் செலுத்துவதற்காக குடும்பத்திற்குச் சொந்தமான வீட்டை விற்பனை செய்யவும் அவர்கள் முயற்சி செய்துள்ளனர். ஆனால், இந்தப் பிரச்சினைகள் தீராத நிலையில் குடும்பம் கடுமையான பொருளாதார நெருக்கடியை எதிர்கொண்டதாகக் கூறப்படுகிறது.
கணவரை இழந்த தாய்; பாதிக்கப்பட்ட தொழில்
ஆர்த்தி சோனி தனது கணவர் சேதன் சோனி உயிரிழந்த பிறகு, மகன் மற்றும் மகளுடன் இணைந்து ஆயுர்வேத மருத்துவமனையை நடத்தி வந்துள்ளார்.
சுமார் ஒன்றரை முதல் இரண்டு ஆண்டுகளாகச் செயல்பட்டு வந்த இந்த மருத்துவமனை எதிர்பார்த்த அளவிற்கு வருமானம் ஈட்டவில்லை எனக் கூறப்படுகிறது. இதனால் குடும்பத்தின் பொருளாதார நிலை மேலும் பாதிக்கப்பட்டுள்ளது.
மேலும், குடும்பத்தில் ஏற்கெனவே பல நெருங்கிய உறவினர்களை இழந்த துயரமும் இருந்ததாக போலீசார் தெரிவித்துள்ளனர்.
போலீசார் தீவிர விசாரணை
இந்தச் சம்பவம் தொடர்பாக உதவி காவல் ஆணையர் தலைமையிலான போலீசார் விசாரணை மேற்கொண்டு வருகின்றனர். மூன்று கடிதங்கள் மற்றும் குடும்பத்தினரின் செல்போன்கள் தடயவியல் ஆய்வுக்காக அனுப்பப்பட்டுள்ளன.
உயிரிழந்த மூவரின் உடல்களும் பிரேதப் பரிசோதனைக்கு உட்படுத்தப்பட்டுள்ளன. கடன் தொடர்பான விவரங்கள், குடும்பத்தின் தொழில் நிலை மற்றும் உயிரிழப்புகளுக்கான சூழ்நிலைகள் குறித்து போலீசார் தொடர்ந்து விசாரித்து வருகின்றனர்.
ரூ.33 லட்சம் கடன் சுமை, தொழிலில் ஏற்பட்ட நஷ்டம் மற்றும் குடும்பத்தில் ஏற்பட்ட தொடர் இழப்புகள் எனப் பல்வேறு பிரச்சினைகளைச் சந்தித்த குடும்பத்தில் ஒரே நேரத்தில் மூன்று உயிர்கள் பறிபோன சம்பவம் அப்பகுதியில் பெரும் சோகத்தை ஏற்படுத்தியுள்ளது.