எடப்பாடி பழனிசாமி அழைப்பு விடுப்பது திமுக தலைமையிலான கூட்டணியில் குழப்பத்தை உண்டாக்குவதற்கான முயற்சியே தவிர, அதில் வேறு எந்த உண்மையையும் இல்லை என்று விடுதலை சிறுத்தைகள் கட்சி தலைவர் திருமாவளவன் விளக்கம் அளித்துள்ளார்.
மாநிலங்களவை உறுப்பினராக பதவி ஏற்க உள்ள மக்கள் நீதி மையம் கட்சித் தலைவரும், நடிகருமான கமல்ஹாசனை சென்னை ஆழ்வார்பேட்டையில் உள்ள அவரது அலுவலகத்தில், விடுதலை சிறுத்தைகள் கட்சியின் தலைவர் திருமாவளவன் நேரில் சந்தித்து வாழ்த்து தெரிவித்தார். பின்னர் செய்தியாளர்களை சந்தித்த திருமாவளவன் பேசியதாவது:- மக்கள் நீதி மய்யம் தலைவர் கமல்ஹாசனை நேரில் சந்தித்து விடுதலை சிறுத்தைகள் கட்சியின் சார்பில் வாழ்த்துக்களை தெரிவித்தோம். மதச்சார்பற்ற முற்போக்கு கூட்டணியின் அங்கமாக இணைந்து கமல்ஹாசன் இயங்கி வருகிறார். திமுக சார்பில் மாநிலங்களவை உறுப்பினராக தேர்வாகி வரும் 25ஆம் தேதி பதவி ஏற்க உள்ளார். அந்த வகையில் அவரை மகிழ்ச்சியோடு வரவேற்று வாழ்த்தினோம். வரும் ஆகஸ்ட் மாதம் 17ஆம் தேதி எனது பிறந்த நாளையொட்டி சென்னையில் நடைபெறும் விழாவில் பங்கேற்கவும் கமல்ஹாசனுக்கு அழைப்பு விடுத்தோம். கமல்ஹாசன் தமிழுக்காகவும் தமிழ்நாட்டிற்காகவும் குரல் கொடுக்கும் பார்வை உள்ளவர். தேசிய அளவில் இணைந்து செயல்பட வேண்டிய தேவை குறித்தும், கருத்தியல் ரீதியாக உரையாடினோம்.
2026 தேர்தல் நெருக்கடியான தேர்தலாக இருக்கும் என்ற தோற்றம் உருவாக்கப்படுகிறது. ஆனால் இயல்பு அது அல்ல. திமுக கூட்டணி வலுவாக உள்ளது. திமுகவை எதிர்க்கும் ஒரு கூட்டணி முழுமையாக உருவாகவில்லை. அதிமுக – பாஜக இடையே முரண்பாடாக இன்னும் பேசிக்கொண்டிருப்பதை நாம் பார்க்கிறோம். திமுகவை எதிர்க்கும் சக்திகள் சிதறி கிடக்கிறார்கள். எனவே முதல்வர் சொல்வதைப் போல ஓரணியில் தமிழ்நாடு என்கிற அடிப்படையில் திமுக கூட்டணி வலுப்பெற்று வருகிறது. எடப்பாடி பழனிச்சாமி அழைப்பு விடுப்பது திமுக தலைமையிலான கூட்டணியில் குழப்பத்தை உண்டாக்குவதற்கான முயற்சியே தவிர அதில் வேறு எந்த உண்மையையும் இல்லை. நெருக்கடிகளை சந்தித்துதான் ஒரு கட்சி வளர முடியும். அதிமுக ஆட்சி காலத்தில் விடுதலைச் சிறுத்தைகளுக்கு நெருக்கடி இருந்துள்ளது. ஒவ்வொரு காலத்திலும் நெருக்கடிகளை சந்தித்து அங்குலம் அங்குலமாக எங்களை வலுப்படுத்தி வந்துள்ளோம். இன்று அங்கீகாரம் பெற்றுள்ளோம். இதனை பொதுவெளியில் சொல்வதால் அவமானப்படுகிறோம் என்பதைப் போல ஒரு தோற்றத்தை ஏற்படுத்த முயற்சிக்குகிறார்கள். அதில் உண்மை அல்ல.
நாங்கள் எல்லோரும் சேர்ந்து உருவாக்கிய கூட்டணி மத சார்பின்மை கூட்டணி. அதனை எல்லோரும் சேர்ந்து வலுப்பெற செய்வதும், வெற்றி பெற செய்வதும் எல்லோருக்குமான கடமையாகும். எத்தனை தொகுதிகளில் போட்டியிடுகிறோம் என்பதை எங்களுக்கிடையிலான பேச்சுவார்த்தையில் முடிவு செய்யப்படும். இதுவரை தமிழ்நாட்டில் இரு துருவ அரசியலாக தான் இருந்துள்ளது. இனிமேலும் அதுபோல் தான் நடக்கும். மூன்றாவது அணி பெரியளவில் தாக்கத்தை ஏற்படுத்த வாய்ப்பு இல்லை. வருகின்ற தேர்தலும் அப்படித்தான். திமுகவா? அதிமுகவா என்றுதான் மக்கள் இந்த தேர்தலை சந்திப்பார்கள். அதைத் தாண்டி உருவாகின்ற எந்த கூட்டணியும் தமிழ்நாடு அரசியலில் எந்த தாக்கத்தையும் ஏற்படுததாது, இவ்வாறு அவர் தெரிவித்தார்.