“சீர்திருத்தங்கள் பயனளிக்காது… முற்றிலுமாக ரத்து செய்க!” – நாடாளுமன்றத்தில் மதுரை எம்பி முழக்கம்!
நீட் தேர்வு முறையானது முறைகேடுகளின் உறைவிடமாக மாறுவதோடு, உண்மையான பள்ளிக் கல்வியைச் சிதைத்துத் தனியார் பயிற்சி மையங்களை (Coaching Centres) மட்டுமே ஊக்குவிப்பதாக நாடாளுமன்றத்தில் மதுரை மக்களவைத் தொகுதி உறுப்பினர் சு.வெங்கடேசன் கடுமையாகக் குற்றம்சாட்டியுள்ளார். நாடாளுமன்றத்தில் நடைபெற்ற விவாதத்தில் பங்கேற்றுப் பேசிய அவர், நீட் தேர்விலும் புதிய மசோதாக்களிலும் அரைகுறை சீர்திருத்தங்கள் செய்வதால் எந்தப் பயனும் இல்லை என்பதால், அந்தத் தேர்வு முறையை முற்றிலுமாக ரத்து செய்ய வேண்டும் என வலியுறுத்தினார்.
“மாணவர்களின் தன்முனைப்பைக் குலைக்கும் தேர்வு முறை”
நாடாளுமன்றத்தில் தொடர்ந்து உரையாற்றிய சு.வெங்கடேசன், “நீட் தேர்வு முறை மாணவர்களின் கல்வி உரிமையைப் பறிப்பதோடு மட்டுமல்லாமல், அவர்களின் தன்னம்பிக்கையையும் தன்முனைப்பையும் குலைத்துத் தற்கொலைகளுக்குத் தள்ளுகிறது. மத்திய அரசு கொண்டுவரும் இத்தகைய தேர்வு முறைகள் மாநிலங்களின் உரிமைகளைப் பறிக்கின்றன. நீட் தேர்வு என்பது கல்வி கற்பித்தலைக் கொன்றுவிட்டு, கோச்சிங் சென்டர்களைக் கொண்டாடும் ஒரு வணிகமாக மாறிவிட்டது. இதற்குத் கடுமையான தண்டனைகள் அல்லது தற்காலிகச் சீர்திருத்தங்கள் மட்டுமே தீர்வாகிவிடாது.”
எம்பி சு.வெங்கடேசனின் முக்கியக் கோரிக்கைகள்
- நீட் & NEP ரத்து – நீட் தேர்வையும், புதிய தேசிய கல்விக் கொள்கையையும் (NEP) மத்திய அரசு முற்றிலுமாகத் திரும்பப்பெற வேண்டும்.
- கல்வி மாநிலப் பட்டியலுக்கு மாற வேண்டும் – கல்வி மற்றும் மருத்துவத் துறைகள் மத்திய அரசின் கட்டுப்பாட்டில் இருப்பதை மாற்றி, மீண்டும் மாநிலப் பட்டியலின் கீழ் கொண்டு வரப்பட வேண்டும். அப்போதுதான் அந்தந்த மாநிலங்களின் சூழலுக்கு ஏற்ப கல்வி முறைகளை வெற்றிகரமாக நிர்வகிக்க முடியும்.
- மாணவர்கள் மீதான அடக்குமுறைக்கு எதிர்ப்பு – மாணவர்களின் நியாயமான போராட்டங்கள் மீது நடத்தப்பட்ட காவல்துறை அடக்குமுறைகளுக்கு மத்திய அரசு உரிய பதிலளிக்க வேண்டும் என்றும், மாணவர்களின் எதிர்காலத்தைப் பறிக்கும் இந்தச் சீரழிவுக்கு உடனடியாக முற்றுப்புள்ளி வைக்க வேண்டும் என்றும் அவர் தனது உரையில் வலியுறுத்தினார்.