மதுரையில் ரூ.10.25 கோடி மதிப்பீட்டில் நவீன முறையில் புனரமைக்கப்பட்ட காந்தி நினைவு அருங்காட்சியகத்தை முதலமைச்சர் விஜய் இன்று (செப். 28) திறந்து வைத்தார். சுமார் இரண்டரை ஆண்டுகளாக நடைபெற்ற புனரமைப்புப் பணிகள் நிறைவடைந்த நிலையில், அருங்காட்சியகம் மீண்டும் பொதுமக்கள் பார்வைக்காக திறக்கப்பட்டுள்ளது.
காந்தி சிலைக்கு மாலை அணிவித்து மரியாதை
மதுரை அரசு ராஜாஜி மருத்துவமனையில் ‘தாய்மாமன் தங்க மோதிரம்’ திட்டத்தை தொடங்கி வைத்த முதலமைச்சர் விஜய், அங்கிருந்து காந்தி நினைவு அருங்காட்சியகத்திற்கு சாலை வழியாக சென்றார். வழிநெடுகிலும் பொதுமக்கள் அவருக்கு உற்சாக வரவேற்பு அளித்தனர்.
அருங்காட்சியக வளாகத்தை சென்றடைந்த முதலமைச்சர் விஜய், அங்குள்ள மகாத்மா காந்தியின் சிலைக்கு மாலை அணிவித்து மரியாதை செலுத்தினார்.
ரூ.10.25 கோடியில் புனரமைப்பு
மதுரை காந்தி நினைவு அருங்காட்சியகம் சுமார் இரண்டரை ஆண்டுகளாக ரூ.10.25 கோடி மதிப்பீட்டில் புனரமைக்கப்பட்டு வந்தது. கட்டடத்தின் பழமை மாறாமல் பல்வேறு சீரமைப்புப் பணிகள் மேற்கொள்ளப்பட்டதுடன், நவீன டிஜிட்டல் தொழில்நுட்ப வசதிகளும் ஏற்படுத்தப்பட்டுள்ளன.
நவீன டிஜிட்டல் காட்சிகள்
சுதந்திரப் போராட்ட வரலாறு, மகாத்மா காந்தியின் வாழ்க்கை வரலாறு மற்றும் காந்தியின் தமிழகப் பயணம் உள்ளிட்ட தகவல்களை பார்வையாளர்கள் அறிந்து கொள்ளும் வகையில் புதிய காட்சியமைப்புகள் உருவாக்கப்பட்டுள்ளன. தொடுதிரைகள், டிஜிட்டல் புகைப்படங்கள் உள்ளிட்ட நவீன தொழில்நுட்ப வசதிகளும் இடம்பெற்றுள்ளன.
காந்தியின் நினைவுப் பொருட்கள் பார்வைக்கு
அருங்காட்சியகத்தில் பாதுகாக்கப்பட்டு வரும் மகாத்மா காந்தியின் ரத்தம் தோய்ந்த ஆடைகள் உள்ளிட்ட அவர் பயன்படுத்திய பொருட்களையும் முதலமைச்சர் விஜய் பார்வையிட்டார். மேலும், காந்தி தொடர்பான காணொலியையும் அவர் பார்வையிட்டதாக தெரிவிக்கப்பட்டுள்ளது.
மீண்டும் பொதுமக்கள் பார்வைக்கு
புனரமைப்புப் பணிகள் நிறைவடைந்ததைத் தொடர்ந்து, செப்டம்பர் 28 முதல் காந்தி நினைவு அருங்காட்சியகம் முழுமையாக பொதுமக்கள் பார்வைக்காக திறக்கப்பட்டுள்ளது. வரலாற்று முக்கியத்துவம் வாய்ந்த இந்த அருங்காட்சியகத்தில் பழமையான கட்டமைப்புடன் நவீன காட்சித் தொழில்நுட்பங்களும் இணைக்கப்பட்டுள்ளன.
அன்பில் மகேஷ் மீது மத்திய குற்றப்பிரிவு வழக்கு – ரத்து செய்யக்கோரி உயர் நீதிமன்றத்தில் மனு!