தென் மண்டல வானிலை ஆய்வு மைய இயக்குநர் அமுதா அளித்த தகவலின்படி, டிட்வா புயல் நாளை (ஞாயிற்றுக்கிழமை) மாலை வரை வலுவுடன் இருக்கும் என்று தெரிவிக்கப்பட்டுள்ளது.
தென் மண்டல வானிலை ஆய்வு மையத்தின் இயக்குநர் அமுதா , வங்கக்கடலில் நிலைகொண்டுள்ள ‘டிட்வா’ புயல் நாளை (நவ -30) மாலைக்குள் வட தமிழகக் கடற்கரையை நெருங்கும் என்றும், அதன் பின் வலுவிழக்க வாய்ப்புள்ளது என்றும் இன்று தெரிவித்தார்.
செய்தியாளர்களைச் சந்தித்த இயக்குநர் அமுதா அவர்கள் புயலின் நகர்வு மற்றும் அதன் தாக்கம் குறித்துப் பேசுகையில், “டிட்வா புயல் நாளை மாலை வரை புயலாகவே நீடிக்கும். நாளை மாலை வேளையில், சென்னை உள்ளிட்ட வடதமிழ்நாட்டின் கடற்கரைப் பகுதியை சுமார் 25 கிலோமீட்டர் தூரம் வரை புயல் நெருங்கி வரும்,” என்று கூறினார்.
புயல் கடற்கரையை நெருங்கும் நிலையில், வட கடலோர மாவட்டங்களில் பலத்த காற்று வீசக்கூடும் என எச்சரிக்கப்பட்டுள்ளது.
சென்னை, செங்கல்பட்டு, திருவள்ளூர், விழுப்புரம், கடலூர் உள்ளிட்ட வட கடலோர மாவட்டங்களில் நாளை (ஞாயிற்றுக்கிழமை) மணிக்கு 80 கிலோமீட்டர் வேகத்தில் காற்று வீச வாய்ப்புள்ளதாக அவர் தெரிவித்தார்.
மேலும், இந்தப் புயல் நாளை இரவு முதல் வலுவிழக்கத் தொடங்கும் என்றும் வானிலை ஆய்வு மையம் தெரிவித்துள்ளது. பொதுமக்கள் தேவையான முன்னெச்சரிக்கை நடவடிக்கைகளை மேற்கொள்ளுமாறு அறிவுறுத்தப்பட்டுள்ளனர்.