சரிந்து வரும் பிறப்பு விகிதத்தை சரிசெய்யும் அதிரடி முயற்சி! மாணவர்களை ‘காதலிக்க’ச் சொல்லி விடுமுறை அளித்துள்ளது ஒரு சீனப் பல்கலைக்கழகம்
படிப்பு மற்றும் மதிப்பெண்களுக்கு அதிக முக்கியத்துவம் கொடுக்கும் சீனாவில், ஒரு பல்கலைக்கழகம் தனது மாணவர்களைப் பாடப்புத்தகங்களை மூடிவைத்துவிட்டு “பூக்களை ரசிப்பதற்கும், காதலில் விழுவதற்கும்” இந்த விடுமுறையைப் பயன்படுத்துமாறு அறிவுறுத்தியுள்ளது.
னாவின் பிறப்பு விகிதம் குறைந்து வரும் நிலையில், திருமணங்களை ஊக்குவிக்கவும், உள்நாட்டுச் சுற்றுலாவை மேம்படுத்தவும் அந்நாட்டு அரசு எடுத்து வரும் புதிய முயற்சியின் ஒரு பகுதியாக இது பார்க்கப்படுகிறது.
இதன் முக்கிய அம்சங்கள்:
“பூக்களைக் கண்டு காதலை அனுபவியுங்கள்” என்ற கருப்பொருளுடன் (Theme), ஏப்ரல் 1 முதல் 6-ம் தேதி வரை வசந்த கால விடுமுறையைச் சிச்சுவான் தென்மேற்கு விமானப் போக்குவரத்து தொழிற்கல்வி கல்லூரி அறிவித்துள்ளது.
கோடை மற்றும் குளிர்கால விடுமுறைகள் தவிர, வசந்த கால மற்றும் இலையுதிர்கால விடுமுறைகளை அறிமுகப்படுத்தப் போவதாகச் சீன அரசு அறிவித்த இரண்டு வாரங்களுக்குப் பிறகு இந்த அறிவிப்பு வந்துள்ளது.
2025-ஆம் ஆண்டில் சீனாவின் மக்கள் தொகை தொடர்ந்து நான்காவது ஆண்டாகக் குறைந்துள்ளது. பிறப்பு விகிதம் முன்னெப்போதும் இல்லாத அளவுக்குக் குறைந்துள்ளதால், இளைஞர்களைத் திருமணம் மற்றும் குடும்ப வாழ்க்கையை நோக்கி ஈர்க்க அரசு இத்தகைய முயற்சிகளை மேற்கொள்கிறது.
பொருளாதார மற்றும் சமூக நோக்கம்:
சீனா தனது 140 கோடி மக்கள் தொகையினரிடையே பயணங்கள் மற்றும் பொழுதுபோக்கு நடவடிக்கைகளை ஊக்குவிப்பதன் மூலம் உள்நாட்டு நுகர்வை (Domestic Consumption) அதிகரிக்கத் திட்டமிட்டுள்ளது.
“இளைஞர்களுக்குப் பெரிய குடும்பங்களை வளர்ப்பதால் ஏற்படும் சமூக மற்றும் தனிப்பட்ட நன்மைகள் குறித்துக் கற்பிக்கக் கூடுதல் முயற்சிகள் தேவை,” என்று மக்கள் தொகையியல் நிபுணரும், ட்ரிப் (Trip) நிறுவனத்தின் இணை நிறுவனருமான ஜேம்ஸ் லியாங் தெரிவித்துள்ளார்.
மேலும், சீனாவின் சக்திவாய்ந்த தேசிய வளர்ச்சி மற்றும் சீர்திருத்த ஆணையம் (NDRC), குழந்தைகளுக்கான கல்வி, சுகாதாரம், விளையாட்டு மற்றும் பொழுதுபோக்கு போன்ற பொதுச் சேவைகளை மேம்படுத்தி “குழந்தைகளுக்கு உகந்த நகரங்களை” (Child-friendly cities) உருவாக்க அழைப்பு விடுத்துள்ளது.
சிச்சுவான், ஜியாங்சு போன்ற மாகாணங்களும், சுஜோ மற்றும் நஞ்சிங் போன்ற நகரங்களும் ஏற்கனவே ஏப்ரல் அல்லது மே மாத தொடக்கத்தில் வசந்த கால விடுமுறைக்கான திட்டங்களை வெளியிட்டுள்ளன
இந்த மாற்றங்கள் சீன இளைஞர்களின் வாழ்க்கை முறையில் ஒரு நேர்மறையான மாற்றத்தை ஏற்படுத்தும் என்றும், நாட்டின் சரிந்து வரும் பிறப்பு விகிதத்தைச் சமன் செய்ய உதவும் என்றும் அந்நாட்டு அரசு நம்புகிறது.