மேற்கு ஆப்பிரிக்க நாடான செனகல் அருகே அட்லாண்டிக் பெருங்கடலில் புலம்பெயர் பயணிகளை ஏற்றிச் சென்ற படகு கவிழ்ந்து விபத்துக்குள்ளானதில் பலர் உயிரிழந்துள்ளனர். இந்தச் சம்பவம் சர்வதேச அளவில் பெரும் அதிர்ச்சியை ஏற்படுத்தியுள்ளது.
கடலில் கவிழ்ந்த படகு
செனகல் நாட்டின் தலைநகர் டாக்கரில் இருந்து வடக்கே சுமார் 180 கிலோமீட்டர் தொலைவில் உள்ள கெபெமர் (Kébémer) கடற்கரைப் பகுதியில் இருந்து புலம்பெயர் பயணிகள் அடங்கிய படகு ஒன்று ஸ்பெயினின் கேனரி தீவுகளை நோக்கிப் புறப்பட்டுள்ளது.
மேற்கு ஆப்பிரிக்கா வழியாக ஐரோப்பாவுக்குச் செல்லும் நோக்கில் அவர்கள் பயணம் மேற்கொண்டுள்ளனர். இந்நிலையில், அட்லாண்டிக் பெருங்கடலில் படகு கவிழ்ந்து மூழ்கியது.
உயிரிழப்பு எண்ணிக்கை அதிகரிப்பு
இந்த விபத்து குறித்து முதற்கட்டமாகத் தகவல் வெளியிட்ட செனகல் உள்துறை அமைச்சகம், 21 பேர் உயிரிழந்ததாகவும், ஒருவர் உயிருடன் மீட்கப்பட்டதாகவும் தெரிவித்திருந்தது. மேலும், படகில் எத்தனை பேர் பயணம் செய்தனர் என்பது தெரியவில்லை என்றும், மீட்புப் பணிகள் தொடர்ந்து நடைபெற்று வருவதாகவும் கூறியது.
இதற்கிடையே, கூடுதல் உடல்கள் மீட்கப்பட்டதைத் தொடர்ந்து உயிரிழந்தோர் எண்ணிக்கை 34 ஆக உயர்ந்துள்ளதாக செனகல் அரசின் அதிகாரப்பூர்வ செய்தி நிறுவனம் பின்னர் தெரிவித்துள்ளது. இதனால் பலி எண்ணிக்கை மேலும் அதிகரிக்கக்கூடும் என்ற அச்சம் நிலவுகிறது.
ஆபத்தான அட்லாண்டிக் கடல் வழிப் பயணம்
மேற்கு ஆப்பிரிக்காவில் இருந்து ஸ்பெயினின் கேனரி தீவுகளுக்குச் செல்லும் அட்லாண்டிக் கடல் வழி உலகின் மிகவும் ஆபத்தான புலம்பெயர் பயணப் பாதைகளில் ஒன்றாகக் கருதப்படுகிறது.
பொருளாதார நெருக்கடி மற்றும் வேலைவாய்ப்பின்மை உள்ளிட்ட காரணங்களால் பலர் சிறிய படகுகளில் ஆபத்தான கடல் பயணத்தை மேற்கொள்கின்றனர். இத்தகைய பயணங்களில் கடந்த காலங்களிலும் ஆயிரக்கணக்கானோர் உயிரிழந்துள்ளனர்.
புலம்பெயர் உரிமைகளுக்காகச் செயல்படும் ‘வாக்கிங் பார்டர்ஸ்’ அமைப்பின் தகவலின்படி, 2026-ம் ஆண்டின் முதல் ஐந்து மாதங்களில் மட்டும் மேற்கு ஆப்பிரிக்காவில் இருந்து கேனரி தீவுகளை நோக்கிய கடல் வழிப் பயணத்தில் 635 பேர் உயிரிழந்துள்ளனர்.
செனகல் கடற்கரையில் நிகழ்ந்துள்ள இந்தப் படகு விபத்து, ஆபத்தான கடல் வழிப் புலம்பெயர்வு பயணங்களால் ஏற்படும் உயிரிழப்புகள் குறித்த கவலையை மீண்டும் அதிகரித்துள்ளது.
ஹாங்காங் தீவைச் சுற்றி 45 கி.மீ. நீந்தி சாதனை! 21 வயது இளைஞர் படைத்த அபார சாதனை