சென்னையில் ஆபரணத் தங்கம் விலை மீண்டும் சவரனுக்கு ரூ. 1,960 உயர்ந்து ஒரு சவரன் ரூ.95 ஆயிரத்தை நெருங்குகிறது.
தங்கம் விலை அவ்வப்போது ஏற்ற இறக்கத்துடன் இருப்பது வாடிக்கை தான் என்றாலும், அண்மைக்காலமாக கணிசமாக ஏற்றம் கண்டுள்ளது என்பதே நிதர்சனம். அதிலும் கடந்த சில நாட்களாக காலை, மாலை இருவேளைகளிலும் அதிரடியாக தங்கம் விலை உயர்ந்த வண்ணம் உள்ளது. கடந்த வாரம் அதிரடியாக விலை அதிகரித்து ஒரு சவரன் ரூ.91 ஆயிரத்தை தாண்டி புதிய உச்சத்தை தொட்டு அதிர்ச்சி கொடுத்த நிலையில், அதன்பிறகு மேலும் ஏற்றமும், இறக்கமுமாக இருந்து வருகிறது,
அதன் படி நேற்று காலை சவரனுக்கு 200 ரூபாய் உயந்த ஆபரணத்தங்கத்தின் விலை, மாலை மேலும் ரூ.440 உயர்ந்து சென்னையில் 22 கேரட் ஆபரணத் தங்கத்தின் விலை ஒரு சவரன் ரூ. 92,640க்கும், கிராமுக்கு ரூ.55 உயர்ந்து ஒரு கிராம் ரூ.11,580க்கும் விற்பனை செய்யப்பட்டது. அதேபோல் சில்லறை விற்பனையில் வெள்ளியின் விலையும் கிராமுக்கு ரூ.2 உயர்ந்து ஒரு கிராம் ரூ.197க்கு விற்பனையானது.
இந்நிலையில் இன்று அதிரடியாக ஒரே நாளில் தங்கம் சவரனுக்கு ரூ.1960 உயர்ந்து ஒரு சவரன் ரூ.95 ஆயிரத்தை நெருங்குகிறது. சென்னையில் இன்று 22 கேரட் ஆபரணத் தங்கம் சவரன் ரூ. 94,600க்கும், கிராம் ரூ. 11,825க்கும் விற்பனை செய்யப்படுகிறது. தங்கத்தைப் போலவே வெள்ளி விலையில் வரலாறு காணாத புதிய உச்சத்தை தொட்டுள்ளது. இன்று ஒரே நாளில் கிராமுக்கு ரூ. 9 உயர்ந்து, சில்லறை விற்பனையில் ஒரு கிராம் வெள்ளி ரூ.206க்கு விற்பனையாகிறது. இந்த அதிரடி விலையேற்றம் நடுத்தர வர்க்கத்தினரை கலங்கச் செய்யும் நிலையில், தங்கம் மற்றும் வெள்ளி விலை மேலும் அதிகரிக்கும் என பொருளாதார நிபுனர்கள் கூறுகின்றனர்.