தலைவர் 173 படத்தின் அதிகாரப்பூர்வ அறிவிப்பை ரசிகர்கள் கொண்டாடி வருகின்றனர்.
சூப்பர் ஸ்டார் என்று கோடான கோடி ரசிகர்களால் கொண்டாடப்படும் ரஜினி தற்போது ‘ஜெயிலர் 2’ படத்தில் கவனம் செலுத்தி வருகிறார். இந்த படம் அடுத்த ஆண்டு ஜூன் மாதம் 12ஆம் தேதி திரைக்கு வரும் என சொல்லப்படுகிறது. இதைத்தொடர்ந்து ரஜினி, சுந்தர்.சி இயக்கத்தில் புதிய படம் ஒன்றில் நடிக்க உள்ளார். ‘அருணாச்சலம்’ படத்திற்குப் பிறகு மீண்டும் இணையும் ரஜினி – சுந்தர்.சி கூட்டணியின் மீதான எதிர்பார்ப்பு மிகப்பெரிய அளவில் இருந்து வருகிறது. தற்காலிகமாக தலைவர் 173 என்று தலைப்பு வைக்கப்பட்டிருக்கும் இந்த படத்தை கமல்ஹாசனின் ராஜ் கமல் ஃபிலிம்ஸ் இன்டர்நேஷனல் நிறுவனம் தயாரிக்கிறது. 
அதன்படி நேற்று (நவம்பர் 5) இந்த படம் தொடர்பான அதிகாரப்பூர்வ அறிவிப்பை படக்குழு வெளியிட்டு ரசிகர்களை இன்ப அதிர்ச்சியில் ஆழ்த்தியுள்ளது. அதுமட்டுமில்லாமல் இந்த படம் 2027 பொங்கலுக்கு வெளியாகும் எனவும் தெரிவிக்கப்பட்டுள்ளது. இனிவரும் நாட்களில் படப்பிடிப்பு தொடர்பான மற்ற தகவல்களும், பிற நடிகர்- நடிகைகள் குறித்த தகவலும் வெளியாகும் என்று எதிர்பார்க்கப்படுகிறது.
இந்நிலையில் இந்த படத்தில் கமல்ஹாசன் கேமியோ ரோலில் நடிக்க வாய்ப்பு இருப்பதாக புதிய தகவல்கள் தெரிவிக்கின்றன. ஆனால் இந்த தகவல் எந்த அளவிற்கு உண்மை என்பது தெரியவில்லை. இருப்பினும் ஏற்கனவே கமல்ஹாசன், ரஜினியின் ‘தில்லு முல்லு’ திரைப்படத்தில் கேமியோ ரோலில் நடித்திருந்த நிலையில், ‘தலைவர் 173’ படத்திலும் கமல், கேமியோ ரோலில் வந்தால் நன்றாக இருக்கும் என்று ரசிகர்கள் தங்களின் கருத்துக்களை கமெண்ட் செய்து வருகின்றனர்.