ஈரானுக்கு எதிரான மோதலில், அமெரிக்கா ஒரு 64 கட்டப் பலகையில் வெற்றியைத் தேடிக்கொண்டிருக்கும்போது, சீனா 361 புள்ளிகள் கொண்ட உலகப் பலகையில் அமெரிக்காவைச் சுற்றி வளைத்துவிட்டது.
வாஷிங்டன்: ஈரானுக்கு எதிரான மோதலில் தான் ஒரு சிறந்த சதுரங்க வீரரைப் போல காய் நகர்த்தி வெற்றி பெறுவதாக டொனால்ட் டிரம்ப் நம்புகிறார். ஆனால், உண்மையில் அவர் விளையாடும் ஆட்டமே தவறு என்கிறார்கள் அரசியல் விமர்சகர்கள். அமெரிக்கா ஒரு குறுகிய வட்டத்திற்குள் ‘செஸ்’ (Chess) விளையாடிக்கொண்டிருக்கும்போது, சீனா உலக வரைபடம் முழுவதும் ‘கோ’ (Go) எனும் ஆதிக்க ஆட்டத்தை அமைதியாக விளையாடி வருகிறது.
சதுரங்கம் vs கோ: ஆட்டத்தின் தத்துவம்
இந்தியாவில் உருவான சதுரங்கம் (Chess), அதிகார படிநிலையை அடிப்படையாகக் கொண்டது. இதில் ராஜா, ராணி என அந்தஸ்துகள் உண்டு. எதிராளியின் ‘ராஜாவை’ வீழ்த்துவது மட்டுமே இந்த ஆட்டத்தின் ஒரே இலக்கு. ராஜா வீழ்ந்தால் ஆட்டம் முடிந்தது; அதுவரை இழந்த மற்ற காய்களோ அல்லது பிடித்த இடங்களோ கணக்கில் வராது. டிரம்ப் இதையே ஈரானிடம் செய்கிறார்—அதிகாரத்தை மிரட்டுவது, தலைவர்களைச் சிறுமைப்படுத்துவது, ஒரே அடியில் வீழ்த்த நினைப்பது.
ஆனால், சீனாவோ ஆசியாவின் பாரம்பரிய விளையாட்டான ‘கோ’ (Go) ஆட்டத்தை விளையாடுகிறது. இதில் 64 கட்டங்களுக்குப் பதில் 361 புள்ளிகள் உள்ளன. அனைத்து காய்களும் (கற்கள்) சமமானவை; இங்கே ராஜா என்ற ஒரு இலக்கு கிடையாது. எதிராளியை விட அதிக நிலப்பரப்பை (Territory) யார் சுற்றி வளைக்கிறார்கள் என்பதே வெற்றி. இது ஆவேசமான ஆட்டமல்ல; மிகவும் பொறுமையான, நிதானமான ஆக்கிரமிப்பு ஆட்டம்.
சீனா நகர்த்திய ‘கற்கள்’
கடந்த 20 ஆண்டுகளாக, டிரம்ப் ஈரானைக் குறிவைத்து சதுரங்கம் விளையாடிக்கொண்டிருந்தபோது, சீனா உலகம் முழுவதும் தனது ‘கற்களை’ (ஆதிக்கப் புள்ளிகளை) அமைதியாக நட்டுள்ளது:
பொருளாதாரம்: அமெரிக்காவின் ராணுவத் தளவாடங்களுக்குத் தேவையான பாகங்களைத் தயாரிக்கும் ‘தவிர்க்க முடியாத’ தொழிற்சாலையாக சீனா மாறியுள்ளது. டாலரின் ஆதிக்கத்தைக் குறைக்க மாற்று வர்த்தக முறைகளை உருவாக்கியுள்ளது.
ராஜதந்திரம்: அமெரிக்காவால் முடியாத ஈரான் – சவுதி அரேபியா இடையிலான சமாதானத்தைச் சீனா சாத்தியமாக்கியது. இது அரபு நாடுகளில் சீனாவின் செல்வாக்கை உறுதிப்படுத்தியது.
தொழில்நுட்பம்: ஹுவாய் (Huawei) நிறுவனம் மூலம் 170-க்கும் மேற்பட்ட நாடுகளில் தனது தகவல் தொழில்நுட்ப வலையை சீனா விரித்துள்ளது.
ஈரான்: ஒரு திசைதிருப்பும் கருவி?
இந்த ‘கோ’ ஆட்டத்தில் ஈரான் என்பது சீனாவிற்கு ஒரு முக்கியமான காய். அமெரிக்காவின் ராணுவ பலத்தையும், கவனத்தையும் மத்திய கிழக்கில் முடக்கி வைப்பதன் மூலம், சீனா தான் உண்மையாகக் குறிவைக்கும் தைவான் பகுதியைச் சுற்றி வளைக்க அமெரிக்காவிற்குத் தெரியாமலேயே வழி தேடிக்கொள்கிறது.
அமெரிக்காவின் பலவீனம்
சதுரங்க வீரரின் பலவீனம் என்னவென்றால், அவர் ஒரு குறிப்பிட்ட இலக்கை (ராஜாவை) மட்டுமே பார்ப்பார். டிரம்ப் ஈரானின் அணுசக்தி நிலையங்களை அழிக்கலாம், தலைவர்களை வீழ்த்தலாம். ஆனால், அது சீனாவின் ‘பெல்ட் அண்ட் ரோடு’ திட்டத்தையோ அல்லது உலகளாவிய பொருளாதார ஆதிக்கத்தையோ தடுக்கப்போவதில்லை.
மாறாக, டிரம்ப் எடுக்கும் ஒவ்வொரு ஆக்ரோஷமான நடவடிக்கையும் அமெரிக்காவின் நட்பு நாடுகளை அதனிடமிருந்து பிரித்து, சீனாவின் பக்கம் தள்ளுகிறது.
தெரியாமல் தோற்கும் ஆட்டம்
“போரிடாமலேயே எதிரியைப் பணிய வைப்பதே போர்க்கலையின் உச்சம்” என்றார் சீனப் போர் வியூக நிபுணர் சுன் சூ (Sun Tzu). சீனா இன்று அதையே செய்கிறது. அமெரிக்கா ஒரு 64 கட்டப் பலகையில் வெற்றியைத் தேடிக்கொண்டிருக்கும்போது, சீனா 361 புள்ளிகள் கொண்ட உலகப் பலகையில் அமெரிக்காவைச் சுற்றி வளைத்துவிட்டது.
விளையாட்டில் தவறான நகர்வு செய்பவர் தோற்பதில்லை; எந்த விளையாட்டு விளையாடப்படுகிறது என்றே தெரியாமல் இருப்பவர்தான் பேரழிவைச் சந்திக்கிறார். அந்த நிலையில் தான் இன்று அமெரிக்கா இருக்கிறது.
டிரம்ப் ஒரு மடிநாய், நெதன்யாகு அவரை ஆட்டிப்படைக்கிறார்’ – வரலாற்று அறிஞர் அவி ஸ்லைம் அதிரடி!