கடந்த 2023ஆம் ஆண்டு புழக்கத்தில் இருந்து திரும்பப் பெறப்பட்ட ரூ.2,000 நோட்டுகளைப் பொதுமக்கள் தற்போதும் மாற்றிக் கொள்ளலாம் என்று இந்திய ரிசர்வ் வங்கி (RBI) மீண்டும் தெளிவுபடுத்தியுள்ளது. இந்த நோட்டுகள் இன்னும் செல்லுபடியாகும் (Legal Tender) நிலையிலேயே நீடிப்பதாகவும் ஆர்பிஐ தெரிவித்துள்ளது.
98% நோட்டுகள் திரும்பின
கடந்த 2023 மே 19 அன்று ரிசர்வ் வங்கி ரூ.2,000 நோட்டுகளைத் திரும்பப் பெறுவதாக அறிவித்தபோது, சந்தையில் மொத்தம் ரூ.3.56 லட்சம் கோடி மதிப்பிலான நோட்டுகள் புழக்கத்தில் இருந்தன. ரிசர்வ் வங்கியின் தற்போதைய புள்ளிவிவரங்களின்படி, இதுவரை 98.47 சதவீத நோட்டுகள் (சுமார் ரூ.3.50 லட்சம் கோடி) வங்கி அமைப்புக்கு வெற்றிகரமாகத் திரும்பிவிட்டன. தற்போது பொதுமக்களிடம் வெறும் ரூ.5,451 கோடி மதிப்பிலான நோட்டுகள் மட்டுமே எஞ்சியுள்ளதாக மதிப்பிடப்பட்டுள்ளது.
தற்போது எங்கு, எப்படி மாற்றுவது?
பொது வணிக வங்கிகளின் கிளைகளில் இந்த நோட்டுகளை மாற்றுவதற்கான காலக்கெடு கடந்த 2023 அக்டோபர் 7ஆம் தேதியுடன் முடிவடைந்துவிட்டது. எனவே, சாதாரண வங்கிப் பொதுக் கிளைகளில் தற்போது இதனை மாற்ற முடியாது. ஆனால், பொதுமக்கள் தங்களின் எஞ்சிய நோட்டுகளை மாற்ற இரண்டு எளிய வழிகளைப் பயன்படுத்தலாம் என தெரிவிக்கப்பட்டுள்ளது.
ஆர்பிஐ அலுவலகங்கள்: இந்தியாவில் உள்ள 19 ரிசர்வ் வங்கி மண்டல அலுவலகங்களுக்கு (RBI Issue Offices) நேரடியாகச் சென்று ஒரே நேரத்தில் ரூ.20,000 வரை ரொக்கமாக மாற்றிக் கொள்ளலாம். அல்லது எவ்வித உச்சவரம்பும் இன்றி தங்களின் சொந்த வங்கிக் கணக்கில் நேரடியாக டெபாசிட் செய்து கொள்ளலாம்.
இந்திய அஞ்சல் துறை (India Post): ரிசர்வ் வங்கி அலுவலகங்களுக்கு நேரடியாகச் செல்ல முடியாதவர்கள், தங்களுக்கு அருகில் உள்ள எந்தவொரு தபால் அலுவலகங்கள் மூலமாகவும் தங்களது ரூ.2,000 நோட்டுகளை ரிசர்வ் வங்கியின் மண்டல அலுவலக முகவரிக்குக் காப்பீடு செய்யப்பட்ட அஞ்சலாக (Insured Post) அனுப்பி வைக்கலாம். அந்த நோட்டுகள் சரிபார்க்கப்பட்டு, அவர்களின் வங்கிக் கணக்கில் நேரடியாகப் பணம் வரவு வைக்கப்படும்.
தேவைப்படும் ஆவணங்கள்
இந்த பண மாற்று மற்றும் டெபாசிட் வசதி முற்றிலும் இலவசமானது. இதற்காக பொதுமக்கள் எந்தவித கட்டணங்களும் செலுத்த தேவையில்லை. எனினும், முறைகேடுகளைத் தவிர்க்க வாடிக்கையாளர்கள் தங்களின் ஆதார் கார்டு, பான் கார்டு (PAN Card), ஓட்டுநர் உரிமம் அல்லது வாக்காளர் அடையாள அட்டை போன்ற ஏதேனும் ஒரு அரசு அங்கீகாரம் பெற்ற அடையாளச் சான்றின் நகலையும், வங்கிக் கணக்கு விவரங்களையும் (IFSC Code மற்றும் கணக்கு எண்) சமர்ப்பிக்க வேண்டியது அவசியம் என தெரிவிக்கப்பட்டுள்ளது.
மேலும், இன்னும் உங்களிடம் ரூ.2,000 நோட்டுகள் இருந்தால் பதற்றமடையத் தேவையில்லை என்றும், ரிசர்வ் வங்கி வழங்கியுள்ள வழிமுறைகளைப் பின்பற்றிப் பாதுகாப்பாக மாற்றிக் கொள்ளலாம் என்றும் அதிகாரிகள் தரப்பில் தெரிவிக்கப்பட்டுள்ளது.