அட்லாண்டிக் பெருங்கடலில் இதுவரை பதிவு செய்யப்பட்ட மிகப்பெரிய ஆண் பெரும் வெள்ளைச் சுறாவான (Great White Shark) “கான்டெண்டர்” (Contender), அமெரிக்காவின் வட கரோலினா (North Carolina) மாநிலத்தின் ‘அவுட்டர் பேங்க்ஸ்’ கடலோரப் பகுதியில் மீண்டும் கண்டறியப்பட்டுள்ளது.
14 அடி நீளம், 7,000 மைல் பயணம்!
சுமார் 14 அடி (4.2 மீட்டர்) நீளமும், 770 கிலோவிற்கும் (1,700 பவுண்டுகள்) அதிக எடையும் கொண்ட இந்த பிரம்மாண்ட சுறா மீனுக்கு, 2025 ஜனவரியில் ‘ஓசியார்ச்’ (OCEARCH) என்ற உலகப் புகழ்பெற்ற கடல்சார் ஆராய்ச்சி அமைப்பு செயற்கைக்கோள் கண்காணிப்பு சாதனத்தைப் பொருத்தியது.
அதன்பின்னர், இந்த சுறா கடல் வழியே சுமார் 7,000 மைல்களுக்கும் (11,000 கி.மீ.) மேல் கடந்து பயணம் செய்துள்ளது. இச்சுறாவின் முதுகுத் துடுப்பு (Dorsal Fin) நீரின் மேற்பரப்பிற்கு வரும்போதெல்லாம், அதிலுள்ள கருவி செயற்கைக்கோளுக்கு குறுகிய “பிங்” (Ping) சிக்னலை அனுப்பி, அதன் துல்லியமான இருப்பிடத்தை ஆராய்ச்சி மையத்திற்குத் தெரிவித்து வருகிறது.
பருவகால இடம்பெயர்வு:
கோடைகாலத்தில் அதிகளவில் உணவு கிடைக்கக்கூடிய ‘கேப் காட்’ (Cape Cod) மற்றும் அட்லாண்டிக் கனடா போன்ற குளிர்ந்த வடக்கு கடல் பகுதிகளை நோக்கி, ஆயிரக்கணக்கான ஆண்டுகளாக இவ்வகைச் சுறாக்கள் பருவகால இடம்பெயர்வு மேற்கொண்டு வருகின்றன. தற்போது கான்டெண்டரின் சிக்னல் கிடைத்துள்ளது, இதன் வழக்கமான பயணப் பாதையை மீண்டும் உறுதிப்படுத்தியுள்ளது.
விஞ்ஞானிகள் விளக்கம்:
கடற்கரைகளுக்கு அருகில் இவ்வளவு பெரிய சுறாக்கள் நடமாடுவது மக்களிடையே அச்சத்தை ஏற்படுத்தினாலும், மனிதர்கள் மீதான சுறாத் தாக்குதல்கள் மிக மிக அரிதானவை என்று கடலியல் விஞ்ஞானிகள் தெளிவுபடுத்தியுள்ளனர்.
மாறாக, “கான்டெண்டர்” போன்ற உச்ச வேட்டையாடிகளின் (Apex Predators) பயணப் பாதையைக் கண்காணிப்பது கடல் சூழலியல் சமநிலையைப் பாதுகாக்கவும், அவற்றின் இயற்கை நடத்தைப் புரிந்துகொள்ளவும் பெரிதும் உதவுவதாக அவர்கள் தெரிவித்துள்ளனர்.