பரந்தூருக்கு மாற்று இடம் கேட்கவில்லை: திமுக எம்.பி கேள்விக்கும் தவெக அரசுக்கும் ஒன்றிய அரசு பதில்!

சென்னை பரந்தூர் பசுமை வழி விமான நிலையத் திட்டத்திற்கு மாற்றாக வேறு இடம் குறித்து தமிழ்நாடு அரசு இதுவரை எந்தவிதக் கோரிக்கையும் வைக்கவில்லை என்று ஒன்றிய சிவில் விமானப் போக்குவரத்து அமைச்சகம் அதிகாரப்பூர்வமாகத் தெரிவித்துள்ளது.

திமுக மாநிலங்களவை உறுப்பினர் பி. வில்சன் எழுப்பிய கேள்விகளுக்கு சிவில் விமானப் போக்குவரத்து இணை அமைச்சர் முரளிதர் மோஹோல் அளித்த எழுத்துப்பூர்வ பதிலின் விவரம் வருமாறு:

பரந்தூர் திட்டம் – தற்போதைய நிலை:

பரந்தூரில் சர்வதேச பசுமை வழி விமான நிலையம் அமைப்பதற்காக தமிழ்நாடு தொழில் வளர்ச்சி நிறுவனத்திற்கு (TIDCO) கடந்த 2025 ஏப்ரல் 7-ஆம் தேதி ‘கொள்கை அளவிலான’ ஒப்புதல் (In-Principle approval) வழங்கப்பட்டது. இதன் முதற்கட்டப் (Phase-1) பணிகளுக்கான திட்டச் செலவு தோராயமாக ரூ. 10,500 கோடி என மதிப்பிடப்பட்டுள்ளது.

நிலம் கையகப்படுத்துதல், மறுவாழ்வு மற்றும் மறுசீரமைப்புச் சட்டம், சுற்றுச்சூழல் அனுமதிகளைப் பெறுவது உள்ளிட்ட அனைத்துப் பொறுப்புகளும் மாநில அரசு மற்றும் திட்ட உருவாக்குநரையே சாரும் என்றும், அனுமதிகள் மற்றும் நிதி நிருவாக முடிவுகளைப் பொறுத்தே திட்ட நிறைவுக்கான காலக்கெடு நிர்ணயிக்கப்படும் என்றும் தெரிவிக்கப்பட்டுள்ளது.

மாற்று இடம் குறித்து கோரிக்கை வரவில்லை:

பரந்தூருக்குப் பதிலாக வேறு இடத்திற்கு விமான நிலையத்தை மாற்றக் கோரி புதிய தமிழ்நாடு அரசு (தவெக அரசு) ஒன்றிய அரசிடம் ஏதேனும் கோரிக்கை விடுத்துள்ளதா என்ற கேள்விக்கு, “இல்லை” என்று இணை அமைச்சர் திட்டவட்டமாகப் பதிலளித்துள்ளார்.

பரந்தூர் பணிகள் நிறுத்தப்பட்டு, மாற்று இடம் தேர்வு செய்யப்படும் எனத் தெரிவிக்கப்பட்டு வந்த நிலையில், மாற்று இடம் தொடர்பாக ஒன்றிய அரசிடம் தவெக அரசு எந்தவொரு கோரிக்கையும் இதுவரை வைக்கவில்லை என்ற தகவல் தற்போது வெளியாகியுள்ளது.

தமிழக விமான நிலையங்களின் விரிவாக்கப் பணிகள்:

தமிழகத்தில் உள்ள முக்கிய விமான நிலையங்களின் நவீனமயமாக்கல் மற்றும் விரிவாக்கப் பணிகள் குறித்த விவரங்களையும் ஒன்றிய அரசு வெளியிட்டுள்ளது:

பரந்தூர் விமான நிலையத் திட்டத்தில் மாற்று இடம் கோரப்படவில்லை என்ற ஒன்றிய அரசின் பதில், தமிழக அரசியலிலும் அரசு வட்டாரத்திலும் மீண்டும் விவாதத்தைக் கிளப்பியுள்ளது.