“காரணம் இதுதான்!” ஊடகங்கள் தவிர்க்கப்பட்டது ஏன்? சைலண்டாக விளக்கமளித்த செய்தித் தொடர்பு துறை!

சென்னையில் நடைபெற்ற ‘வெற்றி தமிழ்நாடு முதலீட்டாளர்கள் மாநாடு 2026’ நிகழ்வில் ஊடகங்கள் அனுமதிக்கப்படாதது, அரசியல் மற்றும் பத்திரிகையாளர் வட்டாரங்களில் பெரும் அதிர்வலைகளையும் விவாதத்தையும் ஏற்படுத்தியுள்ளது.

தமிழ்நாட்டின் தொழில் வளர்ச்சி மற்றும் வேலைவாய்ப்புகளைப் பெருக்கும் நோக்கில், சென்னையில் உள்ள தனியார் உணவகம் ஒன்றில் ‘வெற்றி தமிழ்நாடு முதலீட்டாளர்கள் மாநாடு 2026’ நடைபெற்றது. முதலமைச்சர் விஜய், தொழில்துறை அமைச்சர் கீர்த்தனா மற்றும் உயர் அரசு அதிகாரிகள் பலர் பங்கேற்ற இந்த முக்கிய நிகழ்வில், ஊடகங்களுக்கு முறையான அழைப்பு விடுக்கப்படவில்லை என்ற குற்றச்சாட்டு எழுந்துள்ளது. பொதுவாக, மாநில அரசின் முக்கிய நிகழ்வுகள் மற்றும் மாநாடுகள் நடைபெறும் போது ஊடக நிறுவனங்களுக்கு முன்கூட்டியே செய்தித்துறை சார்பில் அழைப்பு விடுக்கப்பட்டு, நேரடிச் செய்திச் சேகரிப்பிற்கு அனுமதி வழங்கப்படுவது மரபாகும்.

செய்தித் தொடர்புத் துறையின் விளக்கம்
ஊடகங்கள் புறக்கணிக்கப்பட்டது தொடர்பான விமர்சனங்கள் எழுந்த நிலையில், செய்தித் தொடர்புத் துறை அதிகாரிகள் விளக்கம் அளித்துள்ளனர். அதில், “நிகழ்ச்சி நடைபெற்ற அரங்கு சிறியதாக இருந்த காரணத்தாலும், முதலமைச்சரின் பாதுகாப்பைக் கருத்தில் கொண்டும், அங்கு செய்தியாளர்களுக்குத் தனி இடவசதி ஒதுக்குவதில் சிரமம் நிலவியது. எனவேதான் நேரடி அனுமதி வழங்கப்படவில்லை. இருப்பினும், நிகழ்வு தொடர்பான செய்திக் குறிப்புகள் மற்றும் வீடியோ காட்சிகள் உடனடியாக ஊடகங்களுக்குச் தடையின்றி வழங்கப்பட்டன” எனக் குறிப்பிட்டுள்ளனர்.

எழும் கடுமையான விமர்சனங்கள்
செய்தித் துறையின் விளக்கத்தைத் தாண்டி, ஜனநாயகத்தின் நான்காவது தூணாகக் கருதப்படும் ஊடகங்களை அரசு சார்ந்த நிகழ்வில் புறக்கணிப்பது ஜனநாயக மரபுகளுக்கு எதிரானது எனப் பல்வேறு தரப்பிலிருந்தும் கண்டனங்கள் வலுத்து வருகின்றன.

• அரசின் மெத்தனப் போக்கு: பொதுமக்களுக்கான அரசுத் திட்டங்கள் மற்றும் தகவல்கள் வெளிப்படையாகச் சென்றடைவதை இத்தகைய நடவடிக்கைகள் தடுப்பதாகச் சமூக ஆர்வலர்கள் சுட்டிக்காட்டுகின்றனர்.
• தொடர் புறக்கணிப்புப் புகார்: அண்மைக் காலமாகவே பல முக்கிய அரசு நிகழ்வுகளில் செய்தியாளர்கள் அனுமதிக்கப்படாமல் தவிர்க்கப்பட்டு வருவதாகப் பத்திரிகையாளர் அமைப்புகள் குற்றம்சாட்டுகின்றன.
• கட்சி – அரசு நிகழ்வுகளுக்கான வேறுபாடு: அரசியல் கட்சி நிகழ்ச்சிகளில் ஏற்பாட்டாளர்கள் எடுக்கும் முடிவுகளை ஏற்றுக்கொள்ள முடியும்; ஆனால், மக்கள் வரிப்பணத்தில் நடைபெறும் அரசு நிகழ்ச்சிகளில் ஊடகங்களைத் தவிர்ப்பது ஏற்புடையதல்ல என்ற விமர்சனம் வலுத்துள்ளது.

அரசாங்கத்தின் செயல்பாடுகளை மக்களிடம் கொண்டு சேர்க்கும் முதன்மைப் பாலமாக விளங்கும் ஊடகங்களை, முதலீட்டாளர்கள் மாநாடு போன்ற முக்கிய நிகழ்வுகளில் புறக்கணிப்பதைத் தவிர்க்க வேண்டும் என்பதே ஊடகவியலாளர்களின் கோரிக்கையாக உள்ளது.

கோவை கல்லூரி மாணவன் படுகொலை: பாதிக்கப்பட்ட குடும்பத்திற்கு நேரில் ஆறுதல் கூறி ரூ.2 லட்சம் நிதியுதவி வழங்கிய கள்ளக்குறிச்சி வடக்கு மாவட்டச் செயலாளர் உதயசூரியன்!