“இது ஏழைகளின் வெற்றி!” — தமிழக சட்டமன்றத்தில் தவெக எம்.எல்.ஏ. ஆதவ் அர்ஜுனாவின் ஆவேச பேச்சு!

தமிழக சட்டமன்றக் கூட்டத்தொடரில் தமிழக வெற்றி கழகத்தின் (TVK) உறுப்பினர் ஆதவ் அர்ஜுனா ஆற்றிய உரை, அரசியல் அரங்கில் பெரும் அதிர்வலைகளை ஏற்படுத்தியுள்ளது. 2026 தேர்தல் வெற்றி என்பது வெறும் சாதாரண வெற்றியல்ல என்றும், அது 41 கட்சிகளை எதிர்த்து நின்று சாமானிய மக்கள், இளைஞர்கள் மற்றும் பெண்கள் பெற்றுத்தந்த வரலாற்றுப் புரட்சி என்றும் அவர் அவையில் முழங்கினார்.

“நாங்கள் பண்ணையாரின் பிள்ளைகள் அல்ல!”
சட்டமன்றத்தில் காரசாரமாக உரையாற்றிய ஆதவ் அர்ஜுனா, “இங்கு சட்டமன்ற உறுப்பினராகப் பொறுப்பேற்றுள்ளவர்கள் சாமானியர்கள். நாங்கள் பண்ணையாரின் பிள்ளைகளோ அல்லது மன்னராட்சியின் வழிவந்தவர்களோ அல்ல. எங்கள் சாதியும் மதமும் உங்களுக்குத் தெரியாமல் இருக்கலாம், ஆனால் பெண்களுக்கும், இளைஞர்களுக்கும், ஏழைகளுக்கும் எங்கள் முகம் தெரியும். அதனால்தான் 41 கட்சிகள் எதிர்த்த நிலையிலும் எங்களால் வெற்றி பெற முடிந்தது” என்று ஆவேசமாகத் தெரிவித்தார்.

பணநாயகத்திற்கு முற்றுப்புள்ளி
தேர்தலில் பணம் கொடுத்து வாக்கு சேகரிக்கும் கலாச்சாரத்திற்கு முற்றுப்புள்ளி வைத்து, மக்களின் ஆதரவோடு வெற்றி பெற்ற ஒரே இயக்கம் தவெகதான் என்று பெருமிதம் தெரிவித்தார். “தேர்தலுக்கு முன்பாகவே எங்கள் தலைவர் விஜய், ஒரு ரூபாய் கூட முறைகேடாகச் செலவு செய்யாமல் நேர்மையான முறையில் தேர்தலைச் சந்திக்க வேண்டும் எனக் கட்டளையிட்டார். அந்த நேர்மைக்கே மக்கள் வெற்றியைப் பரிசாக அளித்துள்ளனர்” என அவர் சுட்டிக்காட்டினார்.

சமூக நீதிக்கான வரலாற்றுச் சாதனை
தங்களின் வெற்றி அண்ணா, பெரியார் மற்றும் அம்பேத்கர் கண்ட சமூக நீதிக் கனவை நனவாக்கியுள்ளதாக அவர் குறிப்பிட்டார். “சமூக நீதி கணக்கெடுப்பு மற்றும் சிறுபான்மையினருக்கான நலத்திட்டங்கள் மூலமாக, கடந்த 60 ஆண்டுகாலக் கனவை தலைவர் விஜய் நிறைவேற்றியுள்ளார். அதுமட்டுமின்றி, முதன்முறையாக எட்டு தலித் சகோதரர்கள் அமைச்சரவையில் இடம்பெற வழிவகை செய்யப்பட்டுள்ளது” என்றும் அவர் உரையில் குறிப்பிட்டார்.

சட்டமன்றத்தில் எழுந்த சலசலப்பு
ஆதவ் அர்ஜுனா தனது உரையைத் தொடங்கியபோது அவையில் கடும் வாக்குவாதம் உருவானது. அவரது முன்னுரை நீண்டதாகக் கூறி உறுப்பினர்கள் குறுக்கிட்டபோது, “ஜனநாயகபூர்வமாகவே எனது கருத்துக்களைப் பதிவு செய்கிறேன்; யாரையும் தனிப்பட்ட முறையில் குறிப்பிடவில்லை” என்று அவர் அளித்த பதில் அவையில் பெரும் பரபரப்பை ஏற்படுத்தியது. அண்ணா மற்றும் எம்.ஜி.ஆருக்குப் பிறகு சாமானியர்களும் இளைஞர்களும் சட்டமன்றத்திற்குள் நுழைய முடியும் என்பதை தவெகவின் இந்த வெற்றி நிரூபித்துள்ளதாகக் கூறி ஆதவ் அர்ஜுனா தனது உரையை நிறைவு செய்தார்.

“அமைச்சர்கள் வாங்க ஆரம்பித்துவிட்டார்கள் – அனைத்துப் பட்டியலும் எங்களிடம் உள்ளது!” – பாஜக மாநிலத் தலைவர் நயினார் நாகேந்திரன் பரபரப்புப் பேட்டி!