அதிமுகவில் மீண்டும் உள்கட்சி பூசல்? எடப்பாடி பழனிசாமி தலைமையிலான கூட்டத்தைப் புறக்கணித்த எஸ்.பி.வேலுமணி, நத்தம் விஸ்வநாதன்!

ராயப்பேட்டையில் உள்ள அதிமுக தலைமை அலுவலகமான ‘எம்.ஜி.ஆர் மாளிகையில்’ அதிமுக பொதுச்செயலாளர் எடப்பாடி பழனிசாமி தலைமையில் மாவட்டச் செயலாளர்கள் கூட்டம் இன்று விறுவிறுப்பாகத் தொடங்கியது. எனினும், கட்சியின் முக்கியத் தலைவர்களான துணைப் பொதுச்செயலாளர்கள் எஸ்.பி.வேலுமணி மற்றும் நத்தம் விஸ்வநாதன் ஆகியோர் இந்தக் கூட்டத்தைப் புறக்கணித்துள்ளது அதிமுக வட்டாரத்தில் பெரும் அதிர்வலையை ஏற்படுத்தியுள்ளது.

ராயப்பேட்டை அலுவலகத்தில் எடப்பாடி வருகை
எதிர்வரும் உள்ளாட்சித் தேர்தல் மற்றும் கட்சியின் பொதுக்குழுவைக் கூட்டுவது குறித்து ஆலோசிப்பதற்காக அதிமுக தலைமை அலுவலகத்தில் மாவட்டச் செயலாளர்கள் கூட்டத்திற்கு அழைப்பு விடுக்கப்பட்டிருந்தது. இதற்காக அதிமுக பொதுச்செயலாளர் எடப்பாடி பழனிசாமி இன்று காலை தலைமை அலுவலகத்திற்கு வந்தடைந்தார். அவருக்குக் தொண்டர்கள் மற்றும் நிர்வாகிகள் உற்சாக வரவேற்பு அளித்தனர்.

84 மாவட்டச் செயலாளர்கள் பங்கேற்பு
எடப்பாடி பழனிசாமி தலைமையில் தொடங்கிய இந்தக் கூட்டத்தில், மாநிலம் முழுவதிலும் இருந்து 84 மாவட்டச் செயலாளர்கள் நேரில் பங்கேற்றுள்ளனர். வருகின்ற உள்ளாட்சித் தேர்தலில் கட்சியின் வியூகங்கள், வேட்பாளர் தேர்வு, வாக்குச்சாவடி முகவர்கள் நியமனம் மற்றும் அடுத்தகட்டமாக அதிமுக பொதுக்குழுவை எந்தத் தேதியில் கூட்டுவது என்பது குறித்து தீவிரமாக ஆலோசனை நடத்தப்பட்டு வருகிறது.

முக்கியத் தலைவர்கள் புறக்கணிப்பு – வெடித்த சலசலப்பு!
மாவட்டச் செயலாளர்கள் கூட்டம் விறுவிறுப்பாக நடைபெற்று வரும் நிலையில், கட்சியின் மூத்த தலைவர்களும், துணைப் பொதுச்செயலாளர்களுமான எஸ்.பி.வேலுமணி மற்றும் நத்தம் விஸ்வநாதன் ஆகிய இருவரும் இக்கூட்டத்தில் பங்கேற்காமல் புறக்கணித்துள்ளனர்.

சமீபகாலமாக அதிமுகவில் உட்கட்சிப் பூசல்களும், எடப்பாடி பழனிசாமிக்கு எதிரான அதிருப்திக் குரல்களும் அவ்வப்போது வெளிவந்து கொண்டிருக்கும் சூழலில், கொங்கு மண்டலத்தின் பலம் வாய்ந்த தலைவரான எஸ்.பி.வேலுமணியும், திண்டுக்கல் மண்டலத்தின் மூத்த தலைவரான நத்தம் விஸ்வநாதனும் இந்தக் கூட்டத்திற்கு வராமல் புறக்கணித்திருப்பது கட்சிக்குள் மீண்டும் பிளவு ஏற்பட்டுள்ளதோ என்ற கேள்வியை எழுப்பியுள்ளது. தலைமை அலுவலகத்தில் ஆலோசனை கூட்டம் தொடர்ந்து நடைபெற்று வரும் நிலையில், இரு முக்கியத் தலைவர்களின் திடீர் புறக்கணிப்பு குறித்து அதிமுக தொண்டர்கள் மற்றும் அரசியல் விமர்சகர்கள் மத்தியில் பெரும் பரபரப்பும் சலசலப்பும் நிலவி வருகிறது.

“அதிகாரிகள் கட்டுப்பாட்டில் அரசா? வேடிக்கையாக இருக்கு!” – இடதுசாரிகளுக்கு அமைச்சர் அருண் ராஜ் நறுக்குத் தெறிக்கும் பதில்!