முதலமைச்சர், அமைச்சர் குறித்து அவதூறு பேச்சு: ஆ.ராசா, சேகர்பாபு மீது பாய்ந்த வழக்கு – திருமாவளவன் சுளீர் பதிவு!

முதலமைச்சர் விஜய் மற்றும் அமைச்சர் நிர்மல்குமார் குறித்து அவதூறாகப் பேசியதாக திமுக எம்பி ஆ.ராசா மற்றும் அமைச்சர் பி.கே.சேகர்பாபு ஆகியோர் மீது வழக்குப்பதிவு செய்யப்பட்டுள்ள சம்பவம் தமிழக அரசியல் களத்தில் பெரும் பரபரப்பை ஏற்படுத்தியுள்ளது.

ஆ.ராசா, சேகர்பாபு மீது வழக்கு பாய்ந்தது ஏன்? சமீபத்தில் திமுக சார்பில் நடைபெற்ற ஆர்ப்பாட்ட நிகழ்வில், முதலமைச்சர் விஜய் மற்றும் அமைச்சர் நிர்மல்குமார் குறித்து எம்பி ஆ.ராசா மற்றும் பி.கே.சேகர்பாபு ஆகியோர் விமர்சித்து உரையாற்றினர்.

சேகர்பாபு மீது 6 பிரிவுகள்: தவெக நிர்வாகி ஜெகதீஸ்வரி அளித்த புகாரின் பேரில், பொது அமைதிக்குக் குந்தகம் விளைவித்தல் உள்ளிட்ட 6 பிரிவுகளின் கீழ் சென்னை வடக்கு கடற்கரை காவல் நிலையத்தில் சேகர்பாபு மீது வழக்குப்பதிவு செய்யப்பட்டது.

ஆ.ராசா மீது 7 பிரிவுகள்: சைதாப்பேட்டை காவல் நிலையத்தில் ஆபாசமாகப் பேசுதல், பொது அமைதியைக் குலைக்க முயலுதல் உள்ளிட்ட 7 சட்டப் பிரிவுகளின் கீழ் ஆ.ராசா மீது வழக்குப்பதிவு செய்யப்பட்டுள்ளது.

விசிக தலைவர் திருமாவளவனின் பதில் இச்சம்பவம் மற்றும் திமுக தலைவர்களின் தொடர் விமர்சனங்கள் குறித்து கருத்து தெரிவித்துள்ள விடுதலைச் சிறுத்தைகள் கட்சித் தலைவர் தொல். திருமாவளவன் சுளீரென விமர்சித்துள்ளார்.

ஆ.ராசா மற்றும் திமுக தலைவர்கள் பேசும் பேச்சைப் பார்த்தால், அவர்கள் பெரியார் பாசறையில் வளர்ந்தவர்களின் பேச்சாகவே தெரியவில்லை.

இத்தகையப் பேச்சுக்கள் சமூக நீதி மரியாதையைக் குலைக்கும் வகையில் அமைகின்றன.

அரசியல் விமர்சனங்கள் நாகரிகமான எல்லையைத் தாண்டக் கூடாது என்றும், பெரியாரியப் பாதையில் வந்தவர்கள் கண்ணியமான முறையில் தங்கள் கருத்துகளை முன்வைக்க வேண்டும் என்றும் திருமாவளவன் சுட்டிக்காட்டியுள்ளார்.

ரூ.1 கோடி மான நஷ்ட வழக்கு: திமுக தலைவர் மு.க.ஸ்டாலினுக்கு சென்னை உயர்நீதிமன்றம் நோட்டீஸ்!