பாகிஸ்தானில் தயாரிக்கப்பட்ட சில அழகுசாதன கிரீம்களை பயன்படுத்திய 18 பெண்கள் மற்றும் சிறுமிகளுக்கு சிறுநீரக பாதிப்பு ஏற்பட்டதாக தகவல் வெளியாகியுள்ளது. இதையடுத்து, உரிய அனுமதியின்றி விற்பனை செய்யப்படும் அழகுசாதன பொருட்களை பயன்படுத்த வேண்டாம் என மத்திய மருந்து தரக் கட்டுப்பாட்டு அமைப்பு (CDSCO) எச்சரித்துள்ளது.
சிறுநீரக பாதிப்புடன் மருத்துவமனையில் அனுமதி
மகாராஷ்டிராவின் நாக்பூர் பகுதியில் பாகிஸ்தானில் தயாரிக்கப்பட்ட ‘கோரி பியூட்டி கிரீம்’ மற்றும் ‘சாந்தினி ஒயிட்டனிங் கிரீம்’ உள்ளிட்ட அழகு சாதனப் பொருட்கள் விற்பனை செய்யப்பட்டதாக தெரிவிக்கப்பட்டுள்ளது.
இந்த கிரீம்களை பயன்படுத்திய 18 பெண்கள் மற்றும் சிறுமிகளுக்கு சிறுநீரகத்தில் பிரச்சினைகள் ஏற்பட்டதாக மருத்துவர்கள் தெரிவித்துள்ளனர். அவர்களுக்கு சிறுநீரில் அதிக அளவு புரதம் வெளியேறுதல், முகம் மற்றும் கால்களில் வீக்கம், அதிக சோர்வு உள்ளிட்ட அறிகுறிகள் ஏற்பட்டதாக கூறப்படுகிறது.
கிரீமில் அதிக அளவு பாதரசம்
மருத்துவ பரிசோதனைகளில், சம்பந்தப்பட்ட அழகு சாதனப் பொருட்களில் நச்சுத்தன்மை கொண்ட ‘பாதரசம்’ (Mercury) அனுமதிக்கப்பட்ட பாதுகாப்பு அளவை விட சுமார் 100 முதல் 105 மடங்கு அதிகமாக இருந்ததாக மருத்துவர்கள் தெரிவித்துள்ளனர்.
பாதரசம் தொடர்ந்து உடலில் சேரும்போது சிறுநீரகங்கள் உள்ளிட்ட முக்கிய உறுப்புகள் பாதிக்கப்படலாம். குறிப்பாக, பாதிக்கப்பட்ட சிலருக்கு ‘மெம்ப்ரேனஸ் நெஃப்ரோபதி’ (Membranous Nephropathy) எனப்படும் சிறுநீரக பாதிப்பு கண்டறியப்பட்டதாக மருத்துவர்கள் கூறியுள்ளனர்.
மருத்துவர்கள் எச்சரிக்கை
நாக்பூர் சிறுநீரகவியல் நிபுணர் டாக்டர் மோனாலி சாஹூ, இந்த கிரீம்களை பயன்படுத்திய சில நோயாளிகளை பரிசோதித்ததாகவும், அவர்களுக்கு சிறுநீரக பாதிப்பு இருப்பது கண்டறியப்பட்டதாகவும் தெரிவித்துள்ளார். கிரீம்களில் அதிக அளவு பாதரசம் இருப்பது பரிசோதனையில் தெரியவந்ததாகவும் அவர் கூறியுள்ளார்.
இந்தியாவில் விற்பனைக்கு அனுமதி இல்லை
‘கோரி பியூட்டி கிரீம்’ மற்றும் ‘சாந்தினி ஒயிட்டனிங் கிரீம்’ ஆகியவை இந்தியாவில் இறக்குமதி மற்றும் விற்பனைக்கு அங்கீகரிக்கப்படாதவை என்றும், அவற்றில் அதிக அளவு கன உலோகங்கள் இருப்பதாகவும் CDSCO தெரிவித்துள்ளது. பொதுமக்கள் இந்தப் பொருட்களை வாங்கவோ பயன்படுத்தவோ வேண்டாம் என்றும் எச்சரிக்கை விடுக்கப்பட்டுள்ளது.
மேலும், இந்த கிரீம்கள் உள்ளூர் சந்தைகள் மற்றும் ஆன்லைன் வழியாகவும் விற்பனை செய்யப்பட்டதாக தகவல்கள் வெளியாகியுள்ளன. இதன் விநியோக வழிமுறை குறித்து விசாரணைகள் நடைபெற்று வருவதாகவும் தெரிவிக்கப்பட்டுள்ளது.
என்ன அறிகுறிகள் இருந்தால் கவனம் தேவை?
இந்த வகை அழகு சாதனப் பொருட்களை பயன்படுத்தியவர்களுக்கு முகம் அல்லது கால்களில் வீக்கம், நுரையுடன் கூடிய சிறுநீர், அதிகப்படியான சோர்வு அல்லது சிறுநீர் தொடர்பான மாற்றங்கள் ஏற்பட்டால் அவற்றை அலட்சியப்படுத்தாமல் மருத்துவரை அணுக வேண்டும் என எச்சரிக்கப்பட்டுள்ளது.
உரிய உற்பத்தியாளர் விவரங்கள், தயாரிப்பு தேதி, காலாவதி தேதி மற்றும் தேவையான ஒழுங்குமுறை தகவல்கள் இல்லாத அழகுசாதனப் பொருட்களை வாங்காமல் இருப்பதும் முக்கியம் என அதிகாரிகள் அறிவுறுத்தியுள்ளனர்.