கர்நாடக அரசின் மேகதாது அணை திட்டத்திற்கு எதிர்ப்பு தெரிவித்துச் சட்டமன்றத்தில் நிறைவேற்றப்பட்ட தீர்மானத்தில் திருத்தம் செய்யப்பட்டதை எதிர்த்து அதிமுக கொறடா அக்ரி கிருஷ்ணமூர்த்தி தாக்கல் செய்த வழக்கை சென்னை உயர் நீதிமன்றம் தள்ளுபடி செய்து உத்தரவிட்டுள்ளது.
வழக்கின் பின்னணி
கர்நாடக அரசு மேகதாதுவில் அணை கட்டுவதைத் தடுத்து நிறுத்தக் கோரியும், அதற்கு அனுமதி அளிக்கக் கூடாது என மத்திய அரசை வலியுறுத்தியும் தமிழ்நாடு சட்டமன்றத்தில் தீர்மானம் நிறைவேற்றப்பட்டது.
ஆனால், சட்டமன்ற உறுப்பினர்களுக்கு வழங்கப்பட்ட தீர்மான நகலில் இடம்பெறாத சில திருத்தங்கள் பின்னர் செய்யப்பட்டுள்ளதாகவும், அந்தத் திருத்தங்கள் மீது எந்தவித விவாதமும் நடத்தப்படாமல் அவசரமாகத் தீர்மானம் நிறைவேற்றப்பட்டதாகவும் கூறி, அதிமுக கொறடா அக்ரி கிருஷ்ணமூர்த்தி சென்னை உயர் நீதிமன்றத்தில் வழக்குத் தொடர்ந்திருந்தார்.
தமிழக அரசின் வாதம்
இந்த வழக்கு விசாரணைக்கு வந்தபோது, தமிழக அரசு தரப்பில் வலுவான வாதங்கள் முன்வைக்கப்பட்டன. அதில், “மத்திய அரசுக்குக் கோரிக்கை விடுத்து நிறைவேற்றப்பட்ட இந்தத் தீர்மானமானது சட்டமன்றத்தின் கொள்கை முடிவு சார்ந்த ஒரு வேண்டுகோள் மட்டுமே. இதைக் காட்டி நீதிமன்றத்தில் வழக்குத் தொடர முடியாது” என்று வாதிடப்பட்டது.
உயர் நீதிமன்றத்தின் தீர்ப்பு
வழக்கை விசாரித்த தலைமை நீதிபதி எஸ்.ஏ. தர்மாதிகாரி மற்றும் நீதிபதி ஜி. அருள்முருகன் அடங்கிய அமர்வு, மனுதாரரின் வாதங்களை ஏற்றுக்கொள்ள மறுத்தது.
மத்திய அரசுக்கு விடுக்கப்பட்ட கோரிக்கை மற்றும் சட்டமன்ற நடைமுறைகளின் அடிப்படையில் தொடரப்பட்ட இந்த வழக்கில் எந்தவித முகாந்திரமும் இல்லை எனக் கூறி, அக்ரி கிருஷ்ணமூர்த்தியின் மனுவைத் தள்ளுபடி செய்து உத்தரவிட்டனர்.
ஜெம் வீரமணி விவகாரம்: அமைச்சர் ராஜ்மோகன் – முன்னாள் அமைச்சர் ரகுபதி இடையே காரசார விவாதம்