நேபாளத்தில் ஏற்பட்ட கடுமையான வெள்ளம் மற்றும் நிலச்சரிவால் பாதிக்கப்பட்ட பகுதிகளில் நிவாரணம் மற்றும் மீட்புப் பணிகளை மேற்கொள்வதற்காக அமெரிக்கா கூடுதலாக 31 மில்லியன் அமெரிக்க டாலர் நிதியுதவியை அறிவித்துள்ளது.
அமெரிக்காவின் இந்த புதிய உதவித் தொகை நிரந்தர பாலங்கள் அமைத்தல், பாதிக்கப்பட்ட மக்களுக்கு மனிதாபிமான உதவிகளை வழங்குதல் மற்றும் எதிர்கால பேரிடர் மீட்புப் பணிகளுக்காக அமெரிக்காவில் தயாரிக்கப்பட்ட ட்ரோன்களை வழங்குதல் உள்ளிட்ட பணிகளுக்கு பயன்படுத்தப்பட உள்ளது.
நியூயார்க்கில் நடைபெற்ற சந்திப்பின்போது அமெரிக்க வெளியுறவுத்துறை அரசியல் விவகாரங்களுக்கான துணைச் செயலாளர் அலிசன் ஹூக்கர், நேபாள வெளியுறவுத்துறை அமைச்சர் ஷிஷிர் கானலை சந்தித்தார். அப்போது இந்த கூடுதல் நிதியுதவி தொடர்பான அறிவிப்பு வெளியிடப்பட்டது.
இதில், பாதிக்கப்பட்ட பகுதிகளில் போக்குவரத்து வசதியை மீண்டும் ஏற்படுத்தும் வகையில் நிரந்தரமாக பயன்படுத்தக்கூடிய பாலங்களை அமைக்க 10 மில்லியன் டாலர் ஒதுக்கப்பட உள்ளது. மேலும், குடிநீர், சுகாதாரம், தங்குமிடம், பாதுகாப்பு, வாழ்வாதாரம் மற்றும் குளிர்கால தேவைகளுக்காக 8 மில்லியன் டாலர் கூடுதல் உதவி வழங்கப்பட உள்ளது.
அதேபோல், எதிர்கால பேரிடர் மீட்பு மற்றும் நிவாரணப் பணிகளுக்கு உதவும் வகையில் 13 மில்லியன் டாலர் மதிப்பிலான அமெரிக்க தயாரிப்பு ட்ரோன்களும் வழங்கப்பட உள்ளன.
இந்த புதிய உதவியுடன் சேர்த்து, நேபாள வெள்ள நிவாரணம் மற்றும் மீட்புப் பணிகளுக்காக அமெரிக்கா வழங்கியுள்ள மொத்த உதவித்தொகை 36 மில்லியன் அமெரிக்க டாலருக்கும் அதிகமாக உயர்ந்துள்ளது.
ஆகஸ்ட் 26-ம் தேதி நேபாளத்தின் ராசுவா பகுதியில் ஏற்பட்ட பேரழிவு வெள்ளத்தைத் தொடர்ந்து, அமெரிக்கா தொடர்ந்து நிவாரண உதவிகளை வழங்கி வருகிறது. வெள்ளத்தில் உயிரிழந்தோர் எண்ணிக்கை 1,400-ஐ கடந்துள்ள நிலையில், ஆயிரக்கணக்கானோர் தொடர்ந்து காணாமல் போயுள்ளனர்.
நேபாளத்தின் வெள்ள நிவாரணம் மற்றும் மீட்புப் பணிகளுக்கு தேவையான கூடுதல் உதவிகளை தொடர்ந்து வழங்குவோம் என அமெரிக்கா தெரிவித்துள்ளது.