சீனாவின் மிகப்பெரிய ஆன்லைன் பயண நிறுவனமான டிரிப்.காம், சுமார் ரூ.6.4 கோடி மதிப்பிலான விண்வெளி சுற்றுலா பேக்கேஜை அறிமுகப்படுத்தியுள்ளது. இந்த சொகுசுப் பயணத் திட்டம் அமெரிக்காவைச் சேர்ந்த விர்ஜின் கேலக்டிக் நிறுவனத்தின் துணை சுற்றுப்பாதை விண்வெளிப் பயணத்தை உள்ளடக்கியதாகும்.
6 நாள் விண்வெளிப் பயணம்
டிரிப்.காம் வழங்கும் இந்த பேக்கேஜின் மொத்த விலை 5.1 மில்லியன் சீன யுவான், அதாவது சுமார் 7.6 லட்சம் அமெரிக்க டாலர்கள் அல்லது இந்திய மதிப்பில் ரூ.6.4 கோடி என தெரிவிக்கப்பட்டுள்ளது.
பயணத்தின் முதல் 4 நாட்கள் அமெரிக்காவில் சிறப்பு பயிற்சிக்காக ஒதுக்கப்பட்டுள்ளது. 5-வது நாளில் நியூ மெக்சிகோவில் உள்ள ஸ்பேஸ்போர்ட் அமெரிக்காவில் இருந்து விர்ஜின் கேலக்டிக் விண்கலம் மூலம் சுமார் 90 நிமிடங்கள் துணை சுற்றுப்பாதை விண்வெளிப் பயணம் மேற்கொள்ளப்படும். 6-வது நாள் திரும்பும் பயணத்துக்காக ஒதுக்கப்பட்டுள்ளது.
எடையற்ற நிலையில் மிதக்கும் அனுபவம்
விண்வெளிப் பயணத்தின்போது பயணிகள் சில நிமிடங்கள் எடையற்ற நிலையில் மிதக்கும் அனுபவத்தைப் பெறுவார்கள். மேலும், விண்கலத்தில் உள்ள 17 ஜன்னல்கள் வழியாக பூமியை விண்வெளியில் இருந்து பார்க்கும் வாய்ப்பும் கிடைக்கும் என தெரிவிக்கப்பட்டுள்ளது.
4 நாட்கள் சிறப்பு பயிற்சி
விண்வெளிப் பயணத்திற்கு முன் பயணிகளுக்கு சிமுலேட்டர் அடிப்படையிலான பயிற்சி, அதிக ஈர்ப்பு விசையை எதிர்கொள்ளும் பயிற்சி, அவசரகால நடைமுறைகள் உள்ளிட்ட பல்வேறு தயாரிப்பு நடவடிக்கைகள் வழங்கப்படும் என தெரிவிக்கப்பட்டுள்ளது.
என்னென்ன இதில் அடங்கும்?
விமானப் பயணத்திற்கு முந்தைய பயிற்சி, பயிற்சிக் காலத்துக்கான போக்குவரத்து மற்றும் தங்குமிடம், விண்வெளி உடை, அடையாள அட்டைகள் மற்றும் பயண அனுபவத்தின் வீடியோக்கள் உள்ளிட்டவை இந்த பேக்கேஜில் அடங்கும்.
ஆனால், சர்வதேச விமானப் பயணச் செலவு, அமெரிக்க விசா மற்றும் தனிநபர் காப்பீடு உள்ளிட்ட சில செலவுகள் இந்த தொகையில் சேர்க்கப்படவில்லை.
2 பேர் முன்பதிவு
இந்த விண்வெளிப் பயண பேக்கேஜை இதுவரை 2 வாடிக்கையாளர்கள் முன்பதிவு செய்துள்ளதாக சவுத் சைனா மார்னிங் போஸ்ட் உள்ளிட்ட ஊடகங்கள் தெரிவித்துள்ளன. இந்த பேக்கேஜின் விலை மற்றும் பாதுகாப்பு குறித்து சீன சமூக வலைதளங்களில் விவாதங்களும் எழுந்துள்ளன.
விர்ஜின் கேலக்டிக் தனது விண்வெளிப் பயணத்துக்கான இருக்கைகளை தலா 7.5 லட்சம் அமெரிக்க டாலர் விலையில் விற்பனை செய்துள்ளது. இதன் மூலம் விண்வெளி சுற்றுலா தற்போது மிக அதிக செலவு கொண்ட தனியார் பயண அனுபவங்களில் ஒன்றாக உருவெடுத்துள்ளது.
பாகிஸ்தான் முன்னாள் பிரதமர் இம்ரான்கானின் சகோதரி கைது! லாகூரில் தீவிரமடையும் அரசியல் பரபரப்பு