நடிகர் நானி நடிப்பில், ஸ்ரீகாந்த் ஒடேலா இயக்கத்தில் உருவாகியுள்ள ‘தி பாரடைஸ்’ திரைப்படம் செப்டம்பர் 24-ம் தேதி உலகம் முழுவதும் திரையரங்குகளில் வெளியானது. நானி, கயாடு லோஹர், ராகவ் ஜூயல், சோனாலி குல்கர்னி, மோகன் பாபு உள்ளிட்டோர் நடித்துள்ள இப்படம் வெளியானதைத் தொடர்ந்து ரசிகர்கள் மற்றும் விமர்சகர்களிடையே கலவையான கருத்துகள் வெளியாகி வருகின்றன.
கலவையான விமர்சனங்களை சந்தித்த ‘தி பாரடைஸ்’
‘தி பாரடைஸ்’ திரைப்படத்தின் நடிப்பு, ஆக்ஷன் காட்சிகள், காட்சியமைப்பு மற்றும் இசை உள்ளிட்ட அம்சங்களுக்கு சில ரசிகர்கள் பாராட்டு தெரிவித்துள்ளனர். அதே நேரத்தில், திரைக்கதை, எடிட்டிங் மற்றும் இரண்டாம் பாதையின் கதை நகர்வு உள்ளிட்ட அம்சங்கள் குறித்து சிலர் விமர்சனங்களை முன்வைத்துள்ளனர். இதனால் சமூக வலைதளங்களிலும் படத்தைப் பற்றிய பல்வேறு கருத்துகள் பகிரப்பட்டு வருகின்றன.
விமர்சனங்களுக்கு நானி பதில்
இந்நிலையில், ‘தி பாரடைஸ்’ திரைப்படம் தொடர்பாக ரசிகர்கள் வெளியிட்டு வரும் கருத்துகள் மற்றும் விமர்சனங்களுக்கு நடிகர் நானி தனது சமூக வலைதளப் பதிவு மூலம் பதிலளித்துள்ளார்.
ரசிகர்களின் அனைத்து எதிர்வினைகளையும் கருத்துகளையும் கவனித்ததாக தெரிவித்துள்ள நானி, தன் மீது ரசிகர்கள் காட்டிய அன்பை பெற்றுக்கொண்டதாகவும், அதே நேரத்தில் படத்தைப் பற்றிய நகைச்சுவையான ட்ரோல்களையும் ரசித்ததாகவும் தெரிவித்துள்ளார்.
“விமர்சகர்கள் சுட்டிக்காட்டிய குறைகளிலிருந்து கற்றுக்கொண்டேன்”
மேலும், ரசிகர்கள் ‘தி பாரடைஸ்’ படத்தை தங்களுடைய சொந்தப் படமாக ஏற்றுக்கொண்ட விதம் தன்னை நெகிழ வைத்ததாக நானி குறிப்பிட்டுள்ளார்.
அதேபோல், விமர்சகர்கள் படத்தில் சுட்டிக்காட்டிய குறைகளையும் தான் கவனித்ததாகவும், அவற்றிலிருந்து கற்றுக்கொண்டதாகவும் அவர் தெரிவித்துள்ளார். திரைப்படத்தை உருவாக்கிய குழுவினர் மிகுந்த உழைப்பையும் அர்ப்பணிப்பையும் செலுத்தியதாகவும் நானி கூறியுள்ளார்.
“கொண்டாடுவதும் விமர்சிப்பதும் உங்கள் கைகளில்தான்”
ரசிகர்களுக்கு தனித்துவமான அனுபவத்தை வழங்க வேண்டும் என்ற நோக்கத்துடன் ‘தி பாரடைஸ்’ திரைப்படத்தை உருவாக்கியதாக தெரிவித்துள்ள நானி, படத்தை கொண்டாடுவதா அல்லது விமர்சிப்பதா என்பது ரசிகர்களின் முடிவு என்றும் தனது பதிவில் தெரிவித்துள்ளார்.
மேலும், படத்தின் மீது ரசிகர்கள் காட்டிய ஆர்வத்திற்கும், தன் மீது வெளிப்படுத்திய அன்பிற்கும் நன்றி தெரிவித்துள்ள அவர், ரசிகர்களின் அனைத்து விதமான எதிர்வினைகளையும் ஏற்றுக்கொள்வதாக தனது பதிவின் மூலம் தெரிவித்துள்ளார்.
விமர்சனங்களை நேர்மறையாக எடுத்துக்கொண்ட நானி
‘தி பாரடைஸ்’ படத்தின் வெளியீட்டுக்கு முன்பாகவும், படத்தைப் பற்றிய விமர்சனங்கள் தொடர்பாக நானி தனது நிலைப்பாட்டை தெளிவுபடுத்தியிருந்தார். உண்மையான ரசிகர்களின் விமர்சனங்கள் மற்றும் கருத்துகளை கட்டுப்படுத்தும் நோக்கம் தங்களுக்கு இல்லை என்றும், நீதிமன்ற உத்தரவு குறிப்பிட்ட வகையான அவதூறு அல்லது செயற்கையாக உருவாக்கப்படும் உள்ளடக்கத்தை குறிவைத்தது என்றும் அவர் முன்பு தெரிவித்திருந்தார்.
தற்போது படம் வெளியான பிறகு கிடைத்து வரும் பாராட்டுகள், விமர்சனங்கள் மற்றும் ட்ரோல்களுக்கு நானி அளித்துள்ள இந்த பதில், சமூக வலைதளங்களில் கவனம் பெற்றுள்ளது.
தனுஷ் படப்பிடிப்புக்கு அனுமதி இல்லை? கோவில் நிர்வாகத்தின் எதிர்ப்பால் பரபரப்பு!