பிரான்ஸ் தலைநகர் பாரிஸின் புகழ்பெற்ற ஈபிள் டவரில், இந்து மத அமைப்பின் பிரதிநிதிகள் வருகையின்போது பெண் ஊழியர்கள் ஒதுக்கப்பட்ட விவகாரம் பெரும் சர்ச்சையை ஏற்படுத்திய நிலையில், ஈபிள் டவரை நிர்வகிக்கும் நிறுவனத்தின் தலைமை அதிகாரி பேட்ரிக் பிராங்கோ ருவோ ஆண்டு இறுதியில் பதவி விலக உள்ளதாக அறிவிக்கப்பட்டுள்ளது.
செப்டம்பர் 5-ம் தேதி நடந்த சம்பவம்
செப்டம்பர் 5-ம் தேதி Bochasanwasi Akshar Purushottam Swaminarayan Sanstha (BAPS) அமைப்பைச் சேர்ந்த குழுவினர் ஈபிள் டவருக்கு சென்றுள்ளனர். இந்த வருகையின்போது பெண் ஊழியர்கள் சிலர் பார்வையாளர்களுடன் தொடர்பு கொள்ளாத வகையில் வேறு பகுதிகளுக்கு செல்லுமாறு அறிவுறுத்தப்பட்டதாகவும், சில இடங்களில் ஆண் ஊழியர்களால் அவர்கள் மாற்றப்பட்டதாகவும் தகவல்கள் வெளியாகின.
விசாரணையில் தெரியவந்த தகவல்
இந்த சம்பவம் தொடர்பாக மேற்கொள்ளப்பட்ட விசாரணையில், அதிகாரப்பூர்வ வருகையை ஏற்பாடு செய்ததில் பல்வேறு நிர்வாகக் குறைபாடுகள் இருந்ததாக SETE தெரிவித்துள்ளது.
அதன் காரணமாக அன்றைய தினம் பெண் ஊழியர்கள் ஒதுக்கப்பட்டதாகவும், இது ஏற்றுக்கொள்ள முடியாத சூழ்நிலை என்றும் நிறுவனம் தெரிவித்துள்ளது. மேலும், எதிர்காலத்தில் இதுபோன்ற சம்பவங்கள் நடைபெறாமல் இருக்க பாலின சமத்துவம் தொடர்பான நடவடிக்கைகள் மற்றும் பயிற்சிகள் மேற்கொள்ளப்படும் எனவும் கூறப்பட்டுள்ளது.
ஊழியர்கள் போராட்டம் – ஒரு நாள் மூடப்பட்ட ஈபிள் டவர்
பெண் ஊழியர்களை ஒதுக்கியதாக வெளியான தகவலுக்கு எதிர்ப்பு தெரிவித்து ஈபிள் டவர் ஊழியர்கள் போராட்டத்தில் ஈடுபட்டனர். இதன் காரணமாக செப்டம்பர் 7-ம் தேதி ஈபிள் டவர் ஒரு நாள் மூடப்பட்டது.
ஊழியர் தரப்பில், பெண்கள் அவர்களின் பாலினத்தை அடிப்படையாகக் கொண்டு பணியிடங்களில் இருந்து ஒதுக்கப்பட்டதாக குற்றச்சாட்டு முன்வைக்கப்பட்டது.
CEO பதவி விலகல்
இந்த விவகாரம் தொடர்பான விசாரணையைத் தொடர்ந்து, ஈபிள் டவரை நிர்வகிக்கும் Société d’Exploitation de la Tour Eiffel (SETE) நிறுவனத்தின் இயக்குநர் ஜெனரல் பேட்ரிக் பிராங்கோ ருவோ, 2026-ம் ஆண்டு இறுதியில் தனது பதவியில் இருந்து விலகுவதாக அறிவித்துள்ளார்.
2018-ம் ஆண்டு முதல் SETE நிறுவனத்தின் தலைமைப் பொறுப்பில் இருந்த அவர், இந்த சம்பவத்துக்குப் பிறகு எழுந்த சர்ச்சை மற்றும் விசாரணைகளுக்கு மத்தியில் பதவி விலகும் முடிவை எடுத்துள்ளார்.
BAPS அமைப்பு கூறியது என்ன?
இந்த விவகாரம் தொடர்பாக BAPS அமைப்பு, தங்களது குழுவினரின் வருகையை சுமுகமாக நடத்துவதற்கான ஏற்பாடுகளின் ஒரு பகுதியாகவே இந்த ஒருங்கிணைப்பு மேற்கொள்ளப்பட்டதாகவும், அது பாலின பாகுபாட்டை அடிப்படையாகக் கொண்ட கோரிக்கை அல்ல என்றும் விளக்கம் அளித்திருந்தது.
பின்னர் ஏற்பட்ட பிரச்சினைக்கு வருத்தம் தெரிவித்த அந்த அமைப்பு, ஏற்பட்ட அசௌகரியத்திற்காக மன்னிப்பும் கோரியுள்ளது.
ஈபிள் டவர் நிர்வாகத்தில் புதிய நடவடிக்கைகள்
இந்த சம்பவத்துக்குப் பிறகு ஈபிள் டவர் நிர்வாகத்தில் பாலின சமத்துவத்தை உறுதி செய்வதற்கான புதிய நடவடிக்கைகள் மேற்கொள்ளப்பட உள்ளன. குறிப்பாக ஊழியர்களுக்கான பயிற்சி திட்டங்களை செயல்படுத்த SETE நிர்வாகம் நடவடிக்கை எடுத்து வருகிறது.
ஆண்டுதோறும் சுமார் 70 லட்சம் பார்வையாளர்களை ஈர்க்கும் ஈபிள் டவரில் ஏற்பட்ட இந்த விவகாரம் சர்வதேச அளவில் கவனம் பெற்றுள்ளது.