செயற்கை நுண்ணறிவு (AI) கருவிகள் தகவல்களை விரைவாகச் சுருக்கித் தருவதால், நீண்ட கட்டுரைகள், ஆய்வுகள் மற்றும் வீடியோக்களைப் புரிந்துகொள்வது எளிதாகியுள்ளது. ஆனால், AI வழங்கும் சுருக்கங்களில் தவறான தகவல்கள் இடம்பெற்றால், அவை மனிதர்களின் நினைவாற்றலையே பாதிக்கக்கூடும் என்று புதிய ஆய்வு எச்சரித்துள்ளது.
ChatGPT, Google Gemini போன்ற AI கருவிகள் ஒரு தகவலைச் சுருக்கும்போது முக்கியமான விவரங்களைத் தவறவிடுவதுடன், சில நேரங்களில் இல்லாத தகவல்களையும் சேர்க்கக்கூடும். இதுபோன்ற தவறான தகவல்களை மனிதர்கள் பின்னர் உண்மையான நினைவுகளாக ஏற்றுக்கொள்ளும் வாய்ப்பு இருப்பதாக ஆய்வாளர்கள் தெரிவித்துள்ளனர்.
51.6% முக்கிய தகவல்கள் விடுபட்டன
ஜார்ஜ்டவுன் பல்கலைக்கழகம் மற்றும் வாஷிங்டன் பல்கலைக்கழகத்தைச் சேர்ந்த ஆராய்ச்சியாளர்கள் மேற்கொண்ட ஆய்வில், பல்வேறு AI மாதிரிகள் மற்றும் கட்டளைகளைப் பயன்படுத்தி உருவாக்கப்பட்ட சுருக்கங்கள் ஆய்வு செய்யப்பட்டன.
இதில், AI உருவாக்கிய சுருக்கங்களில் சராசரியாக 51.6 சதவீத முக்கியமான தகவல்கள் இடம்பெறாமல் விடப்பட்டதாக ஆய்வாளர்கள் தெரிவித்துள்ளனர். சில சுருக்கங்களில் தவறான தகவல்களும் இடம்பெற்றிருந்தன.
331 பேரிடம் நடத்தப்பட்ட ஆய்வு
இந்த ஆய்வில் 331 பேர் பங்கேற்றனர். அவர்களிடம் ஒரு கார் விபத்து தொடர்பான அனிமேஷன் வீடியோ காண்பிக்கப்பட்டது. 24 முதல் 48 மணி நேரங்களுக்குப் பிறகு, அந்த வீடியோவைப் பற்றிய AI உருவாக்கிய சுருக்கம் அவர்களிடம் காட்டப்பட்டது.
சிலருக்கு சரியான தகவல்கள் கொண்ட சுருக்கமும், மற்றவர்களுக்கு தவறான தகவல் இடம்பெற்ற சுருக்கமும் வழங்கப்பட்டது. பின்னர், அவர்கள் முதலில் பார்த்த சம்பவத்தை எவ்வாறு நினைவில் வைத்துள்ளனர் என்பது சோதிக்கப்பட்டது.
நினைவாற்றலில் ஏற்பட்ட மாற்றம்
சரியான சுருக்கத்தைப் படித்தவர்களில் 83.6 சதவீதம் பேர் வீடியோவில் இடம்பெற்ற முக்கிய விவரத்தை சரியாக நினைவுகூர்ந்தனர்.
ஆனால், தவறான தகவல்கள் இடம்பெற்ற சுருக்கத்தைப் படித்தவர்களில் 44.8 சதவீதம் பேர் மட்டுமே அந்த விவரத்தை சரியாக நினைவுகூர முடிந்தது. இதன் மூலம் AI சுருக்கத்தில் இடம்பெறும் தவறான தகவல்கள், ஒருவர் ஏற்கனவே பார்த்த சம்பவத்தைப் பற்றிய அவரது நினைவையே மாற்றக்கூடும் என்பது தெரியவந்ததாக ஆய்வாளர்கள் தெரிவித்துள்ளனர்.
மேலும், அந்த சுருக்கம் AI மூலம் உருவாக்கப்பட்டது என்றும், அதில் தவறுகள் இருக்கக்கூடும் என்றும் முன்கூட்டியே எச்சரித்திருந்தாலும், தவறான தகவல்களின் தாக்கம் முழுமையாக நீங்கவில்லை என ஆய்வு கூறுகிறது.
எந்த துறைகளில் அதிக கவனம் தேவை?
நீதித்துறை, மருத்துவம், காவல்துறை மற்றும் செய்தி உள்ளிட்ட முக்கியமான துறைகளில் AI சுருக்கங்களைப் பயன்படுத்தும்போது கூடுதல் கவனம் தேவை என்று ஆய்வாளர்கள் எச்சரிக்கின்றனர்.
உதாரணமாக, ஒரு குற்றச் சம்பவத்தை நேரில் பார்த்த சாட்சியிடம் தவறான AI சுருக்கம் காட்டப்பட்டால், அவரது உண்மையான நினைவில் மாற்றம் ஏற்பட்டு தவறான தகவலை அவர் தெரிவிக்கும் அபாயம் இருக்கலாம்.
அதேபோல், மருத்துவ அறிக்கைகள் அல்லது முக்கிய செய்திகளை AI மூலம் சுருக்கும்போது ஏற்படும் சிறிய தவறுகளும் எதிர்பாராத விளைவுகளை ஏற்படுத்தக்கூடும்.
AI தொழில்நுட்பம் தகவல்களை விரைவாகப் புரிந்துகொள்ள உதவும் கருவியாக இருந்தாலும், முக்கியமான தகவல்கள் மற்றும் முடிவுகளுக்கு AI சுருக்கங்களை மட்டும் நம்பாமல், முடிந்தவரை அசல் ஆதாரங்களை நேரடியாகப் படித்து சரிபார்ப்பது அவசியம் என இந்த ஆய்வு வலியுறுத்துகிறது.
மனதைக் கட்டுப்படுத்துவது எப்படி? – 24 மணிநேரத்தில் சாத்தியமா? ஒரு சிறப்புப் பார்வை