இந்தியாவில் காற்று மாசு நாளுக்கு நாள் முக்கிய சுற்றுச்சூழல் மற்றும் பொது சுகாதாரப் பிரச்சினையாக உருவெடுத்து வருகிறது.

குறிப்பாக, டெல்லி உள்ளிட்ட வடமாநிலங்களில் குளிர்காலம் தொடங்கும்போது காற்றின் தரம் மோசமடைகிறது.
அதேநேரத்தில், தமிழ்நாடு, மகாராஷ்டிரா, கர்நாடகா, தெலங்கானா உள்ளிட்ட மாநிலங்களிலும் நகரமயமாக்கல், வாகனப் பெருக்கம், தொழிற்சாலை வெளியேற்றம், கட்டுமானப் பணிகள் போன்ற காரணங்களால் காற்று மாசு ஏற்படுகிறது.
காற்றில் கலக்கும் நுண் துகள்கள், குறிப்பாக பி.எம்.2.5 மற்றும் பி.எம்.10 ஆகியவை மனிதர்களின் சுவாச மண்டலத்தைப் பாதிக்கக்கூடியவை.
இவற்றின் அளவு அதிகரிக்கும்போது ஆஸ்துமா உள்ளிட்ட சுவாசப் பிரச்சினைகள் தீவிரமடையவும், இதயம் மற்றும் நுரையீரல் தொடர்பான பாதிப்புகளுக்கான அபாயம் அதிகரிக்கவும் வாய்ப்புள்ளது.
அதிர்ச்சியளிக்கும் ஆய்வுத் தகவல்கள்:
மத்திய மாசுக் கட்டுப்பாட்டு வாரியத்தின் கண்காணிப்புத் தரவுகளையும் அடிப்படையாகக் கொண்டு, எரிசக்தி மற்றும் தூய காற்றுக்கான ஆராய்ச்சி மையம் (CREA) வெளியிட்டுள்ள அக்டோபர் 2026 மாதாந்திர ஆய்வறிக்கை முக்கியமான தகவல்களை வெளிப்படுத்தியுள்ளது.
அதன்படி, போதிய கண்காணிப்புத் தரவுகள் கிடைத்த 267 இந்திய நகரங்களில் 261 நகரங்களின் சராசரி பி.எம்.2.5 அளவு, உலக சுகாதார அமைப்பின் தினசரி வழிகாட்டி அளவான ஒரு கன மீட்டருக்கு 15 மைக்ரோகிராமைத் தாண்டியுள்ளது.
அதேவேளையில், 229 நகரங்கள் இந்தியாவின் தேசிய காற்றுத் தர அளவான ஒரு கன மீட்டருக்கு 60 மைக்ரோகிராம் என்ற பி.எம்.2.5 வரம்புக்குள் இருந்ததாகவும் அறிக்கை தெரிவிக்கிறது.
இதன் மூலம், இந்தியாவின் தேசியத் தரத்தையும் உலக சுகாதார அமைப்பின் பரிந்துரையையும் தனித்தனியாகப் புரிந்துகொள்ள வேண்டிய அவசியம் தெளிவாகிறது.
டெல்லியில் குளிர்காலத்தில் அதிகரிக்கும் புகைமூட்டம்:
இந்தியாவின் தலைநகர் டெல்லி, காற்று மாசால் அதிகம் பாதிக்கப்படும் பகுதிகளில் ஒன்றாகத் தொடர்ந்து இருந்து வருகிறது.
வாகனப் புகை, கட்டுமானப் பணிகளால் எழும் தூசி, தொழிற்சாலைகளின் வெளியேற்றம், அண்டை மாநிலங்களில் பயிர்க் கழிவுகள் எரிக்கப்படுவது உள்ளிட்டவை டெல்லியின் காற்றுத் தரத்தைப் பாதிக்கின்றன.
குளிர்காலத்தில் காற்றின் வேகம் குறைவது, வளிமண்டல நிலைமைகள் மாறுவது போன்ற காரணங்களால் மாசுத் துகள்கள் தரைக்கு அருகே தேங்குகின்றன.
நவம்பர் 16-ஆம் தேதி காலை டெல்லியின் சராசரி காற்றுத் தரக் குறியீடு (AQI) 216 ஆகப் பதிவானது. இது ‘மோசம்’ என்ற பிரிவில் இடம்பெறுகிறது.
அங்குள்ள 59 கண்காணிப்பு மையங்களில் 39 மையங்களில் காற்றுத் தரக் குறியீடு 200-ஐத் தாண்டியிருந்தது.
முன்னதாக, தீபாவளிக்கு முந்தைய வாரத்தில் டெல்லி-தேசிய தலைநகர் பிராந்தியத்தில் சராசரி பி.எம்.2.5 அளவு ஒரு கன மீட்டருக்கு 236 மைக்ரோகிராமாக உயர்ந்ததாக சுற்றுச்சூழல் ஆய்வு அமைப்பான சி.எஸ்.இ. தெரிவித்திருந்தது.
இருப்பினும், ஒன்றிய அரசின் தரவுகளின்படி, 2026 அக்டோபரில் டெல்லியின் மாதாந்திர சராசரி ஏ.க்யூ.ஐ. 166 ஆக இருந்தது.
கடந்த எட்டு ஆண்டுகளில் அந்த மாதத்தில் பதிவான குறைந்த சராசரி இதுவாகும். இதனால், சில காலகட்டங்களில் முன்னேற்றம் இருந்தாலும் குளிர்கால மாசு தொடர்ந்து சவாலாக உள்ளது.
உத்தரப் பிரதேசம், ஹரியானா: மாசு அதிகம் பதிவாகும் நகரங்கள்
வடஇந்தியாவில் உத்தரப் பிரதேசம் மற்றும் ஹரியானா மாநிலங்களின் பல நகரங்கள் காற்று மாசால் பாதிக்கப்பட்டுள்ளன.
உத்தரப் பிரதேசத்தின் காஜியாபாத், நொய்டா, மீரட், கிரேட்டர் நொய்டா உள்ளிட்ட நகரங்களில் வாகனப் போக்குவரத்து, தொழிற்சாலைகள், கட்டுமானப் பணிகள் மற்றும் சாலைத் தூசி ஆகியவை முக்கியக் காரணங்களாக உள்ளன.
ஹரியானாவின் குருகிராம், மானேசர், பஹதூர்கர் உள்ளிட்ட தொழில் மற்றும் நகர்ப்புறப் பகுதிகளிலும் காற்று மாசு குறிப்பிடத்தக்க பிரச்சினையாக உள்ளது.
CREA அறிக்கையின்படி, அக்டோபர் மாதத்தில் தேசிய அளவில் அதிக மாசு பதிவான முதல் 10 நகரங்களில் உத்தரப் பிரதேசத்தைச் சேர்ந்த ஆறு நகரங்களும், ஹரியானாவைச் சேர்ந்த மூன்று நகரங்களும் இடம்பெற்றிருந்தன.
பஞ்சாப், ராஜஸ்தான்: விவசாயம் மற்றும் நகர்ப்புற மாசு
பஞ்சாப் மற்றும் ஹரியானாவின் சில பகுதிகளில் அறுவடைக்குப் பிறகு பயிர்க் கழிவுகள் எரிக்கப்படுவது காற்றில் நுண்துகள்களின் அளவை அதிகரிக்கிறது. இந்தப் புகை காற்றின் திசையைப் பொறுத்து டெல்லி உள்ளிட்ட அண்டைப் பகுதிகளுக்கும் பரவக்கூடும்.
ராஜஸ்தானில் நகரமயமாக்கல், வாகனப் புகை, தொழிற்சாலைகள் மற்றும் வறண்ட பகுதிகளில் எழும் தூசி ஆகியவை காற்றின் தரத்தைப் பாதிக்கின்றன. குறிப்பாக, ஜெய்ப்பூர் உள்ளிட்ட நகரங்களில் வாகனப் போக்குவரத்து மற்றும் கட்டுமானப் பணிகளைக் கட்டுப்படுத்துவது முக்கியமாகிறது.
மகாராஷ்டிரா: மும்பை, புனே நகரங்களின் சவால்கள்
மகாராஷ்டிராவில் மும்பை, புனே, நாக்பூர் உள்ளிட்ட நகரங்களில் வாகனப் போக்குவரத்து, கட்டுமானப் பணிகள், தொழிற்சாலை வெளியேற்றம் ஆகியவை காற்று மாசுக்குக் காரணமாக உள்ளன.
மும்பை கடற்கரை நகரமாக இருப்பதால் கடற்காற்று சில நேரங்களில் மாசுத் துகள்கள் பரவுவதற்கு உதவுகிறது. இருப்பினும், போக்குவரத்து நெரிசல், கட்டுமானப் பணிகள் மற்றும் தொழிற்சாலை மாசு போன்ற உள்ளூர் காரணங்கள் தொடர்ந்து பாதிப்பை ஏற்படுத்துகின்றன.
மேற்கு வங்கம், பீகார்: குளிர்காலப் பாதிப்பு
மேற்கு வங்கத்தின் கொல்கத்தா மற்றும் பீகாரின் பாட்னா உள்ளிட்ட நகரங்களில் வாகனப் புகை, தொழிற்சாலைகள், சாலைத் தூசி மற்றும் சுற்றுவட்டாரப் பகுதிகளில் இருந்து பரவும் மாசு ஆகியவை காற்றின் தரத்தைப் பாதிக்கின்றன.
குறிப்பாக, கங்கைச் சமவெளிப் பகுதியில் குளிர்காலத்தில் காற்றின் இயக்கம் குறைவது, மாசுத் துகள்கள் வளிமண்டலத்தில் நீண்ட நேரம் நிலைத்திருக்க வழிவகுக்கிறது.
தமிழ்நாடு: சென்னையிலும் அதிகரிக்கும் காற்று மாசு
வடமாநிலங்களுடன் ஒப்பிடும்போது, தமிழ்நாட்டின் பல நகரங்களில் காற்று மாசின் தீவிரம் பொதுவாகக் குறைவாக இருந்தாலும், சென்னை, திருப்பூர், கோவை, தூத்துக்குடி, கும்மிடிப்பூண்டி உள்ளிட்ட தொழில் மற்றும் நகர்ப்புறப் பகுதிகளில் காற்றுத் தரம் குறித்த கவலைகள் உள்ளன.
சென்னையில் வாகனப் பெருக்கம், சாலைத் தூசி, கட்டுமானப் பணிகள், தொழிற்சாலை வெளியேற்றம் மற்றும் திறந்தவெளியில் குப்பை எரித்தல் ஆகியவை முக்கியக் காரணங்களாக உள்ளன.
சென்னையின் காற்று மாசு தொடர்பாக 2024-ஆம் ஆண்டு வெளியான ஆய்வில், பி.எம்.10 நுண்துகள்கள் உருவாவதில் சாலைத் தூசி 28 சதவீதமும், வாகனப் போக்குவரத்து 23 சதவீதமும், தொழிற்சாலைகள் 20 சதவீதமும் பங்களிப்பதாகக் குறிப்பிடப்பட்டுள்ளது. திறந்தவெளியில் நகர்ப்புறக் கழிவுகளை எரிப்பதும் மாசுக்குக் காரணமாக இருப்பதாக அந்த ஆய்வு சுட்டிக்காட்டியுள்ளது.
வடசென்னை மற்றும் புறநகர்ப் பகுதிகளில் உள்ள தொழிற்சாலைகள், துறைமுகச் செயல்பாடுகள், கனரக வாகனப் போக்குவரத்து ஆகியவற்றின் தாக்கத்தையும் தொடர்ந்து கண்காணிக்க வேண்டியுள்ளது.
அக்டோபர் 2026-க்கான CREA ஆய்வில், தேசிய அளவில் அதிக மாசு பதிவான முதல் 10 நகரங்களில் கும்மிடிப்பூண்டியும் இடம்பெற்றிருந்தது. இதனால், தமிழ்நாட்டின் தொழிற்பகுதிகளிலும் காற்றுத் தரக் கண்காணிப்பை வலுப்படுத்த வேண்டிய அவசியம் ஏற்பட்டுள்ளது.
கர்நாடகா, தெலங்கானா: நகரமயமாக்கலின் தாக்கம்
கர்நாடகாவின் பெங்களூரு நகரில் வாகனப் பெருக்கம், போக்குவரத்து நெரிசல், கட்டுமானப் பணிகள் மற்றும் சாலைத் தூசி ஆகியவை காற்றின் தரத்தைப் பாதிக்கின்றன.
தெலங்கானாவின் ஹைதராபாத் நகரிலும் அதிகரித்து வரும் வாகனப் போக்குவரத்து, சிறு தொழிற்சாலைகள் மற்றும் கட்டுமான நடவடிக்கைகள் காற்று மாசுக்கு முக்கியப் பங்களிப்பைச் செய்கின்றன.
காற்று மாசு அதிகம் பதிவாகும் தமிழ்நாட்டு மாவட்டங்கள்:
திருவள்ளூர் : கும்மிடிப்பூண்டி, மணலி, பொன்னேரி-தொழிற்சாலைகள், கனரக வாகனங்கள்.
சென்னை: வடசென்னை, அம்பத்தூர், மணலி-வாகனப் புகை, கட்டுமானத் தூசி, தொழிற்சாலைகள்.
செங்கல்பட்டு: தாம்பரம், மறைமலைநகர்-வாகனப் போக்குவரத்து,
தொழிற்பகுதிகள்:
காஞ்சிபுரம் : ஸ்ரீபெரும்புதூர், காஞ்சிபுரம் தொழிற்சாலைகள்- வாகனப் புகை.
ராணிப்பேட்டை: ராணிப்பேட்டை, ஆற்காடு-தொழிற்சாலை வெளியேற்றம்.
கடலூர் : கடலூர், நெய்வேலி தொழிற்சாலைகள்-மின் உற்பத்தி நடவடிக்கைகள்.
கோயம்புத்தூர்: கோவை மாநகரப் பகுதிகள்-வாகனங்கள், தொழிற்சாலைகள்.
விருதுநகர்: சிவகாசி-பட்டாசு மற்றும் அச்சுத் தொழில்கள்
சமீபத்திய தரவுகளில் கவனிக்க வேண்டிய நகரங்கள்
நவம்பர் 18, 2026 தரவுகளின் படி மாசு அளவு:
– சென்னை – AQI 154
– விருதுநகர் – AQI 138
– திருநெல்வேலி – AQI 134
– கும்மிடிப்பூண்டி – AQI 133
– கோயம்புத்தூர் – AQI 132
– செங்கல்பட்டு – AQI 131
– திண்டுக்கல் – AQI 125
