பெண் மாவட்ட ஆட்சியர் ஒருவருக்கு ஆளுங்கட்சியான தமிழக வெற்றிக் கழகத்தின் எம்எல்ஏ ஆபாச குறுஞ்செய்தி அனுப்பியதாகவும், அவரது வீட்டிற்குச் சென்று அச்சுறுத்தும் வகையில் நடந்துகொண்டதாகவும் எழுந்துள்ள குற்றச்சாட்டு தமிழக அரசியலில் பரபரப்பை ஏற்படுத்தியுள்ளது.
இந்த விவகாரம் தொடர்பாக ‘மின்னம்பலம்’ ஊடகத்துக்கு அளித்த பேட்டியில், ஓய்வுபெற்ற ஐஏஎஸ் அதிகாரி பாலசந்திரன், முதலமைச்சர் விஜய் தலைமையிலான அரசின் நடவடிக்கைகள் குறித்து பல்வேறு கேள்விகளை எழுப்பியுள்ளார்.
முக்கியப் பதவிகளில் தவறான நபர்களுக்கு இடமா?
சமூக நெறிமுறைகளையும் வரையறைகளையும் மதிக்காமல் செயல்படுபவர்களை ஆங்கிலத்தில் ‘லும்பன் எலிமெண்ட்ஸ்’ என்று குறிப்பிடுவார்கள் என பாலசந்திரன் விளக்கினார்.
இத்தகைய நபர்களுக்கு அரசியல் கட்சிகளில் முக்கியப் பொறுப்புகளோ, எம்எல்ஏ மற்றும் அமைச்சர் பதவிகளோ வழங்கப்படுவதைத் தலைமை தவிர்த்திருக்க வேண்டும் என்று அவர் தெரிவித்தார். தமிழக வெற்றிக் கழகத்தில் இதுபோன்ற நபர்களுக்கு முக்கியப் பொறுப்புகள் வழங்கப்பட்டுள்ளனவா என்ற கேள்வியும் தற்போது எழுந்துள்ளதாகக் குறிப்பிட்டார்.
“எச்சரிக்கை விடுத்தால் மட்டும் போதுமா?”
குற்றச்சாட்டுக்கு உள்ளான எம்எல்ஏவை முதலமைச்சர் அழைத்து எச்சரித்ததாக வெளியாகும் தகவல்களைச் சுட்டிக்காட்டிய பாலசந்திரன், ஒரு மாவட்ட ஆட்சியருக்கே ஆபாச குறுஞ்செய்தி அனுப்பியதாகக் குற்றம்சாட்டப்படும் நபரை எச்சரித்துவிட்டால் மட்டும் பிரச்சினை முடிந்துவிடுமா எனக் கேள்வி எழுப்பினார்.
“இது என்ன சட்டம்-ஒழுங்கு? இல்லை காட்டாட்சியா?” என்று கேள்வி எழுப்பிய அவர், முதலமைச்சர் சம்பந்தப்பட்ட எம்எல்ஏவை எவ்வாறு நடத்தினார் என்பது முக்கியமல்ல என்றும், சட்டப்படி விசாரணை நடத்தப்பட்டதா, என்ன நடவடிக்கை எடுக்கப்பட்டது என்பதே முக்கியம் என்றும் வலியுறுத்தினார்.
காவல்துறையின் நடவடிக்கையில் இரட்டை நிலைப்பாடா?
பொதுக்கூட்டத்தில் மற்றொருவர் பேசியதற்காக உதயநிதி மீது காவல்துறை உடனடியாக நடவடிக்கை எடுத்ததாகக் குறிப்பிட்ட பாலசந்திரன், தற்போதைய விவகாரத்தில் மட்டும் பாதிக்கப்பட்டவர் புகார் அளித்தால் நடவடிக்கை எடுப்போம் என்று கூறுவது ஏன் எனக் கேள்வி எழுப்பினார்.
எம்எல்ஏ தனது செல்போனைச் சோதனை செய்யத் தயாராக இருப்பதாகக் கூறினால், காவல்துறை அதை உடனடியாகப் பெற்று தடயவியல் ஆய்வுக்கு உட்படுத்த வேண்டும் என்றும் அவர் தெரிவித்தார். குற்றச்சாட்டுகளில் உண்மை இருப்பது விசாரணையில் தெரியவந்தால், சட்டப்படி நடவடிக்கை எடுக்க வேண்டும் என்றும் வலியுறுத்தினார்.
சமரச முயற்சிகள் குறித்தும் விமர்சனம்
இந்த விவகாரத்தில் அமைச்சர்கள் வன்னியரசு மற்றும் புஸ்ஸி ஆனந்த் ஆகியோர் சமரசம் செய்ய முயன்றதாக வெளியாகியுள்ள தகவல்களையும் பாலசந்திரன் விமர்சித்தார்.
குற்றச்சாட்டு பொய்யானது என்றால், நிரபராதி ஒருவர் மீது பழி சுமத்தப்படுவதாகக் கூறி அவர்கள் ஏன் வெளிப்படையாக எதிர்ப்பு தெரிவிக்கவில்லை என்றும் கேள்வி எழுப்பினார்.
மேலும், சம்பந்தப்பட்ட எம்எல்ஏவை ‘பாவம்’ என்று குறிப்பிட்டு ஆதரவாகப் பேசிய தமிழ்நாடு காங்கிரஸ் கமிட்டித் தலைவர் மாணிக்கம் தாகூரையும் விமர்சித்தார். மாவட்ட ஆட்சியருக்கு கூடுதல் போலீஸ் பாதுகாப்பு அளிக்கப்பட்டதற்கான காரணம் குறித்து மாணிக்கம் தாகூர் பதில் அளிக்க வேண்டும் என்றும் அவர் கூறினார்.
முதலமைச்சரின் மௌனம் குறித்து கேள்வி
ஆளுங்கட்சியின் எம்எல்ஏ மீது நடவடிக்கை எடுத்தால் கட்சியில் பிளவு ஏற்பட்டு ஆட்சி பாதிக்கப்படுமோ என்ற அச்சத்தால் முதலமைச்சர் மௌனம் காக்கிறாரா என்ற சந்தேகம் மக்களிடம் எழுவதாக பாலசந்திரன் தெரிவித்தார்.
மேகதாது அணை விவகாரம், அரிசி உள்ளிட்ட அத்தியாவசியப் பொருட்களின் விலை உயர்வு போன்ற பிரச்சினைகளில் முதலமைச்சர் உரிய கவனம் செலுத்தவில்லை என்றும் அவர் குற்றம்சாட்டினார். சிறிய விவகாரங்களுக்கு உடனடியாக அறிக்கை வெளியிடும் முதலமைச்சர், முக்கியப் பிரச்சினைகளில் ஏன் மௌனம் காக்கிறார் என்றும் கேள்வி எழுப்பினார்.
சமூக அடையாளத்தை முன்வைத்து தப்பிக்க முடியாது
தன்னை முதல் தலைமுறை அரசியல்வாதி என்றும், பட்டியலின சமூகத்தைச் சேர்ந்தவர் என்றும் கூறி அனுதாபம் தேட முயல்வதை ஏற்க முடியாது என பாலசந்திரன் தெரிவித்தார்.
அம்பேத்கர், கக்கன் போன்ற தலைவர்கள் பிறந்த சமூகத்தின் பெயரைச் சொல்லி யாரும் தவறு செய்துவிட்டுத் தப்பிக்க முடியாது என்றும் அவர் கூறினார்.
ரியல் எஸ்டேட் மாபியாக்களைத் தடுத்ததால் தன் மீது பொய்யான குற்றச்சாட்டுகள் முன்வைக்கப்படுவதாக எம்எல்ஏ கூறுவது உண்மையென்றால், அதை நிரூபிக்கும் வகையில் வெளிப்படையான விசாரணைக்கு அரசு உத்தரவிட வேண்டும் என்றும் பாலசந்திரன் வலியுறுத்தியுள்ளார்.
மாவட்ட ஆட்சியர் தொடர்பான குற்றச்சாட்டுகள் குறித்து காவல்துறை விசாரணை மற்றும் அரசின் அடுத்தகட்ட நடவடிக்கை என்னவாக இருக்கும் என்ற எதிர்பார்ப்பு தற்போது எழுந்துள்ளது.
திமுக கூட்டணியில் மார்க்சிஸ்ட் கம்யூனிஸ்ட் கட்சி மீண்டும் இடம்பெறுமா? – தோழர் கனகராஜ் பதில்!