மதுரை கோரிப்பாளையம் பகுதியில் உள்ள பசும்பொன் முத்துராமலிங்கத் தேவர் சிலைக்கு மாலை அணிவித்து மரியாதை செலுத்தச் சென்ற பாஜகவினருக்கும், காவல்துறையினருக்கும் இடையே கடும் வாக்குவாதம் ஏற்பட்டது.
மேலும், இருதரப்பினருக்கும் இடையே தள்ளுமுள்ளு ஏற்பட்டதால் அப்பகுதியில் பரபரப்பு நிலவியது.
தேவர் சிலைக்கு மரியாதை செலுத்த வந்த பாஜகவினர்!
பசும்பொன் முத்துராமலிங்கத் தேவரின் பிறந்தநாள் மற்றும் குருபூஜையை முன்னிட்டு, மதுரை கோரிப்பாளையம் பகுதியில் அமைந்துள்ள அவரது சிலைக்கு பல்வேறு அரசியல் கட்சியினர் மாலை அணிவித்து மரியாதை செலுத்தி வருகின்றனர்.
அந்த வகையில், பாஜகவினரும் தேவர் சிலைக்கு மாலை அணிவித்து மரியாதை செலுத்துவதற்காகக் கொடிகளுடன் கோரிப்பாளையம் பகுதிக்கு வந்தனர்.
குறிப்பிட்ட நபர்களுக்கு மட்டுமே அனுமதி!
அங்கு பாதுகாப்புப் பணியில் ஈடுபட்டிருந்த காவல்துறையினர், பாதுகாப்பு காரணங்களைக் கருத்தில் கொண்டு குறிப்பிட்ட எண்ணிக்கையிலான நபர்களுக்கு மட்டுமே சிலைக்கு மாலை அணிவிக்க அனுமதி அளிக்க முடியும் என்று தெரிவித்தனர்.
ஆனால், காவல்துறையினரின் அறிவுறுத்தலை மீறி பாஜகவினர் கைகளில் கட்சிக் கொடிகளுடன் தேவர் சிலையை நோக்கிச் செல்ல முயன்றனர். இதனால் அவர்களைக் காவல்துறையினர் தடுத்து நிறுத்தினர்.
பாஜக மாவட்டத் தலைவருக்கும் போலீஸ் அதிகாரிக்கும் வாக்குவாதம்!
இதனைத் தொடர்ந்து, மதுரை மாநகர் மாவட்ட பாஜக தலைவர் மாரி செல்வராஜுக்கும் காவல்துறை உயர் அதிகாரிக்கும் இடையே கடும் வாக்குவாதம் ஏற்பட்டது.
இருவரும் மாறி மாறி உரிமையுடன் பேசியதால் அங்கு பரபரப்பான சூழல் நிலவியது. தொடர்ந்து பாஜகவினருக்கும் காவல்துறையினருக்கும் இடையே தள்ளுமுள்ளும் ஏற்பட்டது.
சாலையில் அமர்ந்து பாஜகவினர் போராட்டம்!
ஒருகட்டத்தில் பாஜகவினர் கோரிப்பாளையம் பகுதியில் உள்ள சாலையில் திடீரென அமர்ந்து காவல்துறையினருடன் வாக்குவாதத்தில் ஈடுபட்டனர். இதனால் அப்பகுதியில் சிறிது நேரம் பரபரப்பு ஏற்பட்டது.
இதையடுத்து, காவல்துறையினர் பாஜக நிர்வாகிகளுடன் பேச்சுவார்த்தை நடத்தி சமாதானப்படுத்தினர். பின்னர் பாதுகாப்பு கருதி 10 பேருக்கு மட்டும் தேவர் சிலைக்கு மாலை அணிவித்து மரியாதை செலுத்த அனுமதி வழங்கப்பட்டது.
இதனைத் தொடர்ந்து பாஜக நிர்வாகிகள் தேவர் சிலைக்கு மாலை அணிவித்து மரியாதை செலுத்தினர். பின்னர் அங்கிருந்த பாஜகவினர் கலைந்து சென்றனர்.
பசும்பொன் முத்துராமலிங்கத் தேவர் நினைவிடத்தில் எடப்பாடி பழனிசாமி மரியாதை!