கடலூர் மாவட்டம் பண்ருட்டி அருகே இளைஞர் ஒருவர் மாயமான வழக்கில், அவரைக் கொலை செய்து புதைத்ததாகக் கூறப்படும் சம்பவம் அதிர்ச்சியை ஏற்படுத்தியுள்ளது. இந்த வழக்கில் அதே கிராமத்தைச் சேர்ந்த இருவரைப் போலீசார் கைது செய்து விசாரணை நடத்தி வருகின்றனர்.
சென்னைக்குச் சென்றவர் வீடு திரும்பவில்லை
பண்ருட்டி அடுத்த சிறுவத்தூர் கிராமத்தைச் சேர்ந்த ரமேஷ் (40) – எழில்செல்வி தம்பதியரின் மகன் பிரசாந்த் (19). டைல்ஸ் பதிக்கும் கூலி வேலை செய்து வந்த இவர், தனது தாயாரைப் பார்க்கச் சென்னைக்குச் செல்வதாகக் கூறிவிட்டு கடந்த 27ஆம் தேதி வீட்டிலிருந்து புறப்பட்டுள்ளார்.
பிரசாந்தின் தாயார் எழில்செல்வி, சென்னையில் நடிகர் சரத்குமார் – நடிகை ராதிகா வீட்டில் வீட்டு வேலை செய்து வருவதாகக் கூறப்படுகிறது. சென்னைக்குச் சென்ற பிரசாந்த் மீண்டும் வீடு திரும்பாததால் குடும்பத்தினர் அதிர்ச்சியடைந்தனர்.
காவல் நிலையத்தில் புகார் – செல்போன் மூலம் விசாரணை
பல இடங்களில் தேடியும் பிரசாந்த் கிடைக்காததால், அவரது தந்தை ரமேஷ் புதுப்பேட்டை காவல் நிலையத்தில் புகார் அளித்தார். இதையடுத்து போலீசார் வழக்குப் பதிவு செய்து விசாரணை மேற்கொண்டனர்.
பிரசாந்தின் செல்போன் டவர் இருப்பிடத்தை அடிப்படையாகக் கொண்டு விசாரணை நடத்திய போலீசார், சிறுவத்தூர் கிராமத்தைச் சேர்ந்த தேவராசு (18), தினேஷ் (23) ஆகிய இருவரைப் பிடித்து விசாரித்தனர்.
பொன்னேரி கடற்கரை பகுதியில் கொலை செய்து புதைத்ததாகத் தகவல்
போலீசார் நடத்திய விசாரணையில், பிரசாந்துக்கும் தேவராசு, தினேஷ் ஆகியோருக்கும் இடையே முன்விரோதம் இருந்ததாகக் கூறப்படுகிறது. இதன் காரணமாக பிரசாந்தை பொன்னேரி கடற்கரைப் பகுதிக்கு வரவழைத்து, தாக்கிக் கொலை செய்து புதைத்ததாக இருவரும் தெரிவித்ததாக தகவல் வெளியாகியுள்ளது.
இதையடுத்து தேவராசு மற்றும் தினேஷ் ஆகிய இருவரையும் போலீசார் கைது செய்துள்ளனர். பிரசாந்த் கொலை செய்யப்பட்டதற்கான காரணம், சம்பவம் நடைபெற்ற விதம் உள்ளிட்டவை குறித்து போலீசார் தொடர்ந்து விசாரணை நடத்தி வருகின்றனர்.
இளைஞர் மாயமான வழக்கில் கொலை சம்பவம் வெளிச்சத்துக்கு வந்துள்ளதாக வெளியாகியுள்ள தகவல் பண்ருட்டி பகுதியில் பெரும் பரபரப்பை ஏற்படுத்தியுள்ளது.
தருமபுரியில் கொடூரம்: கஞ்சா போதையில் தாயைக் கத்தியால் குத்திக் கொன்ற 19 வயது மகன் கைது!