லிப்ட் கொடுப்பதாக அழைத்துச் சென்று அத்துமீறியதாகப் புகார் – காவல்துறை விசாரணை
கன்னியாகுமரி மாவட்டம், தக்கலை அருகே கல்லூரி மாணவிக்குக் காரில் பாலியல் தொல்லை கொடுத்ததாகத் தமிழக வெற்றிக் கழக நிர்வாகி கிறிஸ்டோபர் மீது காவல்துறையினர் வழக்குப்பதிவு செய்துள்ளனர்.
லிப்ட் கொடுப்பதாகக் கூறி காரில் அழைத்துச் சென்றபோது இந்தச் சம்பவம் நடைபெற்றதாகப் பாதிக்கப்பட்ட மாணவி புகார் அளித்துள்ளார்.
கன்னியாகுமரி மாவட்டம், குலசேகரம் பகுதியைச் சேர்ந்த கல்லூரி மாணவி ஒருவர், நாகர்கோவிலில் உள்ள கல்லூரியில் முதுகலை இரண்டாம் ஆண்டு படித்து வருகிறார்.
இவரது தோழி, தக்கலை அருகே உள்ள மூலச்சல் பகுதியைச் சேர்ந்தவர் என்றும், தவெக குமரி மத்திய மாவட்ட இளைஞரணியில் முக்கியப் பொறுப்பில் இருப்பவர் என்றும் கூறப்படுகிறது.
இந்நிலையில், கடந்த இரண்டு நாட்களுக்கு முன்பு மாலை நேரத்தில் மாணவியும் அவரது தோழியும் தக்கலை அருகே பேருந்துக்காகக் காத்திருந்ததாகத் தெரிகிறது. அப்போது, மருந்துக்கோட்டை பகுதியைச் சேர்ந்தவரும், தவெக குமரி மத்திய மாவட்ட செயற்குழு உறுப்பினராக இருப்பவருமான கிறிஸ்டோபர் காரில் அங்கு வந்துள்ளார்.
அந்தப் பெண் நிர்வாகியை ஏற்கெனவே தெரிந்திருந்ததால், அவரிடம் இருவரும் ஏன் பேருந்துக்காகக் காத்திருக்கிறீர்கள் என்றும், தங்களது ஊர் வழியாகத்தான் செல்வதாகவும் கூறி காரில் வருமாறு அழைத்துள்ளார்.
இதையடுத்து, தனது தோழியையும் வற்புறுத்தி காரில் ஏறச் செய்ததாகக் கூறப்படுகிறது.
முதலில் தவெக பெண் நிர்வாகியை மூலச்சல் பகுதியில் இறக்கிவிட்ட கிறிஸ்டோபர், பின்னர் குலசேகரத்தைச் சேர்ந்த கல்லூரி மாணவியை அவரது வீட்டருகே இறக்கிவிடுவதாகக் கூறி காரில் அழைத்துச் சென்றுள்ளார்.
பெட்ரோல் நிலையத்தில் பாலியல் தொல்லை கொடுத்ததாகப் புகார்
வழியில் பெட்ரோல் நிரப்புவதற்காகக் கார் ஒரு பெட்ரோல் நிலையத்தில் நிறுத்தப்பட்டபோது, உடன் இருந்த கல்லூரி மாணவியிடம் கிறிஸ்டோபர் பாலியல் ரீதியாக அத்துமீறியதாகப் புகாரில் தெரிவிக்கப்பட்டுள்ளது.
இதனால் அதிர்ச்சியடைந்த மாணவி, அவரைக் கடுமையாகக் கண்டித்ததாகக் கூறப்படுகிறது.
இதையடுத்து, கிறிஸ்டோபர் மாணவியிடம் மன்னிப்புக் கேட்டுவிட்டு, அவரது வீட்டின் அருகே இறக்கிவிட்டுச் சென்றதாகத் தெரிகிறது.
பின்னர், காரில் தன்னுடன் வந்த தவெக பெண் நிர்வாகியிடம் நடந்த சம்பவத்தைத் தெரிவித்த மாணவி, கதறி அழுததாகக் கூறப்படுகிறது.
காவல் நிலையத்தில் புகார் – போலீசார் விசாரணை
இதனைத் தொடர்ந்து, பாதிக்கப்பட்ட மாணவியை அழைத்துக்கொண்டு கொற்றிக்கோடு காவல் நிலையத்திற்குச் சென்ற பெண் நிர்வாகி புகார் அளித்துள்ளார். ஆனால், புகாரின் மீது உரிய முறையில் வழக்குப்பதிவு செய்யாமல், சமரசம் செய்து முடிக்கப் பணப் பேரம் நடைபெற்றதாகவும் குற்றச்சாட்டு எழுந்துள்ளது.
இந்தக் குற்றச்சாட்டு தொடர்பான விவரங்கள் அதிகாரப்பூர்வமாக உறுதிப்படுத்தப்பட வேண்டியுள்ளன.
இந்த விவகாரம் சமூக வலைதளங்களில் பரவியதைத் தொடர்ந்து, புகார் தொடர்பாக விசாரணை நடத்த மாவட்டக் காவல் கண்காணிப்பாளர் உத்தரவிட்டதாகத் தெரிவிக்கப்படுகிறது.
இதையடுத்து, தக்கலை போலீசார் புகாரின் அடிப்படையில் விசாரணை மேற்கொண்டு, பாலியல் தொல்லை உள்ளிட்ட பிரிவுகளின் கீழ் தவெக நிர்வாகி கிறிஸ்டோபர் மீது வழக்குப்பதிவு செய்துள்ளனர்.
இந்தச் சம்பவம் கன்னியாகுமரி மாவட்டத்தில் பரபரப்பை ஏற்படுத்தியுள்ள நிலையில், புகாரில் தெரிவிக்கப்பட்டுள்ள குற்றச்சாட்டுகள் குறித்து காவல்துறையினர் தொடர்ந்து விசாரணை மேற்கொண்டு வருகின்றனர்.
வழக்கின் விசாரணை முடிவுகளின் அடிப்படையில் அடுத்தகட்ட நடவடிக்கைகள் அமையும்.