மதுரை மாவட்டம் தீர்த்தக்காட்டுப் பகுதியில் சுமார் 40 ஆண்டுகளாக வீட்டுமனைப் பட்டா கேட்டு நீதிமன்ற வழக்குகள் மற்றும் பல்வேறு கட்டப் போராட்டங்களில் ஈடுபட்டு வந்த மக்களுக்கு தற்போது தீர்வு கிடைத்துள்ளது. தமிழ்நாடு அரசின் வழிகாட்டுதலின்படியும், விடுதலைச் சிறுத்தைகள் கட்சித் தலைவர் தொல். திருமாவளவனின் முயற்சியினாலும் இந்த நீண்டகாலப் பிரச்சினைக்குத் தீர்வு காணப்பட்டுள்ளதாக செய்தித் துறை அமைச்சரும், விசிக மூத்த தலைவருமான வன்னி அரசு தெரிவித்துள்ளார்.
112 குடும்பங்களுக்கு முதற்கட்டமாக மனைப்பட்டா வழங்கல்
நீண்ட நெடிய போராட்டத்தின் பலனாக, தீர்த்தக்காட்டுப் பகுதியைச் சேர்ந்த 112 பயனாளிகளுக்கு முதற்கட்டமாக வீட்டுமனைப் பட்டாக்கள் அதிகாரப்பூர்வமாக வழங்கப்பட்டுள்ளன.
மீதமுள்ள குடும்பங்களுக்கும் விரைவில் மனைப்பட்டா வழங்குவதற்குத் தேவையான நடவடிக்கைகள் மாவட்ட நிர்வாகத்துடன் இணைந்து இரவு பகலாக மேற்கொள்ளப்பட்டு வருவதாக அமைச்சர் வன்னி அரசு குறிப்பிட்டுள்ளார்.
மண்ணின் மைந்தர்களுக்கான விடியல்
சுதந்திரமடைந்து 80 ஆண்டுகள் கடந்த நிலையிலும், நாட்டின் பூர்வீகக் குடிகளாக விளங்கும் எளிய மக்கள் சொந்தமாக வீட்டுமனைப் பட்டா இன்றி தவிக்கும் நிலை நீடித்து வந்ததாக அமைச்சர் தெரிவித்துள்ளார்.
கடந்த கால ஆட்சிகளில் இந்தக் கோரிக்கைகள் தீர்க்கப்படாமல் நிலுவையில் இருந்த நிலையில், தற்போதைய அரசு அடித்தட்டு மக்களின் அடிப்படை உரிமைகளுக்கும் வாழ்வாதாரத்திற்கும் முன்னுரிமை அளித்து இந்த நடவடிக்கையை மேற்கொண்டுள்ளதாகக் குறிப்பிட்டுள்ளார்.
தொடரும் மக்கள் நலப்பணிகள்
தமிழ்நாடு முழுவதும் நிலுவையில் உள்ள இதுபோன்ற வீட்டுமனைப் பட்டா கோரிக்கைகளைக் கண்டறிந்து நடவடிக்கை எடுக்கப்பட உள்ளது.
நிலம் இல்லாமல் ரசீது மட்டும் வைத்துள்ள சிக்கலான இடங்களையும் ஆய்வு செய்து, உரிய முறையில் பட்டா வழங்க நடவடிக்கை மேற்கொள்ளப்படும் எனத் தெரிவிக்கப்பட்டுள்ளது.
இதனுடன், ஆதிதிராவிடர் மற்றும் பழங்குடியின மாணவர்களுக்கான வெளிநாட்டு உயர்கல்வி உதவித்தொகையை ரூ.84 கோடியிலிருந்து ரூ.131 கோடியாக உயர்த்தி வழங்கி வருவது உள்ளிட்ட எளிய மக்களின் கல்வி மற்றும் சமூக மேம்பாட்டிற்கான திட்டங்களையும் தொடர்ந்து முன்னெடுத்து வருவதாக அமைச்சர் வன்னி அரசு உறுதியளித்துள்ளார்.
இடைத்தேர்தல் களம்: தவெக அரசின் நகர்வுகளும் தொடரும் அரசியல் விமர்சனங்களும்!