அமெரிக்கா மற்றும் இஸ்ரேலுடன் நடைபெற்று வரும் போரின் தொடக்கத்தில் இருந்ததைவிட தற்போது ஈரான் ராணுவம் அதிக பலத்துடன் இருப்பதாக அந்நாட்டு ராணுவம் தெரிவித்துள்ளது. மேலும், ஹார்முஸ் நீரிணை மீதான தனது கட்டுப்பாடு தொடர்ந்து நீடிப்பதாகவும், அமெரிக்கா தங்களது நிபந்தனைகளை ஏற்கும் வரை நீரிணை முடக்கம் தொடரும் என்றும் எச்சரித்துள்ளது.
போர் தொடக்கத்தை விட ராணுவ பலம் அதிகரிப்பு!
இதுகுறித்து ஈரான் ராணுவ செய்தித் தொடர்பாளர் முகமது அக்ராமினியா கூறுகையில், அமெரிக்கா மற்றும் இஸ்ரேலுடனான போரின் தொடக்கத்தில் இருந்ததைவிட தற்போது இஸ்லாமிய குடியரசின் ஆயுதப்படைகள் அதிக பலம் பெற்றுள்ளன.
ஈரான் ராணுவ வீரர்கள் அதிக ஊக்கம், அர்ப்பணிப்பு மற்றும் நம்பிக்கையுடன் செயல்பட்டு வருவதாகவும் அவர் தெரிவித்துள்ளார். நாட்டின் பாதுகாப்புப் படைகள் எந்தவொரு சூழலையும் எதிர்கொள்ளத் தயாராக இருப்பதாகவும் குறிப்பிட்டுள்ளார்.
ஹார்முஸ் நீரிணை எங்கள் கட்டுப்பாட்டில் உள்ளது!
உலக நாடுகளின் கவனத்தை ஈர்த்துள்ள ஹார்முஸ் நீரிணை மீதான கட்டுப்பாடு ஈரானிடமே இருப்பதாக முகமது அக்ராமினியா தெரிவித்துள்ளார்.
அமெரிக்கா தங்களது நிபந்தனைகளை ஏற்றுக்கொள்ளும் வரை ஹார்முஸ் நீரிணை வழியாக நடைபெறும் கப்பல் போக்குவரத்துக்கான முடக்கம் தொடரும் என்றும் அவர் எச்சரித்துள்ளார்.
மேலும், ஈரானின் உச்ச தலைவர் பிறப்பிக்கும் உத்தரவுகளுக்கு ஏற்ப பாதுகாப்புப் படைகள் விரைவாகச் செயல்படும் என்றும், தங்களது நடவடிக்கைகளுக்கு எந்தவிதமான எல்லைக் கட்டுப்பாடுகளும் இல்லை என்றும் தெரிவித்துள்ளார்.
கெஷ்ம் தீவு மீது அமெரிக்கா தாக்குதல்!
கடந்த சில தினங்களுக்கு முன்பு ஈரானின் கெஷ்ம் தீவு (Qeshm Island) மீது அமெரிக்கா தாக்குதல் நடத்தியதாகத் தகவல்கள் வெளியாகின. ஹார்முஸ் நீரிணைக்கு அருகே அமைந்துள்ள இந்தத் தீவு மீது நடத்தப்பட்ட தாக்குதல் காரணமாக மேற்காசியாவில் மீண்டும் போர் பதற்றம் அதிகரித்துள்ளது.
அமெரிக்க அதிகாரிகளை மேற்கோள் காட்டி அந்நாட்டு செய்தி நிறுவனம் இந்தத் தாக்குதல் குறித்த தகவலை வெளியிட்டுள்ளது.
பிப்ரவரி 28-ல் தொடங்கிய போர் – உலக நாடுகளுக்கு பாதிப்பு!
கடந்த பிப்ரவரி 28-ஆம் தேதி ஈரான் மீது அமெரிக்காவும் இஸ்ரேலும் கூட்டுத் தாக்குதல் நடத்தின. இதற்குப் பதிலடியாக ஈரானும் தாக்குதல்களை மேற்கொண்டு வருகிறது.
இதன் காரணமாக ஹார்முஸ் நீரிணை வழியாக நடைபெறும் சரக்குக் கப்பல் போக்குவரத்து பாதிக்கப்பட்டுள்ளது. உலகின் முக்கியமான எரிபொருள் போக்குவரத்துப் பாதைகளில் ஒன்றான இந்த நீரிணையில் ஏற்பட்டுள்ள முடக்கம் சர்வதேச எரிபொருள் விநியோகத்திலும் தாக்கத்தை ஏற்படுத்தியுள்ளது.
மேற்காசியப் போர் காரணமாக அமெரிக்கா, இந்தியா உள்ளிட்ட பல்வேறு நாடுகளில் எரிபொருள் விலை உயர்ந்துள்ளதாகவும் கூறப்படுகிறது.
போர் நிறுத்தப் பேச்சுவார்த்தை தீவிரம்!
இதற்கிடையே அமெரிக்கா மற்றும் ஈரான் இடையே போர் நிறுத்தம் தொடர்பான பேச்சுவார்த்தைகள் நடைபெற்று வருகின்றன. இந்தப் பேச்சுவார்த்தையில் சுமுகமான தீர்வு எட்டப்பட்டால், அது உலக நாடுகளுக்கு நிம்மதியை அளிக்கும் என எதிர்பார்க்கப்படுகிறது.
ஆனால், போரின் தொடக்கத்தைவிட தற்போது தங்கள் ராணுவம் வலிமை பெற்றுள்ளதாக ஈரான் தெரிவித்திருப்பதும், ஹார்முஸ் நீரிணை முடக்கத்தைத் தொடரப்போவதாக எச்சரித்திருப்பதும் அமெரிக்கா – ஈரான் இடையேயான பதற்றத்தை மேலும் அதிகரித்துள்ளது.