அமெரிக்க அதிபர் டொனால்டு டிரம்ப் தலைமையிலான நிர்வாகத்தில் முக்கிய பொறுப்பு வகித்து வந்த இந்திய வம்சாவளியைச் சேர்ந்த ஹர்மீத் கவுர் தில்லான் தனது பதவியை ராஜினாமா செய்துள்ளார். அமெரிக்க இடைக்காலத் தேர்தலில் குடியரசுக் கட்சி பின்னடைவைச் சந்தித்ததைத் தொடர்ந்து, டிரம்ப் நிர்வாகத்தில் இருந்து விலகும் முதல் மூத்த அதிகாரியாக இவர் கருதப்படுகிறார்.
அமெரிக்க நீதித்துறையின் சிவில் உரிமைகள் பிரிவின் தலைவராக உதவி அட்டர்னி ஜெனரல் பொறுப்பு வகித்து வந்தவர் ஹர்மீத் கவுர் தில்லான். இவர் இந்தியாவின் சண்டிகரில் பிறந்தவர். அமெரிக்க அதிபர் டொனால்டு டிரம்பின் நெருங்கிய ஆதரவாளராகவும் அறியப்படுகிறார்.
ராஜினாமாவை அறிவித்த அட்டர்னி ஜெனரல்
ஹர்மீத் தில்லானின் ராஜினாமாவை அமெரிக்க அட்டர்னி ஜெனரல் டாட் பிளாஞ்ச் சமூக வலைதளத்தில் அறிவித்தார்.
கடந்த 18 மாதங்களாக சிவில் உரிமைகள் பிரிவை அவர் சிறப்பாக வழிநடத்தியதாகவும், அமெரிக்க மக்களின் சிவில் உரிமைகளைப் பாதுகாத்து சட்டத்தை பாரபட்சமின்றி அமல்படுத்தியதாகவும் அவர் பாராட்டு தெரிவித்துள்ளார். மேலும், அவரது எதிர்காலப் பணிகளுக்கு வாழ்த்து தெரிவித்துள்ளார்.
தேர்தலுக்கு முன்பே ராஜினாமா முடிவு
இதற்கிடையே, இடைக்காலத் தேர்தலுக்கு மூன்று வாரங்களுக்கு முன்பே பதவியில் இருந்து விலக முடிவு செய்ததாக ஹர்மீத் தில்லான் தெரிவித்துள்ளார்.
இதுகுறித்து அவர் அளித்த பேட்டியில், வெள்ளை மாளிகையின் தலைமை அதிகாரி சூசி வைல்ஸ், தேர்தல் முடியும் வரை பதவியில் தொடருமாறு கேட்டுக்கொண்டதாகவும், அதன்படி தேர்தல் முடியும் வரை பணியில் நீடித்ததாகவும் கூறியுள்ளார்.
மேலும், அரசு பணியில் தான் செய்ய வந்த பணிகளை நிறைவு செய்துவிட்டதாகவும், மீண்டும் தனது தனியார் சட்டத் தொழிலுக்குத் திரும்ப விரும்புவதாகவும் தெரிவித்துள்ளார்.
யார் இந்த ஹர்மீத் கவுர் தில்லான்?
இந்தியாவின் சண்டிகரில் பிறந்த ஹர்மீத் கவுர் தில்லானின் குடும்பம் பின்னர் இங்கிலாந்து சென்று, அதன்பிறகு அமெரிக்காவில் குடியேறியது. வழக்கறிஞராகப் பணியாற்றிய இவர், குடியரசுக் கட்சியிலும் முக்கியப் பொறுப்புகளை வகித்துள்ளார்.
டிரம்பின் 2020 தேர்தல் பிரசாரத்தின்போது சட்ட ஆலோசகராகவும் செயல்பட்டுள்ளார். 2024-ம் ஆண்டு குடியரசுக் கட்சியின் தேசிய மாநாட்டில் சீக்கியர்களின் அர்தாஸ் பிரார்த்தனையை நிகழ்த்தியதும் குறிப்பிடத்தக்கது.
2025 ஏப்ரல் மாதம் அமெரிக்க செனட் ஒப்புதலுக்குப் பிறகு நீதித்துறையின் சிவில் உரிமைகள் பிரிவின் தலைவராகப் பொறுப்பேற்றார்.
தேர்தல் தோல்விக்குப் பிறகு முதல் விலகல்
அமெரிக்க இடைக்காலத் தேர்தலில் ஜனநாயகக் கட்சி முன்னேற்றம் பெற்று நாடாளுமன்றத்தின் இரு அவைகளிலும் கட்டுப்பாட்டைப் பெற்றுள்ள நிலையில், டிரம்ப் நிர்வாகத்தின் மூத்த அதிகாரி ஒருவர் ராஜினாமா செய்திருப்பது கவனம் பெற்றுள்ளது.
இருப்பினும், தேர்தல் முடிவுகளே தனது ராஜினாமாவுக்குக் காரணம் அல்ல என்றும், தேர்தலுக்கு முன்பே தனிப்பட்ட முறையில் பதவி விலக முடிவு செய்ததாகவும் ஹர்மீத் தில்லான் விளக்கம் அளித்துள்ளார்.