ஹாலிவுட் நடிகரும், முன்னாள் WWE குத்துச்சண்டை வீரருமான டுவைன் ஜான்சன், ‘தி ராக்’ என்று உலகம் முழுவதும் ரசிகர்களால் அழைக்கப்படுகிறார். பிரம்மாண்டமான உடல் அமைப்புடன் வலம் வந்த அவர், தற்போது உடல் எடையைக் கணிசமாகக் குறைத்து மெலிந்த தோற்றத்தில் காணப்படுவது ரசிகர்களிடையே ஆச்சரியத்தையும் அதிர்ச்சியையும் ஏற்படுத்தியுள்ளது.
23 கிலோ வரை எடை குறைப்பு!
54 வயதான டுவைன் ஜான்சன், தனது முந்தைய திரைப்படமான ‘தி ஸ்மாஷிங் மெஷின்’ படத்தில் எம்.எம்.ஏ. வீரர் மார்க் கெர் கதாபாத்திரத்தில் நடித்தார். இதற்காக தனது உடல் எடையை சுமார் 128 கிலோ வரை அதிகரித்திருந்தார்.
தற்போது அவர் நடித்து வரும் ‘லிசார்ட் மியூசிக்’ (Lizard Music) திரைப்படத்தில் 70 வயதைக் கடந்த முதியவர் போன்ற கதாபாத்திரத்தில் நடிக்கிறார். இதற்காக தனது உடல் எடையை சுமார் 23 கிலோ குறைத்து, 106 கிலோ அளவுக்கு கொண்டு வந்துள்ளதாகத் தெரிவித்துள்ளார்.
ஒரு வருடம் எடுத்துக் கொண்ட எடை குறைப்பு
தனது உடல் எடை குறைப்பு குறித்து சமூக வலைதளத்தில் பதிவிட்டுள்ள டுவைன் ஜான்சன், சுமார் 50 பவுண்டுகள் (23 கிலோ) எடையைக் குறைக்க கிட்டத்தட்ட ஒரு வருடம் எடுத்துக் கொண்டதாகக் குறிப்பிட்டுள்ளார்.
அவசரமாகவோ, தீவிரமான முறைகளிலோ உடல் எடையைக் குறைக்க விரும்பவில்லை என்றும், திட்டமிட்டு ஆரோக்கியமான முறையில் இந்த மாற்றத்தை மேற்கொண்டதாகவும் தெரிவித்துள்ளார்.
மேலும், தனது தற்போதைய உடல் எடையில் வலிமை, உடல் சகிப்புத்தன்மை மற்றும் இதய ஆரோக்கியம் சிறப்பாக இருப்பதாகவும் அவர் கூறியுள்ளார்.
உணவுப் பழக்கத்தில் மாற்றம்
உடல் எடையைக் குறைப்பதற்காக தனது உணவுப் பழக்கத்திலும் பல்வேறு மாற்றங்களைச் செய்துள்ளார். குறிப்பாக, பயிற்சிக்கு ஏற்ப கார்போஹைட்ரேட் உணவுகளின் அளவை மாற்றி அமைத்துள்ளார்.
தினசரி சுமார் 250 முதல் 300 கிராம் வரை கார்போஹைட்ரேட் எடுத்துக்கொள்வதாகவும், கடுமையான உடற்பயிற்சி மேற்கொள்ளும் நாட்களில் அதன் அளவை 450 கிராம் வரை அதிகரிப்பதாகவும் தெரிவித்துள்ளார்.
புரதச் சத்து நிறைந்த உணவுகளையும், புளூபெர்ரி மற்றும் சமைத்த ஜாஸ்மின் அரிசி உள்ளிட்ட உணவுகளையும் தனது பயிற்சிக்குப் பிந்தைய உணவில் சேர்த்துக் கொள்வதாகக் குறிப்பிட்டுள்ளார்.
ரசிகர்களின் கவலையும் வைரல் புகைப்படமும்
முன்பு பிரம்மாண்டமான தசை அமைப்புடன் காணப்பட்ட தி ராக், தற்போது மெலிந்த தோற்றத்தில் இருப்பதால் அவரது ரசிகர்கள் சமூக வலைதளங்களில் பல்வேறு கேள்விகளை எழுப்பி வருகின்றனர்.
சிலர் அவரது உடல்நிலை குறித்து கவலை தெரிவித்துள்ளனர். இருப்பினும், அவர் வெளியிட்டுள்ள விளக்கத்தின்படி, இந்த உடல் மாற்றம் புதிய திரைப்படக் கதாபாத்திரத்திற்காக மேற்கொள்ளப்பட்டதாகும்.
நோய் பாதிப்பு காரணமாக அவர் உடல் எடையைக் குறைத்ததாக உறுதிப்படுத்தப்பட்ட தகவல் எதுவும் வெளியாகவில்லை.
திரைப்படங்களுக்காக தனது தோற்றத்தையே முழுமையாக மாற்றிக்கொள்ளும் டுவைன் ஜான்சனின் இந்த முயற்சி, தற்போது ஹாலிவுட் மற்றும் WWE ரசிகர்களிடையே பேசுபொருளாகியுள்ளது.