தைவானை சீனாவுடன் முழுமையாக இணைக்கும் இலக்கு நிச்சயமாக நிறைவேறும் என்று சீன அதிபர் ஜி ஜின்பிங் தெரிவித்துள்ளார். இது சீன கம்யூனிஸ்ட் கட்சியின் வரலாற்றுக் கடமை என்றும் அவர் குறிப்பிட்டுள்ளார்.
சீனாவின் தலைநகர் பெய்ஜிங்கில், சீனப் புரட்சித் தலைவரான சன் யாட்-சென்னின் 160-வது பிறந்தநாளை முன்னிட்டு நடைபெற்ற நிகழ்ச்சியில் ஜி ஜின்பிங் உரையாற்றினார்.
நிறைவேற்றப்படும் வரலாற்றுக் கடமை
அப்போது பேசிய அவர், தைவான் விவகாரத்துக்குத் தீர்வு காண்பதும், தாய்நாட்டின் முழுமையான ஒருங்கிணைப்பை ஏற்படுத்துவதும் சீன கம்யூனிஸ்ட் கட்சியின் உறுதியான வரலாற்றுப் பணி என்று தெரிவித்தார்.
மேலும், “வரலாற்றின் போக்கைத் தடுத்து நிறுத்த முடியாது. தாய்நாட்டின் முழுமையான ஒருங்கிணைப்பு நிச்சயம் நிறைவேற்றப்பட வேண்டும்; அது நிச்சயமாக நிறைவேறும்” என்று அவர் கூறினார்.
அமைதியான இணைப்புக்கு அழைப்பு
தைவானை அமைதியான முறையில் சீனாவுடன் இணைப்பதற்கும், ‘ஒரே நாடு, இரண்டு அமைப்புகள்’ என்ற கொள்கைக்கும் சீனா தொடர்ந்து ஆதரவு அளிப்பதாக ஜி ஜின்பிங் தெரிவித்தார்.
மேலும், ‘ஒரே சீனா’ கொள்கையின் அடிப்படையில் தைவானைச் சேர்ந்தவர்களுடன் பேச்சுவார்த்தை நடத்தத் தயாராக இருப்பதாகவும் அவர் கூறினார். அதே நேரத்தில், தைவான் சுதந்திரத்தை ஆதரிக்கும் பிரிவினைவாத நடவடிக்கைகளுக்கு இடமளிக்க முடியாது என்றும் எச்சரித்தார்.
சீனாவின் கருத்துக்கு தைவான் எதிர்ப்பு
சீனாவின் இந்தக் கருத்தை தைவான் அரசு நிராகரித்துள்ளது. ‘ஒரே நாடு, இரண்டு அமைப்புகள்’ என்ற திட்டத்தை தைவான் அரசும் மக்களும் ஏற்றுக்கொள்ள முடியாது என்று அந்நாட்டின் மெயின்லேண்ட் விவகார கவுன்சில் தெரிவித்துள்ளது.
தைவானின் எதிர்காலத்தை அங்குள்ள மக்களே தீர்மானிக்க வேண்டும் என்பதே அந்நாட்டின் நிலைப்பாடாக உள்ளது.
தைவானைத் தனது நாட்டின் ஒரு பகுதியாக சீனா கருதுகிறது. ஆனால், தனக்கென ஜனநாயக முறையில் தேர்ந்தெடுக்கப்பட்ட அரசைக் கொண்டுள்ள தைவான், சீனாவின் இறையாண்மை உரிமைக் கோரிக்கையைத் தொடர்ந்து நிராகரித்து வருகிறது. இதனால் இரு நாடுகளுக்கும் இடையே நீண்டகாலமாக அரசியல் மற்றும் ராணுவ பதற்றம் நிலவி வருகிறது.
பலுசிஸ்தான், கைபர் பக்துன்க்வாவில் ராணுவ நடவடிக்கை: 74 பேர் கொல்லப்பட்டதாக பாகிஸ்தான் தகவல்!