உலகம் முழுவதும் 150 கோடிக்கும் அதிகமான பெண்கள் மற்றும் சிறுமிகள் காலநிலை மாற்றத்தால் அதிகம் பாதிக்கப்படக்கூடிய பகுதிகளில் வசித்து வருவதாக ஐக்கிய நாடுகள் சபையின் பெண்கள் அமைப்பான UN Women அதிர்ச்சித் தகவலை வெளியிட்டுள்ளது.
உலகளவில் மூன்றில் ஒரு பங்குக்கும் அதிகமான பெண்கள் மற்றும் சிறுமிகள், வறட்சி, வெள்ளம், புயல் உள்ளிட்ட இயற்கைப் பேரிடர்களின் தாக்கம் அதிகமுள்ள பகுதிகளில் வாழ்ந்து வருவதாக அந்த அமைப்பு தெரிவித்துள்ளது. வேலைவாய்ப்பில் நிலவும் பாதுகாப்பின்மை மற்றும் பாலின சமத்துவமின்மை ஆகியவை அவர்களின் பாதிப்புகளை மேலும் அதிகரிப்பதாகவும் எச்சரித்துள்ளது.
2050-க்குள் 14.1 கோடி பெண்கள் வறுமையில் தள்ளப்படும் அபாயம்!
காலநிலை மாற்றத்தின் தாக்கம் தொடர்ந்து அதிகரித்தால், மோசமான சூழலில் 2050-ஆம் ஆண்டுக்குள் கூடுதலாக 14.1 கோடி பெண்கள் மற்றும் சிறுமிகள் கடுமையான வறுமை நிலைக்குத் தள்ளப்படக்கூடும் என்று UN Women தெரிவித்துள்ளது.
காலநிலை மாற்றத்தால் அதிகம் பாதிக்கப்படும் நாடுகளில் வசிக்கும் பெண்கள், வருமான இழப்பு, உணவுப் பாதுகாப்பின்மை மற்றும் வேலைவாய்ப்புப் பாதிப்பு உள்ளிட்ட பல்வேறு சவால்களை எதிர்கொள்வதாகவும் அந்த அமைப்பு குறிப்பிட்டுள்ளது.
வெப்பநிலை உயர்வால் பெண்களின் வருமானம் பாதிப்பு!
24 நாடுகளில் மேற்கொள்ளப்பட்ட ஆய்வுத் தரவுகளின்படி, சராசரி வெப்பநிலை ஒரு டிகிரி செல்சியஸ் அதிகரிக்கும்போது, ஆண்களுடன் ஒப்பிடுகையில் பெண்களின் மொத்த வருமான இழப்பு 34 சதவீதம் அதிகமாக இருப்பது தெரியவந்துள்ளது.
விவசாயம் பாதிக்கப்படும்போது விவசாயம் சாராத வேலைகளுக்கு மாறுவதிலும், வேறு இடங்களுக்குச் சென்று வேலை செய்வதிலும் பெண்களுக்கு உள்ள சவால்கள் இதற்குக் காரணமாக இருக்கலாம் என ஆய்வில் குறிப்பிடப்பட்டுள்ளது.
தண்ணீர் சேகரிப்பு மற்றும் குடும்பப் பராமரிப்புச் சுமை அதிகரிப்பு!
உலகம் முழுவதும் சுமார் 180 கோடி மக்களுக்கு வீடுகளில் நேரடியாகத் தண்ணீர் வசதி இல்லை. இத்தகைய குடும்பங்களில் மூன்றில் இரண்டு பங்கு வீடுகளில் பெண்களே தண்ணீர் சேகரிக்கும் முதன்மைப் பொறுப்பை ஏற்றுள்ளதாக UN Women தெரிவித்துள்ளது.
அதிக உமிழ்வு கொண்ட காலநிலைச் சூழல் தொடர்ந்தால், 2050-ஆம் ஆண்டுக்குள் தண்ணீர் சேகரிப்பதற்காகச் செலவிடும் நேரம் 30 சதவீதம் வரை அதிகரிக்கக்கூடும் என்றும் எச்சரிக்கப்பட்டுள்ளது.
மேலும், இயற்கைப் பேரிடர்களுக்குப் பிறகு குடும்ப உறுப்பினர்களைப் பராமரிக்கும் பொறுப்பும் பெண்களுக்கு அதிகரித்து வருவதாக அந்த அமைப்பு சுட்டிக்காட்டியுள்ளது.
பெண்களுக்கு எதிரான வன்முறை அபாயமும் அதிகரிப்பு!
நீண்டகாலக் கடும் வறட்சிக்கும் பெண்கள் மற்றும் சிறுமிகளுக்கு எதிரான பாலியல் வன்முறை அபாயத்துக்கும் தொடர்பு இருப்பதாக ஆய்வுத் தகவல்கள் தெரிவிக்கின்றன.
14 நாடுகளில் மேற்கொள்ளப்பட்ட ஆய்வின்படி, நீண்டகாலக் கடும் வறட்சியை எதிர்கொண்ட பகுதிகளில் இளம் பருவச் சிறுமிகள் மற்றும் இளம் பெண்களுக்கு எதிரான பாலியல் வன்முறை நிகழும் வாய்ப்பு 21 சதவீதம் அதிகமாக இருப்பது கண்டறியப்பட்டுள்ளது.
காலநிலை முடிவெடுப்புகளில் பெண்களுக்கு உரிய பிரதிநிதித்துவம் இல்லை!
உலக நாடுகளில் 73 சதவீதம் தங்களது காலநிலை நடவடிக்கைத் திட்டங்களில் பெண்கள் மற்றும் சிறுமிகள் எதிர்கொள்ளும் பாதிப்புகளை அங்கீகரித்துள்ளன. இருப்பினும், மூன்றில் ஒரு பங்குக்கும் சற்று அதிகமான நாடுகள் மட்டுமே அவற்றை முழுமையாக எதிர்கொள்ளும் நடவடிக்கைகளைத் திட்டமிட்டுள்ளன.
உலகளவில் எரிசக்தித் துறைக்கான முக்கியப் பொறுப்புகளில் பெண்கள் வகிக்கும் பங்கு 12 சதவீதமாக மட்டுமே இருப்பதாகவும் UN Women தெரிவித்துள்ளது. மேலும், 32.6 கோடி பெண்கள் மற்றும் சிறுமிகளுக்கு இன்னும் மின்சார வசதி கிடைக்கவில்லை என்றும் குறிப்பிட்டுள்ளது.
பசுமை வேலைவாய்ப்புகளில் பெண்களுக்கு புதிய வாய்ப்பு!
காலநிலை மாற்றத்தால் பல்வேறு பாதிப்புகள் ஏற்பட்டாலும், உரிய முதலீடுகள் மற்றும் திட்டமிடல் மூலம் பெண்களுக்கு புதிய வேலைவாய்ப்புகளை உருவாக்க முடியும் என்றும் UN Women தெரிவித்துள்ளது.
சரியான முதலீடுகள் மேற்கொள்ளப்பட்டால், 2035-ஆம் ஆண்டுக்குள் உருவாகும் புதிய பசுமை வேலைவாய்ப்புகளில் 66 சதவீதம் வரை பெண்களுக்குக் கிடைக்க வாய்ப்புள்ளதாகவும், இதன் மூலம் கூடுதலாக 6.8 கோடி வேலைவாய்ப்புகள் பெண்களுக்குக் கிடைக்கலாம் என்றும் அந்த அமைப்பு தெரிவித்துள்ளது.
காலநிலை மாற்றத்தைக் கட்டுப்படுத்தும் நடவடிக்கைகளில் பெண்களின் உரிமைகள், பாதுகாப்பு மற்றும் சமமான பங்களிப்புக்கு உலக நாடுகள் முன்னுரிமை அளிக்க வேண்டும் என்றும் UN Women வலியுறுத்தியுள்ளது.