உலகளவில் மைக்ரோசாப்ட் நிறுவனத்தின் சேவைகளில் ஏற்பட்ட திடீர் செயலிழப்பால், இந்திய விமான நிறுவனங்களின் வாடிக்கையாளர் சேவைப் பிரிவுகளில் பாதிப்பு ஏற்பட்டுள்ளது. இதையடுத்து ஏர் இந்தியா, இண்டிகோ மற்றும் அகாசா ஏர் ஆகிய விமான நிறுவனங்கள் பயணிகளுக்கு முக்கிய அறிவுறுத்தல்களை வெளியிட்டுள்ளன.
மைக்ரோசாப்ட் சேவைகள் முடக்கம்
மைக்ரோசாப்ட் 365, அவுட்லுக், டீம்ஸ், கோபைலட் உள்ளிட்ட சேவைகளில் ஏற்பட்ட தொழில்நுட்பக் கோளாறு காரணமாக உலகின் பல்வேறு பகுதிகளில் பயனர்கள் சிரமங்களைச் சந்தித்தனர். இந்தப் பாதிப்பு விமான நிறுவனங்களின் வாடிக்கையாளர் தொடர்பு சேவைகளிலும் எதிரொலித்துள்ளது.
ஏர் இந்தியா வெளியிட்ட அறிவிப்பு
மைக்ரோசாப்ட் சேவை முடக்கத்தால் தங்களது விமானச் செயல்பாடுகள் பாதிக்கப்படவில்லை என ஏர் இந்தியா தெரிவித்துள்ளது. மேலும், பயணிகளிடமிருந்து வரும் மின்னஞ்சல்கள் தடையின்றி கிடைப்பதை உறுதி செய்ய, மின்னஞ்சல் சேவைகளைத் தற்காலிகமாக மாற்று வழியில் திருப்பி விட்டுள்ளதாகவும் கூறியுள்ளது.
அனைத்து மின்னஞ்சல்களுக்கும் வழக்கம்போல் 24 மணி நேரத்திற்குள் பதிலளித்து வருவதாகவும், குரல் வழித் தொடர்பு, ஏஐ உதவி, சமூக வலைதளங்கள் மற்றும் வாடிக்கையாளர் அறிவிப்புகள் உள்ளிட்ட சேவைகள் இயல்பாகச் செயல்படுவதாகவும் அந்த நிறுவனம் விளக்கம் அளித்துள்ளது.
இண்டிகோ பயணிகளுக்கு அறிவுறுத்தல்
இண்டிகோ நிறுவனம் தனது மின்னஞ்சல் ஆதரவு சேவைகள் பாதிக்கப்பட்டுள்ளதாகத் தெரிவித்துள்ளது. இதனால் வாடிக்கையாளர்கள் அனுப்பும் மின்னஞ்சல்கள் தங்களுக்கு வந்து சேராமல் போக வாய்ப்புள்ளதாகவும் அறிவித்துள்ளது.
அவசர உதவி தேவைப்படும் பயணிகள், இண்டிகோ இணையதளம் அல்லது மொபைல் செயலி வழியாகச் செயல்படும் ‘6E Skai’ என்ற செயற்கை நுண்ணறிவு உதவியாளரைத் தொடர்புகொள்ளுமாறு கேட்டுக்கொண்டுள்ளது. மற்ற வாடிக்கையாளர் ஆதரவு வழிகள் தொடர்ந்து செயல்படுவதாகவும் தெரிவித்துள்ளது.
அகாசா ஏர் மாற்று ஏற்பாடு
அகாசா ஏர் நிறுவனமும் தனது மின்னஞ்சல் ஆதரவு சேவைகளில் தாமதம் ஏற்பட்டுள்ளதாக அறிவித்துள்ளது. இதனால் பயணிகளின் மின்னஞ்சல்களைப் பெறுவதில் சிக்கல் ஏற்படலாம் எனக் குறிப்பிட்டுள்ளது.
உடனடி உதவி தேவைப்படும் பயணிகள், 24 மணி நேரமும் செயல்படும் அகாசா கேர் மையத்தின் +91 9606 112131 என்ற எண்ணைத் தொடர்புகொள்ளலாம் என்றும், சமூக வலைதளங்கள் மூலமாகவும் உதவி பெறலாம் என்றும் அறிவுறுத்தியுள்ளது.
மைக்ரோசாப்ட் சேவை முடக்கத்தால் ஏற்பட்டுள்ள பாதிப்புகளை விமான நிறுவனங்கள் தொடர்ந்து கண்காணித்து வருகின்றன. எனவே, விமானப் பயணம் மேற்கொள்ளத் திட்டமிட்டுள்ளவர்கள், தங்களது விமான நிலவரம் மற்றும் பயண அறிவிப்புகளை சம்பந்தப்பட்ட விமான நிறுவனங்களின் அதிகாரப்பூர்வ வழிகள் மூலம் சரிபார்த்துக் கொள்ளுமாறு அறிவுறுத்தப்படுகிறார்கள்.